ليه النرجسي بيقلل من مشاعرك ونجاحاتك وبيهون من الكوارث اللي ممكن تحصل لك وليه بيهرب لما يلاقيكي واقعة في مشكلة وليه دايما شايف كل حاجة تخصك وكل تجربة تمري بيها شيء تافه ومش مهم ؟
في حين ان كل تجاربه والامه وافراحه لازم يتعمل عليها أفلام في السينما ؟
١- أولا الحساس بالاستحقاق هو اللي بيخليه عايزك تنفعلي مع أي وكل انفعال ينفعله يعني يفرح لازم تكوني فرحانة معاه وتتنططي من الفرحة حتى لو انتيب تموتي من الحزن لان هو يستحق انك تتفاعلي معاه ، وهو أصلا مش بيفرح بس اذا فرح يعني ، واذا حزن فانتي ممنوع عليكي تبتسمي حتى لو من باب التهوين عليه (كان عندي حالة تقول انها مبتسمة باستمرار ولما كان يتعصب تفضل تضحكه وتهديه وتحاول تقلب الموضوع هزار وضحك عشان ميقلبش بخناقة ، وفي يوم قال لها انتي بتكوني مبسوطة لما بتعصب وبتضحكي عشان فرحانة اني متغاظ ، طبعا من وقتها بطلت تهديه ) المهم هو شايف انه يستحق ان الشمس تغرب وتختفي لما يكون زعلان مش انتي تزعلي معاه وبس ، وطبعا لما يمرض انتم عارفين عايزك متناميش فعلا كان عندي حالة لما زوجها يمرض ويكون مش عارف ينام لازم يصحيها معاه طول الليل برضه عشان هو يستحق
٢- عدم أهمية أي حد بالنسبة له ، انتي مكنة قهوة طيب هل مكنة القهوة مهمة هل هي بتحس ، هو شايف انك مش مهمة فأي حاجة تخصك مش مهمة الا اذا حيستفيد منها هو او أولاده لو هو مهتم بصورتهم ادام الناس ، يعني نجاحاتك وانجازاتك مش مهمة واذا كان حيستفيد منها فبرضه مش حيبين فرحة بالفايدة دي لانه أصلا من جواه بيغلي حقد وغيظ انك حققتي حاجة كويسة هو محققهاش ولو حتى هو محققها فكدة انتي حتبقى زيه وهو مش مفروض يكون حد زيه فبالتالي في كل الأحوال حيكون رد فعله علي انجازاتك تقليل وتجاهل ويحبطك ويفسد فرحتك وحله انك متعرفيهوش أي حاجة عن نفسك على اد ماتقدري او لو مضطرة يبقى ماتتوقعيش منه حاجة كويسة ولاتهتمي أصلا برد فعله
٣- اما بقى التجارب الصعبة والكوارث الحياتية فدي حكاية تانية وتصرفاته فيها عجيبة غريبة في قمة الندالة ، اما انه يهرب أصلا وماتشوفيهوش زي لما تمرضي مثلا بعد ما اتعديتي منه ومرضتيه ووقفتي جنبه ،اول حاجة بيعملها انه يتخانق معاكي ويهرب ، شوفو حلقة (ليه النرجسي بعد ماتقفي جنبه في أي ازمة بيمر بيها لازم بعدها يعاقبك وينتقم منك)
ليه بقى هو بيهرب منك في الكوارث الحياتية او بيعمل لك غضب نرجسي او أي خناقة ووراها صمت عقابي ؟ لان هو أصلا ندل دي حاجة معروفة ، بس الأهم من كدة انه أصلا مش بيعرف يتصرف ولا يحل المشاكل وبالتالي لما تكوني واقعة في مشكلة هو مش حيعرف يحلها لك بيحس بالعجز والضعف ويتنشط الشعور بالعار كالعادة وانتي السبب في تنشيطه فطبعا رد الفعل ايه تلكيك وخناق ، او انه بيلاقي ان الناس جاية تواسيكي وتساندك ويلاقيكي محط الانتباه والاهتمام من الناس وهو كم مهمل ودة بيموته طبعا بالتالي حينتقم منك او يغيظك بانه يمشي ويتخلى عنك ، وييجي يقول لك كفاية عليكي الناس اللي انتي طول الوقت قاعدة معاهم وهم ممكن يكونوا جايين يعزوكي في حد من اهلك مثلا ، لكن هو مش قادر يتحمل يلاقيكي تحت الأضواء ولا انتي ولا غيرك أصلا ، اما بقى لو انتي اهلك واجهة مجتمعية وهو مستفيد منها وعندكم عزا فحتلاقيه يقعد جنبك ويطبطب عليكي والناس تشوفه تقول ملاك ودة كلام احدى الحالات ، في الحالة دي ميهربش ليه لان هي حاطاه في صفوة المجتمع وكبراؤه فطبعا وجوده معاها بيحطه تحت الأضواء زيهم وفي نفس الوقت يحافظ على صورته ادامهم شان لما يحب يقضي مصلحة منهم ، وهو أصلا ممكن ميكونش عايش معاها أصلا في بيت واحد لكن قادر يمثل ادامها عادي جدا
حل الحكاية دي انك ماتتوقعيش منه أي خير ابدا ابدا ابدا
٤- خدي بالك هو كمان حريص انه ميديكيش اهتمام ولا أي حاجة كويسة غير بحساب عشان يفضل مسيطر عليكي وتفضلي تلفي حواليه ومستحيل يحسسك بقيمة نفسك لما تنجحي بالعكس طبعا عشان كدة كمان هو لو مستفيد من نجاحاتك برضه حيسفهها ويحقرها عشان انتي متحسيش بقيمة نفسك وتفوقي للي بيحصل فيكي او تحسي انك احسن منه وتشوفيه على حقيقته ويفقد السيطرة عليكي