الزوجة التانية ضحكت على الأولى وسجلت لها شتيمتها في النرجسي واهله
انا متزوجه من ١٠ سنين جوزي من سنتين تزوج عليا عرفي و اتبهدلت منه و من الي اتجوزها و الموضوع انتهي لما هيا ضربته و بهدلته و جت كلمتني و فضلت تعيط انها غلطت في حقي انا و ان ده انسان مريض و انا صدقتها و اتكلمت معاها راحت سجلتلي كل كلامي و بعتتهوله و انا للاسف من ضيقي كنت شاتمه عليه و علي اهله جامد هوا دلوقتي بعد ما الحياه رجعت بينا تاني كل فتره يفضل يزلني بالكلام و يقول لي انا ممكن افضحك انا تعبت و مبقتش عارفه ارد عليه ازاي شويه اقوله انا غلطت و شويه اقوله انت السبب اصلا و كل مره ياخد الموضوع ده حجه انه يعاملني وحش و يهزقني اعمل ايه ؟!

مبدأيا كدة كلنا لازم نتعلم من الحالة دي حاجة مهمة جدا وهي اظن انها اتعلمتها ، لازم نتعلم منفتحش قلبنا لاي حد هم الاصذقاء القدامى والاهل وفقط وخصوصا اللي خارجة من تجربة او عايشة تجربة مع نرجسي لانها بتكون أصلا عندها احتياج شديد جدا للحكي عايزة تحكي لكل الناس اللي حصل لها واللي اتعمل فيها وفيه ناس بتستسلم للحالة دي وبتفضل عايشة حياتها تحكي وبس ودة بيحبسها في الماضي والالم وبيوقف حياتها تماما وبيخسرها الناس اللي بتحبها وبعضهم بتخسر أولادها من كتر ماهي طول الوقت منكدة عليهم بحكاوي ابوهم واللي عمله فيها واحيانا توصل انها بتكون عايزة تعاقب الأولاد بدل ابوهم وطبعا دة بيكون بشكل لاارادي منها يعني على مستوى اللاواعي . المهم انك لازم تخرجي من دايرة الحكي دي بأقصى سرعة ولازم تتعلمي الصمت لانك في احوج حال له ،ليه لان الصمت حيعلمك الثبات الانفعالي ودة مطلوب مع النرجسي ومطلوب مع الناس المتطفلة اللي عندها فضول وعايزة تعرف اخبارك وأسباب مشاكلك وكمان مع القرود الطائرة اللي بيجندها النرجسي ، وطبعا مع الاشكال اللي زي الزوجة دي اللي سجلت عليها ، فانتي لازم تخرجي من دايرة الشكوى دي ، تخرجي منها ازاي؟
تشغلي مخك بأي حاجة تقرأي تشتغلي شغل الابرة ترسمي تكتبي تذاكري لاولادك تعملي أي حاجة انتي بتحبيها تتعلمي أي حاجة كنتي نفسك تتعلميها لازم تشغلي دماغك بحاجة اهم من النرجسي ودة طبعا بيتطلب في الأول التشافي
تاني غلطة وقعت فيها ومش عايزين نغلطها احنا كمان انها مش حكت وبس لا دي شتمت وغلطت فيه وفي اهله ودة بمنتهى البساطة بيركبه عليكي ،بيحقك له وهو أصلا جاني ،دايما أقول متخليهوش يمسك عليكي غلطة عارفة حتقولي لي مش بشتمه في وشه حقولك أسوأ لو شتمتيه في وشه اسمك وصل له الكلام منك مباشرة من غير زيادة ولا تسخين ، لما تشتمي عليه لاي حد أيا كان غير القريبين الموثوق فيهم ، فلازم يكون فيه احتمال ان الكلام يوصل له وغالبا حيوصل مع شوية تسخين وماشابه ،فانتي بتؤذي نفسك معاه وبتضيعي حقك بنفسك ، امسكي لسانك
طيب وقعتي في الفخ وشتمتي خلاص خلصنا لما يعرف ويهاجمك بتعتذري وتصالحيه وخلص الكلام تماما واي مرة يفتح الموضوع تاني لازم تهاجميه برضه مرة واحدة وبقوة عشان يفهم انك مش حتسمحي له انه يذلك بغلطة ابدا ، وليه تهاجميه اول مرة بس مش كل مرة ؟ لانك لو كل مرة يفتح الموضوع وانتي تهاجميه ممكن هو ياخد وقود نرجسي بانفعالك دة ودة مش عايزينه لانه لو اخد وقود مش حيبطل ، طيب بعد كدة لما يفتحه تعملي ايه ؟
حتقولي له انت لسة فاكر اصلا الموضوع قدم وانا بحاول انسى عمايلك اللي خلتني أقول كدة انت كمان مفروض تحاول ماتفتحش الموضوع دة عشان تخليني انسى عمايلك السيئة دي ، بمنتهى الهدوء والثبات الانفعالي وبعد المرة دي ماتنطقيش ولا كلمة لما يفتح الموضوع ولا تديه أي رد فعل ولا كأنك سامعة ولو الح في انك تردي قولي له مش فاكرة انت بتتكلم عن ايه ، انا نسيت الموضوع ، الموضوع دة محصلش أصلا بابتسامة لئيمة اعملي له جاسلايتينج زي ماكان بيعمل لك بس بهزار المهم ماتنوليهوش وقود عشان يبطل يفتح الموضوع تاني
اما تهديده لكي بالفضح سواء في الموضوع دة او أي موضوع غيره فانتي لازم تفهميه انك مش بيهمك رأي الناس فيكي وانك متأكدة ان ربنا حيدافع عنك لان الله يدافع عن الذين امنوا وشوف بقى لما ربنا يدافع عني حيعمل فيك ايه ومتخافيش فعلا من الفضايح ولا من الناس طول ما انتي من الذين امنوا وطول ما انتي عبدة لملك الملوك ولا تهتمي بتشويه السمعة ولا بأي حاجة ممكن يعملها لان ربنا حيرد كيده في نحره المهم انك تكوني من الذين امنوا (بمعناها الحقيقي مش مجرد اسم في البطاقة) ، وممكن تهدديه افضح زي ما انت عايز انت معندكش أي دليل يديني لكن انا لو فتحت بقي ومعايا ادلة شوف بقى مين اللي حيتفضح