١٠ أسباب بتخلي النرجسي يغضبك عند اهلك او يغضب هو عند اهله من غير ماتعملي له أي حاجة
ليه النرجسي بيغضبك كل شوية ويسيبك عند اهلك بالشهور وطبعا بدون مصاريف؟

زوجي نرجسي خفي خبيث جاب 23من30 على إجابات الاسئله هاجرنا من شهور انا عند امي وهو عند امه عندي طفلين صغار وحامل وما بيسأل ابدا عامل بلوك
اليوم روحت بيتي اخد أغراض لاطفالي ووجعت قلبي بس شفته بارد ومافيه روح
حسبنا الله ونعم الوكيل ليش هيك بيعمل وبعذب فينا ليش لازم اسكن مع أولادي في غرفه واحده واحرمهم من بيتهم لا حول ولا قوة الا بالله
وانه ارجع اسكن في البيت لوحدي بدون زوج صعب لانه مابقدر لمصرف بيت لا يوجد إمكانيات ماديه وعند اهلي مصروفنا على ابي الله يطول بعمره
سؤالي هو شو بستفيد بس نطلع من البيت ويهجرنا ويعيش عند امه
١- بيوصل لك رسالة انك مش فارقة معاه وملكيش أي قيمة عنده ودة من ضمن خطط التحقير لاحكام السيطرة عليكي
٢- بيوفر على حساب اهلك حد يلاقي حاجة ببلاش ويققول لا
٣- بيعرفك قيمته لما تقعدي في غرفة باولادك وتشوفي الحياة ع الضيق وطبعا مصاريف اهلك حتكون ع الاد لانهم مكفيين نفسهم بالعافية أصلا وبالتالي الحياة مش حتكون مريحة ولو هم مرتاحين ماديا فانتي برضه مش حتكوني مرتاحة باولادك في مكان مش بتاعك
٤- هو أصلا بيكون عايز يعمل لك صمت عقابي فيعمل صمت عقابي ويرتاح من المصاريف ومن دوشة العيال والمسئولية
٥- البيه أحيانا بيكون ماشي على كيفه وعايز يعيش براحته سواء تليفونات ولا شات ولا فيديو ولا حتى يجيب أصحابه في البيت واسوأ الأحوال يجيب حد مش تمام في البيت ، وطبعا حله الوحيد انه يغضبك
٦- ماشي مع واحدة وبيوهمها انه حيتجوزها وبيخرجك عشان يفرجها هي وأهلها ع الشقة عشان يوهمها انه فعلا حيتجوزها فيها وممكن فعلا يتجوزها فيها
٧- النرجسي بيحب يكون براحته والأولاد بيؤيدوه وبيخلوه مش عارف يعيش براحته زي قبل ماييجوا وفي نفس الوقت بيكون عايزك معاه عشان الوقود وخلافه فيروح مغضبك ويفضل كل شوية يبعت لك رسالة تعالي قابليني في الشقة نتكلم وياخد منك شوية وقود وممكن كمان علاقة ويقلب عليكي في نفس الثانية ويخليكي تمشي برضه غضبانة وتفضلي عند اهلك وهكذا ، وبعضهم بيعيش فعلا في مكان لوحده ويخلي زوجته تروح له كل فترة ومبسوط كدة
٨- بعض النرجسيين بيكون طفل اهله المدلل وحابب العيشة في كنف امه تدلعه وتفخمه وتعظمه وياخد منها وقود عظيم هي واخواته ودة بيخليه عايز دايما يكون عندهم ومش بيعرف يعمل دة غير بإنه يغضبك
٩- بعض النرجسيين بيكره التغيير لدرجة انه حتى لما بيتجوز بيكون كاره يخرج من بيت اهله وكاره يعيش في بيت جديد وعايز يفضل في غرفته القديمة ودة بنشوفه في الحالات اللي الزوج من تاني يوم بيروح عند امه ويقولك نقعد كام يوم هناك وهم في شهر العسل دة طبعا لو لاقي زوجته طيبة وضعيفة ، فلو هي قوية بيصبر شوية وبعد أسبوع يعمل خناقة من مفيش عشان يغضبها ويروح لامه او بالاضح لغرفته القديمة
١٠- بعض النرجسيين مختلين بزيادة شوية وبيعمل الخناقة دي والغضبة بعد ماتولدي اول طفل وبيكون بالنسبة له صدمة لانه عارف انه حياخدك منه وحيكون فيه حد تاني محور الاهتمام في البيت وكمان انتي بعد الولادة بتكوني محور اهتمام اهلك واصحابك والكلام دة بيقهره ومبيقدرش يستحمله فبيهرب ويروح لأهله او يغضبك انتي وميخليكيش ترجعي بيتك بعد ماتولدي وتفضلي شوية عند اهلك
طيب انتي فاهمة كل الكلام دة تقبليه ليه ، ليه تخرجي من شقتك أصلا ، لما يعمل ايه اوعي تخرجي من شقتك هو اللي يخرك حتى لو طردك ماتخرجيش خليكي في بيتك وهو اللي يخرج ، ماتغضبيش ابدا عند اهلك حتى لو ناوية طلا الا لو انتي مش حاضنة ،
الحاجة التانية والمهمة انتي أصلا معتمدة ازاي على ابوكي في المصاريف طالما انتي في بيت اهلك ليه مش بتشتغلي سواء نت ولا تنزلي شغل ، ليه قاعدة مستنية حد يصرف عليكي ،يابنتي الايد البطالة ايه؟.... ، يابنتي اليد العليا خير من اليد السفلى ، يابنتي اتعبي نفسك وانتي لسة صغيرة وشباب وتقدري وحتعرفي وربنا حيرزقك اذا سعيتي ، ربنا يطول في عمر ابوكي يارب لكن دوام الحال من المحال ، بعد عمر طويل مين حيصرف عليكي وعلى اولادك لازم تشتغلي وتصرفي على نفسك