٢- ليه النرجسي دايما سابقك بخطوة وازاي تسبقيه انتي بعشر خطوات
٤ حاجات تعمليهم عشان تسبقيه
هو أصلا سابقك بخطوة بالرغم من انه غبي بس مانقدرش ننكر ان بعضهم اذكياء بس البصيرة مطموسة
المهم ليه هو سابقك دايما بخطوة ؟
١- لانه من اول يوم درسك كويس وعرف كل حاجة عنك وكان أصلا كل تركيزه يجمع عنك معلومات ويعرف نقاط ضعفك سواء منك ولا من اللي حواليكي وبالتالي اصبح عارف حيدخل لك منين ويضحك عليكي ازاي ويهددك بإيه وفين اللي يوجعك عشان يوجعك بيه وايه اللي بيغيظك ويشتغلك منه فهو عارف طريقه وحافظه وماشي فيه بتلقائية لانه حافظه وفاهمه (اللي هو انتي)
٢- هو في المقابل بقى عامل ايه لابس قناع ومخبي وراه السواد كله فانتي مش شايفة انتي ماشية في الضلمة وفي نفس الوقت هو بيخوفك في الضلمة دي فاي حاجة حتاقبلك في الطريق حتكفيكي على وشك لانك مش شايفة هي جت لك منين وفي نفس الوقت انتي في حالة رعب فلازم حتتكفي
٣- في نفس الوقت هو بيظهر لك في الضلمة دي بكشاف حقير ينور لك حتة بتعريفة ويمد ايده يمسك ايدك يطمنك شوية وفجأة يشدك ويجيبك تاني على وشك برضه لانك مسلمة له ومآمنة له لانك مش فاهماه ولا دارساه ولا عارفة عنه حاجة
٤- كمان هو بيؤمن نفسه منك جدا بانه يقعدك من الشغل او يرفض انك تشتغلي او يسيبك تشتغلي وياخد كل مرتبك يعني هو بيقصقص ريشك عشان يكون سابقك بخطوة هو لما يخليكي معكيش فلوس فهو خطط لاي رد فعل منك لو فكرتي ترفعي صوتك بس فهو حيحكمك بالفلوس
٥- هو لما قطعك عن اهلك واصحابك عشان يستحوذ عليكي ومحدش ينصحك وللا ينبهك فكدة سبقك بخطوة لانك ماانتبهتيش وسمحتي له يقطعك عن الناس
هو سبقك بخطوة عشان انتي حبيتيه واتعاملتي معاه بقلبك وهو بيتعامل معاكي بعقله وخطط لك ورسم لك الخريطة اللي حتمشي فيها وانتي عينيكي معصوبة ومش شايفة وهو بيوجهك بالريموت بتاعه
طيب انتي بقى ازاي تسبقيه بعشر خطوات؟
اذا انتي بتتفرجي علي دلوقتي فانتي بدأتي تحصليه ومبقاش سابقك ، ليه لانك بدأتي تفهميه ، مش اول سبب لسبقه لكي انه درسك كويس ؟ طيب شوفي بقى باقي الفيديوهات لي ولغيري واقرأي وادرسيه انتي كمان وبكدة حتكوني معاه خطوة بخطوة بس لسة مش حتعرفي تسبقيه بس ع الأقل حتكوني قادرة تتوقعي الخطوة الجاية منه ايه
طيب عايزين نسبقه بقى نعمل ايه
١- نتعالج من ادمانه ، اول ماتتعالجي من ادمانه حتبدأي تتعاملي معاه بعقلك زي ماهو بيتعامل معاكي بعقله ودي حتكون اول خطوة حتسبقيه بيها طيب ليه حتسبقيه مانتوا زي بعض لسة لااااا شتان بين عقلك وعقله ، انتي صاحبة حق دي اول حاجة ، وتاني حاجة انتي اذكى منه بكتير مهما بان لك غير كدة وحتعرفي دة لما تفهميه اكتر
٢- شفتي القناع اللي هو لابسه سواء لسة لابسهولك ولا خلعه انتي لازم تلبسي له قناع زيه وبنفس بطريقته انتي لازم تخبي عنه كل مايخصك ،لازم ترجعي بالنسبة له حاجة مجهولة مش مفهومة ، مش فاهم انتي زعلانة ولا فرحانة ، امتى حتعملي ايه لازم تكوني غير متوقعة بالنسبة له ، طيب ازاي تبقي كدة ؟
(١) ماتحكيش أي حاجة بتحصل معاكي ولا أي موقف يحصل مع اهلك ولا جيرانك ولا في الشغل ولا في أي حتة ، لا تحكي حاجة ولا تاخدي رأيه في حاجة يقدر يوصل منها لمعلومة عنك وعن تفكيرك ومشاعرك ، ممكن تحكي حاجات تافهة وتاخدي رأية في حاجات تافهة من باب التعايش لكن الحاجات المهمة اللي تبين أي حاجة جواكي توقفي تماما الكلام عنها ، لازم يوصل انه يبقى مش فاهمك او بالأحرى محتار في امرك ومش عارف يتوقعك زي الأول ولما يقول لك اتغيرتي تقولي له ابدا متهيألك انا زي ما انا .
(٢) الحاجات اللي كانت بتضايقك زمان اوهميه انها مش بتضايقك واللي كان بيفرحك اوهميه انه مبقاش يفرحك ، خلي ردود افعالك مناقضة للقديمة خليه يتلخبط وميبقاش فاهم فيه ايه

٣- ثالث خطوة عشان تسبقيه انك ماتعلنيش العداوة ولا تواجهيه انه نرجسي طالما انتي لسة مستمرة معاه ، اديه فتات الخبز زي ما اتفقنا عشان تزودي حيرته وفي نفس الوقت ينشغل عن التخطيط لكي في محاولة فهمك ودة حيعمله عن طريق هوفرينج عالي جدا من خلاله حيحاول يوقعك في الكلام وياخد منك كل المعلومات كالعادة وناس كتير بتقع في الفخ دة وبتخسر خطوات لورا للأسف ، بس لو حتى دة حصل عادي جدا تبدأي تاني من الأول
٤- خطوة مهمة جدا انك ترجعي اصحابك لانك حتحتاجي لكل الدعم والمساندة والمساعدة في التفكير عشان بدل ماتبقي بتفكري بعقل واحد ع الأقل حيكون معاكي عقل تاني ودة في حد ذاته سبق بأربع خطوات
اظن لو نفذتي الكلام دة حتسبيق بعشرين خطوة مش خطوة واحدة عارفة ليه عشان انتي اذكى وانتي ربنا في صفك انتي،
دا غير ان لو انتي شخصية متعاطفة وعندك استبصار يعني مفروض تكوني سابقاه بسنوات ضوئية بس لازم تقربي من ربنا عشان يزود ل استبصارك وينور لك بصيرتك