ازاي تروضي النرجسي ؟ عشر خطوات لترويض النرجسي
عشان تروضي النرجسي لازم تكوني تعافيتي زي أي حاجة عايزة تعمليها في حياتك عشان تعمليها لازم تتعافي الأول من صدمة النرجسي
طيب خطوات ترويض النرجسي :
١- بعد التعافي ، واسترداد ثقتك بنفسك انتي طبيعي حتكوني عايزة تسيبي النرجسي ومش طايقاه أصلا فبدل ماتسيبيه حتروضيه بس لازم توصلي له معلومة انك عايزة تسيبيه فعلا لكن متروحيش تقولي له طلقني ولا عايزة انفصل لا خالص انتي حتعامليه باللي جواكي وحيبان عليكي انك مش طايقاه حيعمل غضب نرجسي طبعا ويقول لك احنا كدة مش نافع نكمل انا مش عايزك فيكون رد فعلك تمام ننفصل ، ماتقوليش انا كمان مش عايزة اكمل او انا كمان مش عايزاك (دة لو انتي مش عايزة انفصال فعلا) لانك لو قلتي كدة حتجرحي عظمته والانا بتاعته ودة بيعمل جرح نرجسي احنا في غنى عنه اما لو ناوية طلاق قولي اللي انتي عايزاته ومش محتاجة تروضيه غوريه ، بس خدي بالك انك الترويض دة بيكون فيه مجازفة يعني مفروض تكوني اشتغلتي وجاهزة في أي لحظة للانفصال بس بتدي نفسك فرصة انك تكملي بس تكوني انتي المسيطرة ع الموقف
لما توصل له فكرة انك عايزة تنفصلي بالطريقة دي هو حيتراجع وحيبطل يقول لك نتطلق أصلا وحيخاف ان البيت يخرب والصورة تبوظ او يخسر مصلحته معاكي
٢- مجرد مايحس انك عايزة تنفصلي عادي حتوصل له فكرة تانية خطيرة اللي هي انك عادي تعيشي من غيره ودة معناه انك مبقتيش متعلقة بيه وانه فقد السيطرة عليكي ودة حيخليه في الأول يعمل غضب نرجسي ويسيء معاملتك بس هنا بنقول دي سياسة النفس الطويل نشوف مين نفسه أطول انتي حتقدري تحافظي على ثباتك ومش حتنهاري اد ايه وهو كمان حيقدر يعيش التوتر دة فترة اد ايه لان هو طاقته قليلة وبيزهق من استمرار حال واحد الا اذا عنده تعويض من برة
في النهاية لو انتي ثبتتي هو حيتراجع وحيضعف ادامك
٣- ابدأي تلعبي على الصورة بتاعته ، دايما تقولي له انا كنت شايفاك حد عظيم لكن للأسف تصرفاتك هدت الصورة الجميلة اللي كانت جوايا ، انا كنت فاكراك احسن من كدة بكتير ، انا كنت بشوفك حد مثالي ، ليه كسرت الصورة الحلوة لك ، نظام تأنيب ضمير لكن مش متواصل على فترات عشان ماتفقديش السيطرة وعشان الكلام مايفقدش معناه ولازم يكون مش في خناق خالص يكون في عتاب او لحظات هوفرينج

٤- دايما تكرري عليه جملة : انت متعرفش انا كنت بحبك اد ايه ، انا زعلانة انك فقدت الحب دة كله و عارفة ان محدش حيحبك اد ما انا حبيتك واتعلقت بيك ،ولازم كلمة اتعلقت دي تتقال ف النص لانه مش مهم عنده الحب المهم عنده انك تكوني متعلقة بيه عشان يقدر يسيطر عليكي ، كرري دايما الجمل دي: انت اللي ضيعت التعلق دة وانت اللي مطالب تسترجعه ، انت لازم تبذل مجهود عشان تسترجع ثقتي فيك تاني ، كلام من هذا القبيل يحسسه انه لازم يلحق نفسه قبل مايفقد السيطرة عليكي
٥- مثلي عليه الشجاعة ، مهما كنتي خايفة منه دايما تقولي له اللي يخاف من ربنا مايخافش من مخلوق ودايما تفهميه انك مبقتيش تخافي منه ولا من غيره ولا من أي حاجة ولا من الوحدة ولا من قلة الفلوس ولا أي حاجة مخوفاك يلانك رميتي حمولك على ربنا وحاولي تصدقي في الحكاية دي مع ربنا
٦- في وسط كل الحاجات دي لما يعمل لك هوفرينج تكرري كام جملة في لحظات الصفا اللي هو متخيل انه مسيطر عليكي عاطفيا فيها : نفسي ارجع احبك زي زمان ، نفسي ارجع اآمن لك زي زمان ، نفسي ارجع صافية لك زي زمان (اللي هو بلغته نفسي ارجع هبلة وتعرف تستغلني وتسيطر علي زي زمان ) وطبعا دة حيكون رده عليكي : ارجعي ياحبيبتي متخافيش ابدا انا اتغيرت انا بحبك وعايزك صافية وبطبيعتك ايه اللي مانعك ، طبعا انتي اوعي تردي ولا تقولي تصرفاتك ولا انت لازم ترجعني لا خالص وقفي كلام عند النقطة دي وابتسمي وبوسي راسه ولا خده معلش اعصري على نفسك لمونة بس دي ضروريات الخطة ، الخطوة دي مهمة وخطيرة لانها بتديه امل انك حترجعي زي ماكنتي وانه لو كان خفي قبل كدة ودلوقتي بقى ظاهر معاكي فانتي بتديه ايحاء انك عادي ترجعي هبلة تاني وبالتالي هو يحاول يحسن صورته وسلوكه ويرجع خفي تاني
٧- من وقت للتاني حسسيه انك بتحتاجي له بس بشكل ضئيل جدا فتات خبز يعني ، وحسسيه انك بتحبي الشعور بانه مسئول عنك وانك في كنفه وانه راجل وكدة شوية كلام فارغ ينفخوه شوية وفي نفس الوقت حيخلوه يحاول يثبت الكلام دة
٨- نفذي تكتيك فتات الخبز (اللي مشافتش الحلقة تشوفها ) بس في نقطة الإحساس بالأمان تحديدا ، يعني من وقت للتاني تحسسيه انك متمسكة بيه طول ماهو كويس معاكي تحسسيه كدة بس برضه بأسلوب فتات الخبز يعني ترمي له كلمة وخلاص ولو قال لك اسيبك قولي له يلا وبعدين حيرجع يقول لك امال ايه متمسكة بيا تردي فورا محدش بيتمسك بحد مش عايزه ، انا اتمسك بيك يعني اتجاوز عن عيوبك واخطائك واتمسك بيك لكن لو انت مش عايزني اتمسك بايه وليه
٩- علميه يسمع منك كلمة لا حتى لو حتعملي اللي هو عايزه ومش حتقدري تنفذي اللا دي بس برضه سمعيها له في الأول قوليها بهزار وضحك وانتي مبتسمة ، حيتخض وممكن يبرأ ويقول لك هزار بايخ ويكسفك بس ولا يهمك كرريها تاني وعاشر لحد مايتعود عليها وبعد كد ة تبالتدريج قوليها من غير ابتسامة وشوية شوية حتلاقي نفسك بتقوليها وتنفذيها
١٠- اعملي لنفسك مجتمع مساند موازي بديل