امتى تنتهي حربك مع النرجسي ؟
١- لما تبطلي تحاربي نفسك
٢- لما تبطلي تكوني من قروده الطائرة
٣- لما تتخلصي من ادمانه
٤- لما تقوي نفسك وتشتغلي وتعتمدي على نفسك
٥- لما يلاقي نفسه في كل معركة بيدخلها معاكي خسران
١- حتنتهي حربك مع النرجسي لما تصالحي نفسك وتوقفي حرب مع نفسك
يعني ايه الكلام دة هو فيه حد بيحارب نفسه؟ بيحارب نفسه وبيحارب ربنا ، تخيلي ان انتي ممكن تعملي كدة وانتي مش دريانة
انتي بتحاربي نفسك ازاي؟ النرجسي علمك تحاربي نفسك وعلمك تلوميها طول الوقت وطول الوقت تغلطيها وتعنفيها . هو زرع جواكي انك غلط وان دايما الغلط جاي منك وان أي حاجة وحشة بتحصل بتكوني انتي السبب فيها و هو بيقنعك بدة عن طريق الوش الكيوت البيبي فيس اللي بيصدرهولك في الأول ويحسسك انه بريء وممكن عبيط ومش فاهم حاجة في الدنيا لدرجة انك تخافي عليه من نفسك ومن اخواتك ومن اهلك وطبعا كل دة بيكون النرجسي الخفي ، وطبعا لما بتقتنعي بالوش الكيوت دة انه حقيقي والبراءة دي فلو أي حاجة حصلت وحشة حيكون هو مش قاصدها او مش هو السبب فيها وبالتالي انتي ظلمتيه وشكيتي فيه وبكدة انتي وحشة وتأنبي نفسك ، ومع الوقت بتلاقي نفسك شايفة نفسك وحشة وهو ملاك ، وبعدين لما ربنا ينور لك الدنيا وتعرفي انه شيطان برضه مش قادرة تقتنعي انك بقيتي مش انتي وانك أصلا انسانة كيوت مش بتؤذي حد وانك حد كويس وكان ناجح في يوم من الأيام وكان قادر يعمل أي حاجة وكل حاجة هو بيعوز يعملها وبتشوفي نفسك حد عاجز وفاشل ومفيش حاجة بتنجح معاكي ولا انتي عارفة تنجحي في حاجة وتبدأي تقولي هو كان عنده حق لما كان بيقول لي اني فاشلة انا فعلا معرفش اعمل حاجة انا فعلا مش نافعة في حاجة ، انا أصلا اللي وحشة وواضح اني ظلمته وكان لازم ماسيبهوش وتكملي حرب مع نفسك لحد ماتقضي عليها
٢- بطلي تكوني قرد طائر ضد نفسك
ازاي الكلام دة ؟ انك بعد ماتسيبي النرجسي تفضلي تحاربي نفسك بيه ازاي تفضلي تراقبيه ع السوشيال ميديا وتدوري تعرفي اخباره وتفضلي تشوفي إنجازاته اللي بيصدرها لك عشان يغيظك بيها وانتي فعلا تتغاظي وتفضلي تحارب في نفسك وتغيظي نفسك وتلاقي نفسك فجأة بيقتي من قروده الطائرة اللي طول الوقت تفكري نفسك بمميزاته وبمساوئك ، وخصوصا لو ارتبط او خطب او اتجوز بعديكي ونزل صوره هو والضحية الجديدة وانتي مفيش حاجة بتعمليها في حياتك غير انك تتابعيه وتتكلمي عنه ، انتي كدة بتحاربي نفسك ولا لا وبتكوني قرد طائر ولا لا
٣- وقفي ادمانك للنرجسي ، اسمعي التشافي ونفذي اللي فيه عشان تخلصي من ادمانه او تابعي مع طبيب نفسي لان طول ما انتي مدمناه حتفضلي جوة دايرته وحتفضلي في حرب معاه ، حتى لو انتي فضلتي معاه وماسيبتيهوش لو بطلتي تدمنيه حتعرفي توقفي الحرب لما ميفرقش معاكي كلامه ولا تحقيره ولما تكوني فعلا مش شايفاه ولا سامهاه هو حيحارب نفسه حيجهد نفسه ع الفاضي في المعارك معاكي لانك مش حتهتمي ولا تتأثري وهو حيحس انه بيهدر طاقته ع الفاضي فيا اما حيسيبك ويمشي يا اما حيستسلم ويعيش بس مع شوية معارك هايفة ياخد بيها شوية وقود بس الحرب حقيقي حتقف
٤- لو بقيتي قوية واشتغلتي ورفضتي تصرفي(يعني ممكن تديه فتات) عليه وحافظتي على فلوسك هو حيخاف تمشي وتسيبيه فيبطل حروب او انه مش حيعجبه قوتك فيبدأ يطفشك او يسيبك يعني في كل الأحوال حتخلص الحرب معاه ، واللي عندها أولاد منه حعمل لها حلقة ان شاء الله عن الطلاق وما بعده
٥- لما كل مايدخل معاكي معركة يخسرها ساعتها مش حيحاربك تان يلانه أصلا بيدخل المعارك عشان يكسب فيثبت لنفسه انه قوي فلما يدخل معاك وكل مرة يخسر حينسحب لانه كل مرة ببيثبت لنفسه ولكي انه ضعيف وبالتالي مش حيقدر يستمر على كدة فيمشي ويسيبك او لو ميقدرش حيعيش بدون معارك ، طيب ازاي تخسريه كل المعارك؟ لما تكوني مش مدمناه و تكوني قوية وتعرفي تتجاهليه بطريقة صحيحة شوفي قايمة تشغيل (ازاي تتجاهلي النرجسي) لو عرفتي تتجاهليه صح بدون مايمسك عليكي غلطة مستحيل حيكسب معركة غير بمزاجك وانتي اللي حتكسبيها له من باب الهدنة بس زي ما اتفقنا في القايمة دي

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة
https://youtu.be/r9fANIRTsdw