النرجسي بيخاف من ايه وليه؟
ليه النرجسي جبان وبيخاف من كل حاجة واي حاجة ؟
الخوف عند النرجسي متجذر ومتعمق جواه وقلب الشخصية النرجسية أصلا ومحورها هو الخوف ، الخوف من الرفض اللي هو جربه مع اهله في طفولته سواء ابوه او امه او الرفض اللي شافه من المجتمع بعد ما اتدلع في بيت اهله وبقى ماسخ وخرج للمجتمع فاترفض بعنف ، دة او مشكلة قابلت النرجسي ورسخت جواه الخوف من الرفض ، طيب ايه علاقة الخوف من الرفض ببقيت المخاوف اللي عند النرجسي؟
النرجسي بيخاف يترفض ولو اترفض حيتهجر يعني لو الكل رفضوه حيكون منبوذ ومفيش معاه حد واي حد حيعرفه حيرفضه وبالتالي حيهجره ، طيب بعد ما النرجسي كبر وبيشتغل وبقى له دور في المجتمع وحقق نجاح ليه لسة خايف وليه خايف من كل حاجة أصلا مش من الهجر والرفض بس ؟
اكيد انتي متوقعة ايه اللي حقوله ، دلوقتي انا بخاف من الرفض يعني حخاف قطعا من كلام الناس وحخاف على شكلي ادامهم ، وحخاف الأمور تتلخبط او خططي تبوظ او مانجحش في عملي لاني لو مانجحتش حترفض ،ولو خططي فشلت حترفض ، وحخاف اغلط في العلن وحد يعرف اني بغلط عشان حيرفضني ويهجرني ، معنى كدة اني حخاف من كل خطوة بخطيها في حياتي ، عارفين النرجسي عامل زي ايه ؟ عارفين اللي بيراقب ربنا في تصرفاته يعني اللي كل نفس بيتنفسه بيحاسب نفسه عليه الأول ويشوف ربنا حيكون راضي عن النفس دة ولا لا ، ليه عشان خايف يزعل ربنا منه او يغضبه عليه ، خايف يخرج من رحمة ربنا خايف يبعد عن رضا ربنا ، النرجسي بقى عامل كدة بس مع الناس ، ايه دا شرك دة ولا ايه ؟ مالناش فيه مش احنا اللي حنتكلم في الشرك ، بس هو كدة بالظبط النرجسي بيخاف يتنفس الا الناس ماترضاش عن النفس دة فترفضه فتهجره ، طيب ربنا؟ هو غفور رحيم ، انا حمتنع عن اللي اقدر امتنع عنه وحعمل اللي اقدر اعمله والباقي ربنا حيكون عارف اني مقدرتش عليه فحيغفر لي ، المهم نرجع لموضوع الخوف . هو ليه طيب بيخاف من المرض وبيخاف من اانه يتعرض للسرقة او النصب وبيخاف يغير أي حاجة في حياته وبيخاف يدخل في مشروع جديد (بعضهم) وبيخاف من الحشرات وبعضهم بيخاف من الحيوانات الاليفة وبيخاف من المغامرات وبيخاااااااف موووت من الموت ؟
بيخاف من المرض لا يموت وبيخاف من الموت عشان حاجات كتير لانه بيحب الدنيا ولان الموت شيء مجهول بالنسبة له مش عارف حيجراله ايه بعد الموت جنة ولا نار وهو في قرارة نفسة عارف انه مش ابن الله ولا حاجة بس على مستوى اللاوعي غالبا لانه يقول لك ربنا غفور رحيم وربنا بيحبني طيب موت بقى متخافش تلاقيه رعب مش طبيعي يعني هو عارف مصيره كويس بس مش على مستوى الوعي ،مش كلهم
كمان بيخاف من الفشل طبعا ومن انه يتنصب عليه ومن انه يتسرق عشان الناس حتعرف انه ضعيف وبالتالي حيرفضوه ونرجع للمشكلة الاصلية
ليه بقى هو ضعيف ؟ هو ضعيف عشان هو مش متحد مع نفسه ومش متصالح معاها يعني ايه يعني هو من كتر ما اتبهدل وهو طفل واتعامل بقسوة وبظلم واترفض وكان حب اهله مشروط اصبح مقتنع انه فعلا شخص سيء لايستحق الحب ولا الرعاية وانه عار على اهله وعالة وكل شيء سيء دة اللي زرعوه فيه اهله وزي ماهو النهاردة بيقدر يقنع ضحيته انها وحشة وانها لاتستحق الحب واو ا وا ، هو كمان اتعمل فيه كدة وهو طفل ، فنتيجة الكلام دة بيكون هو فعلا بيكره نفسه بيكره صفاته اللي اهله زرعوها فيه وهو صدقها وتقمصها واعتنقها وبقت فيه ، فبالتالي هو كاره لنفسه وبكدة اصبح اتنين في بعض واحد جميل ادام الناس والتاني سواد داخلي محدش شايفه غيره هو وضحيته ، ودة سبب في انه طول الوقت خايف ، خايف السواد دة يتشاف خايف الناس تعرف حقيقته ، خايف وبس هو عايش الخوف ، تفتكروا بقى الانسان اللي عايش الخوف دة ممكن يكون قوي ازاي لازم يكون ضعيف وضعيف جدا مهما ادعى غير كدة
انتي مستفيدة ايه من كل دة ؟ الطبيعي انك لما تعرفي ان الوحش اللي انتي فاكراه وحش لما تعرفي انه جبان وضعيف تبطلي انتي خوف ، بطلي تخافي من الوحش اللي في خيالك هو انسان في منتهى الضعف ،المشكة ان انتي اللي عندك نقط ضعف فعلا هو بيستغلها واتكلمنا فيها في حلقات (نقطة ضعفك اللي النرجسي بيستغلها ويذلك بيها ... ، ازاي النرجسي بيستغل احتياجك للعلاقة الحميمة .....، ازاي تهزمي النرجسي وتكسبي كل المعارك معاه ...) دول كلهم بيتكلموا عن اهم نقاط ضعفك اللي النرجسي بيستغلها ضدك ويبان ادامك قوي وهو أصلا لو قوي مكانش يستغل نقط ضعفك ، القوي بيواجه مش بيلف يضرب من الظهر ، النرجسي ضعيف وانتي اللي بتساعديه يظلمك باستسلامك وخوفك

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة
https://youtu.be/r9fANIRTsdw