دي اكبر نموذج ممكن تشوفوه في لوم النفس ، واللي بيتم اكتسابه من الحياة مع النرجسي ، وزي ما انتوا شايفين دي حالة عاشت مع ام نرجسية قبل الزوج يعني رضعت لوم النفس مع لبن أمها ، مش اللوم وبس دة كمان إحساس بعدم الحب او خلينا نقول إحساس بالرفض من الام أولا وبعدين من الزوج بعد كدة ، غالبا اللي بتربيها ام نرجسية بتكون فريسة سهلة جدا لزوج نرجسي وطبعا دة لان الام بتكون حطيتها في القالب المثالي اللي بيجذب النرجسيين وبيحبوه ودة بيبان على الشخصية من مجرد انك تتكلمي معاها عشر دقايق او انك تراقبي تصرفاتها وكلامها في أي قعدة او تجمع بتتعرف علطول ان دي ضحية مثالية ومتظبطة وجاهزة للاستغلال والتلاعب تماما ، حسبنا الله في كل ام بتعمل كدة في بنتها
المهم الحالة دي وصلت انها تفكر ان اللي هي فيه دة ربنا عمله عشان هي من الفئة الدنيا من البشر ولان النرجسيين اللي بيؤذوها هم السادة اللي ربنا عايز يمتعهم في الدنيا وبيسخر لهم اللي زيها عشان اما يكفر بيها عن ذنوب النرجسيين على اسا ان هي اللي بتؤذيهم او انه خلقها عشان تخدم الصفوة دول واللي هم النرجسيين ، انا عارفة ان الإحساس دة اكيد مش بيكون متجذر ولا دائم جواها طبعا هو بييجي لما الضغطوطات تزيد جدا من كل اتجاه وبيفضل فترة ويروح ويرجع تاني زي الهبات الساخنة كدة ، وعارفة كمان ان هي مش لوحدها بتحس بكدة لا كتير جدا من زوجات النرجسي وبنات النرجسيات بيحسوا الإحساس دة ، المهم ان لما نحس الإحساس دة ازاي نتصرف مع نفسنا ؟
اول حاجة تعمليها تخرجي من المكان اللي انتي فيه لو قدرتي تنزلي الشارع تمشي بس بلا هدف او اتجاه ، لو مقدرتيش تخرجي برة البيت اخرجي اقفي في البلكون او اخرجي من الغرفة اللي انتي فيها وروحي اكتر مكان في البيت بترتاحي فيه وحاولي توقفي تفكيرك ولو للحظات و بعدين ابدأي بالراحة كدة تفكري هل انتي فعلا بتتعمدي تؤذي حد ؟ خدي بالك انتي انسان بالغ عاقل ومدرك وغير ذاهب العقل يعني مدركة لكل تصرفاتك فأكيد حتكوني عارفة انك بتؤذي واكيد مش بتمشي وانتين ايمة يعني برضه مش حتؤذي حد وانتي مش في وعيك ، يعني لو ركزتي التفكير للحظات حتلاقي انك مش بتؤذي حد ابدا ولا أصلا تعرفي تؤذي حد ولو حاولتي مش حتعرفي والا مكنتيش وصلتي انك تكتبي الكلام دة
تاني حاجة عايزاكي تعمليها لما تحسي بالاحساس دة تفتحي الفيديو دة وتسمعيه وتسمعي كمان فيديو المتعاطفة عشان تحاولي تتعرفي على نفسك وتعرفيها ، ولوقادرة وعندك مجال اسمعي من فيديوهات الثقة بالنفس فيها تدريبات كتير تعرفك على نفسك ، وقبل كل دة اسمعي فيديوهات النرجسي وطرق التلاعب بتاعته عشان تدركي ان العيب مش فيكي ابدا وان العيب فيه هو ومعلش في مامتك كمان ، اللي برضه حعمل حلقة عن الام النرجسية بسببها
مسألة محدش يقول لي صلي عشان بقيت عندي شك في الثوابت دي كتير من الناس لما بيتعرضوا لصدمات شديدة عليهم بيوصلوا لكدة لكن المهم نلحق نفسنا ومنطولش ، طيب ازاي حنلحق نفسنا ؟
شوفي ربنا سبحانه وتعالى مخلقناش عشان يعذبنا ولا يتحدانا ابدا حاشا لله ، لكن هو ممكن يكون بيختبر صبرك وهو مش محتاج يختبره هو عارفك كويس بس هو عايزك تعرفي نفسك وتعرفي حتصبري اد ايه عشان تعرفي انتي حتستحقي حبه وجنته ولا لا ، هو عايزك تعرفي انتي بتحبيه بجد ولا كلمة بتقوليها زي ماسمعتيها من غير إحساس ، هو عايزك لنفسه بس من غير شريك ، هو لقاكي وصلتي مع النرجسي انك بتحسي ان ربنا فوق والنرجسي تحت يعني نوع من الشرك الخفي ، هو لقاكي وصلتي انك تحبي النرجسي لدرجة انك تعصي ربنا عشان ترضي النرجسي أيا كان هو مين ام او اب او زوج ، هو لقاكي بتخافي من النرجسي اكتر ما بتخافي منه ، تفتكري لما تكوني كدة هو حيعمل معاكي ايه ؟ طيب لما بقى تفوقي وتقولي يارب انا غلطت ورجعت وتبت وعرفت غلطي بيعمل معاكي ايه ، عارفة احنا بنشك في الثوابت ليه ؟ عشان احنا عندنا كبر احنا بدل ما نشك في نفسنا اننا بنعمل حاجة غلط زعلت ربنا مننا فكرنا ان ربنا هو اللي غلط من كتر ما احنا شايفين اننا كاملين مش بنغلط ومانستحقش لا عقاب ولا ابتلاء ، محدش يزعل مني بس انا هنا عشان الحقك ، وانقذك من نفسك ومن شيطانها ،
اظن كدة كفاية عليكي النهاردة في النقطة دي
بس عايزة أقول لك ان أحيانا ربنا يحرمنا من حب البشر عشان حبهم بيعمي عيوننا عن حبه فلما نفقد حب البشر بندور على حب ارقى واعظم يقوم ربنا يرشدنا لحبه ودي هي النعمة العظمى اللي لو صلنا لها دخلنا الجنة واحنا ع الأرض

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة
https://youtu.be/hGBX9gFIt2g