هل ضحية النرجسي ممكن تتحول لنرجسية ؟
الإجابة السريعة من دكتور راماني :لا
انا بصراحة كنت شايفة انه لا بس كنت محتاجة اعرف رأي العلم قبل ما اجاوب على السؤال والحمد لله دكتور راماني لسة منزلة فيديو جديد جاوبت فيه عن السؤال
هي شرحت الموضوع قالت ايه؟
دلوقتي النرجسية بتتكون ازاي ؟ قلنا كتير في حلقات قبل كدة انها بتتكون نتيجة التربية من الصغر (انا بقول لكم ان الشخصية بتتكون في او ست سنوات من عمر الانسان دة اللي درسناه في علم النفس ودة اكبر دليل على ان لا وخصوصا ان النرجسة اضطراب شخصية او بالاصح شخصية مضطربة يعني حصل مشاكل اثناء تكوين الشخصية فأصبحت مضطربة وزي ما اتفقنا التكون دة بيحصل في الست سنوات الأولى من العمر ،على خلاف الامراض النفسية اللي ممكن تصيب الانسان في أي وقت وفي أي عمر ، دة اجتهادي وفكري وياريت لو معانا حد دارس علم نفس يقول لنا رأيه في نقط تكوين الشخصية وتكوين اضطراب الشخصية ) نرجع لدكتور راماني هي قالت ان الابوين او المربي اللي بينشأ على ايده الطفل بيكون هي المكون الأساسي لشخصية الطفل عن طريق المعاملة سواء فرط القسوة او فرط الدلع ، وبالتالي مينفعش تتكون الشخصية النرجسية بعد البلوغ نتيجة التعرض للاستغلال النرجسي ، كمان هي بتقول ان انتي لسة عندك مشاعر وعندك تعاطف ومازلتي بتتأثري بألام الاخرين وبتحزني لحزنهم ووبتتعاطفي معاهم وبتهتمي ان تصرفاتك ماتؤذيهمش وبالتالي فانتي مستحيل تكوني اتحولتي لنرجسية وكمان الاستغلال النرجسي مستحيل يقضي على مشاعرك وتعاطفك دة .
طيب ايه اللي بيحصل لك ؟
اللي بيحصل ان النرجسي بيكون هدفه كسرك وتوصيلك ان نظرتك لنفسك تكون تحقيرية ، وتحسي بقيمة نفسك بس لما تسعدي النرجسي لدرجة انك بتحسي ان انتي اللي انانية اذا ركزتي شوية على نفسك اكتر من تركيزك على اسعاده وتلبية طلباته ، دة غير انك نتيجة الصحبة النرجسي فترة طويلة والتعرض للاساءة والتحقير بيخليكي تربطي قيمة نفسك برأي النرجسي فيكي وبنظرته لكي وطبعا دة اللي هو عايزه وبالتالي بيقدر يزرع جواكي الإحساس بالذنب ويخليكي طول الوقت بتلومي نفسك ويحسسك انك انانية ونك بقيتي عدوانية وانك بتكدبي وانك بتتعصبي كتير واو ا وا وكل دة بيقنعك انك عندك صفات النرجسية فتتوهمي انك بقيتي نرجسية
دا غير انك أصلا اثناء الاستغلال النرجسي او بعده بيحصل انك بتكوني فعلا عصبية وغضبانة ومكتئبة وحزينة وحساسة وكل دة بيخليكي مش قادرة تكوني متعاطفة مع اللي حواليكي كالعادة وبتحسي انك محتاجة تتعاطفي مع نفسك شوية اكتر وتداوي نفسك ودة طبيعي لكن مع حرصك على المثالية ومع احساسك بالذنب واللوم اللي زرعه جواكي النرجسي بتبدأي تحسي بقيتي نرجسية
كمان حالة الغضب والعصبية اللي بتكوني فيهم وهي أصلا مش طبعك بتلاقي نفسك مستغربة نفسك وخايفة تكوني بقيتي زي النرجسي
عايزة تطمني على نفسك ؟ طول ما انتي مهتمة بالاخرين (باستثناء النرجسي طبعا ) وبتتأثري بيهم وبحزنهم ووبتحاولي ماتؤذيهمش بتصرفاتك واذا اذيتي حد بتتعاطفي وتعتذري تأكدي انك مش نرجسية

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/