ازاي تنتقمي من النرجسي؟
طيب ازاي تنتقمي من النرجسي ؟ الحلقة مش للي عايزة تستمر مع النرجسي الحلقة دي للي قررت تنفصل واللي انفصلت فعلا واللي زوجها نرجسي خبيث او انتقامي او نرجسي سادي او نرجسي سيكوباتي او بيضرب او بيخوض في عرضها او بيزني ، يعني النرجسي الخبيث فقط
شوفي النرجسي عايز منك ايه بالظبط؟ عايزك خاملة خاضعة مطيعة طاعة عمياء في الحلال والحرام ، عايزك خادمة وزوجة وعايزك تخلفي له ضحايا جدد يستخدمهم زي ما بيستخدمك ، وعايز يسيطر عليكي سيطرة تامة عشان يقدر ياخد منك الوقود النرجسي سواء سلبي او إيجابي ، وعايز ايه كمان ؟ عايزك فاشلة عشان يحس انه ناجح ، وعايزك ضعيفة عشان يحس انه قوي وعايزك مفلسة عشان يذلك بفلوسه ويسيطر عليكي ويمسكك من رقبتك عشان متسيبيهوش مهما عمل فيكي ، انا عارفة انك عارفة كل دة ، بس حبيت افكرك واللي تعرف حاجة تانية عايزها النرجسي غير اللي قلته تكتب لنا في التعليقات ،
طيب كمان واهم حاجة عايزها النرجسي انه يكسب طول الوقت وانتي تخسري طول الوقت .
يعني ايه ؟ يعني النرجسي عايش لعبة خيال افتراضي ، حاطط النظارة وقاعد يلعب طول الوقت بيلعب حرب ، هو بيحب المشاكل وبيستمتع بيها استمتاع مش طبيعي ، ليه لانه بيكسب ويستمتع انه كسب ، المهم انتي معاه في اللعبة ، لا دا انتي البطلة اللي قصاده يعني انتي اللي لازم يكسبك ، بكل الطرق ،ياخد فلوسك ، يضربك ، يهينك ، يفشلك وو ..... ، في النهاية هو لازم يكسب اللعبة وكل مايكسب دور جيم يصعد للي بعده ويزيد في جبروته ماهو بيجمع نقط وبيقوي نفسه ، وطول ما انتي ضعيفة وسايباه يكسب طول ماهو بيزيد في جبروته ، طيب اعمل ايه ؟ اعمل ايه عشان انتقم منه؟ واخد حقي اللي اخده وسنين عمري اللي راحت؟
شوفي عشان تنتقمي منه بطريقته انا وانتي وكل الناس عارفة ان دة مستحيل يحصل والا لازم تكوني نرجسية زيه وخصوصا اللي اتطلقت وبعدت عنه وحتى النرجسية لو مش اقوى منه برضه مش حتعرف تنتقم منه بطريقته اللي تودي جهنم ، طيب ليه ماننتقمش بطريقة مشروعة وترضي ربنا وماتحولكيش لنرجسية؟
هي دي الطريقة الأصعب والاطول بس الاضمن طبعا ومش حيكون مؤذي لكي ولا لاولادك خصوصا ، طيب ايه هو الانتقام دة نعمله ازاي ؟
حنشوف ازاي نكسب النرجسي في لعبته اللي عايشها معانا سواء مازلتي معاه في بيته او خلصتي منه واتطلقتي ،
تعالي كدة نشوف ايه اكتر حاجة تضايق النرجسي وتجننه ؟ انك تقولي لا ، يعني انك تخرجي من تحت سيطرته وانتي طبعا طول ما انتي ضعيفة وخايفة منه عمرك ما حتقدري تقولي لا ولا حتقدري تخرجي من تحت سيطرته ولو حاولتي حيضربك ومش حتعرفي تدافعي عن نفسك ، طيب تعملي ايه ، تبدأي طريق الانتقام من تحت خالص من اول سلمة ، تبدأي اول حاجة تخلصي من ادمانه وبعدين وانتي في الخطوة دي لازم لازم تشتغلي تبدأي أي شغل مهما كانت امكانياتك ضعيفة ودا انا متأكدة انه مش حقيقي لان النرجسي مستحيل يختار واحدة امكانياتها ضعيفة حتى لو مش متعلمة ومش معاها شهادة حتكون تاجرة شاطرة او طباخة ملهاش حل او خياطة موهوبة ،او فنانة ، يعني انتي عندك إمكانيات تشتغلي وتعملي فلوس ودي حتكون اكبر ضربة وأول ضربة تضربي بيها النرجسي انك يكون عندك فلوس واوعي تتنازلي عن شغلك مهما هددك ومهما عمل ، طيب اذا نجحتي في شغلك دة اول انتقام من النرجسي لانك بتهدمي اول أساس من أساسات اذلالك واعظمهم ،
الضربة اللي بعدها انك تتعافي من ادمانه لان ادمانه كمان هو أساس قوي من اساسات اذلالك وربطك بيه وتحملك للحياة البشعة معاه ، وأول ماتتخلصي أصلا من ادمانه هو بيعرف وبيحس انه بدأ يفقد السيطرة عليكي وبيبدأ يسألك مالك ايه اللي اتغير فيكي ولما متجاوبيهوش يبدأ هو ينتقم وشوية يحاول يرعبك وشوية يحاول يرجعك بالهوفرينج ، وهنا كمان ضربة ، كونك ترفضي الهوفرينج وتكملي في النوكونتاكت فدة ضربة قاسية للنرجسي بتقول له انه فقد سحره وتأثيره عليكي ، ودة طبعا بيشككه في نفسه وفي قدراته ويحسسه بالفشل وينشط شعوره بالعار ودة أسوأ إحساس ممكن يحسه النرجسي
طيب ايه كمان زي مابيقولوا تقطعي المية والنور ، يعني خدمة ووقود وعلاقة واثناء مانتي بتقطعيهم بتوريه انك فعلا فعلا رافضاه مش بتقطعيهم لمجرد تعاقبيه لا لازم تحسسيه انك مش عايزاه وانه مش كفاية كزوج ، ودة حقيقي وحاصل انتي مش بتفتري عليه
وايه اكبر خسارة ممكن يخسرها النرجسي؟
انتي ، انتي اكبر خسارة ممكن يخسرها النرجسي سواء ادرك دة او لا ، هو حيدرك انه خسر الوقود والخدمة والعلاقة الحميمة والسيطرة عليكي مش حيدرك انه خسر الحب والإخلاص والتفاني ، مش مهم يدرك المهم انه حيدرك انه خسر حاجة كبيرة تعب فيها سنين وهو عمال يهندل فيها لحد ماوصلت للي هو عايزه وفجأة ضاعت منه وحيضطر يعيد الكرة مع ماكينة جديدة طبعا مش بني ادمة
تفتكري انتي لما تسيبي النرجسي ولما يتلصص عليكي ويعرف اخبارك ويلاقيكي اشرقتي من تاني وبقيتي حد قوي وناجح وحققتي أحلامك اللي سرقها منك ، تفتكري حيتحسر ولا لا؟ مهما بين لك عكس كدة انا بقول لك والله بيموت من القهر ولو كان بدلك بملكة جمال الكون الا انه بيفضل يندم عليكي مش كشخص طبعا لا كآلة كانت شغالة كويس وهو ظبطها على مقاسه وخربت ولما رماها اشتغلت احسن مما كانت معاه ومش بس كدة دي كمان ممكن حد تاني ياخدها ويستخدمها غيره ودي بتكون الضربة القاضية وساعتها بيحاول يعمل لك مش هوفرينج لا لافبموبينج اقوى من اللي عمله في بداية الزواج عشان يمنعك تروحي تتجوزي غيره، اوعي اوعي تقعي في الفخ دة تاني
ها لسة حاسة ان دة انتقام مش كفاية ؟ لو انتي شايفة كدة تبقي مش فاهمة النرجسي كويس ولسة كمان متعافتيش ، خدي بالك التعافي انك تبقي لا بتحبيه ولا بتكرهيه لا مبسوطة منه ولا زعلانة منه كأنه حد ميت حد بيزعل او ينبسط من حد ميت؟

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress