معظم الاحلام او الأهداف تتحقق خارج البيت وهذا يتعارض مع النرجسي ؟
دة تعليق من تعليقاتكم على فيديو (ازاي تحققي اهدافك اللي منعك النرجسي من تحقيقها)
شوفي اللي انا افهمه وكل علماء النفس قالوه واثبتته الدراسات ان اللي عايز يعمل حاجة بيعملها وانتي مش محبوسة في سجن بلا شبابيك ولا نور ولا نت ولا موبايل ، انتي بتعلقي على فيديو على اليوتيوب وانتي بتسمعيني وانا في دبي وانتي في مصر او في الجزائر او في أمريكا ، يعني من كل بلاد العالم انتي تقدري تسمعيني وتشوفيني ، انتي معاكي نافذة على العالم انتي مش في سجن انتي وانتي قاعدة في تورقة بيتكم ممكن توصلي للعالمية شفتي احمد الغندور ( الدحيح ) ، شفتي كريم علي ، شفتي اليوتيوبر العالميين كلهم قاعدين في بيتهم وبيشتغلوا ، بلاش يوتيوبر النهاردة الجامعات كلها شغالة نت وبتمنح شهادات وبتعمل امتحاناتها نت ، بلاش الجامعات ، الكتب متاحة اد ايه ، بلاش التعليم ولا الدروس الدينية ولا تحفيظ القرآن ، الناس اللي بتتاجر ع النت ، الناس اللي بتشتغل في التسويق ع النت ، الناس اللي بتكتب مقالات وبتشتغل في الصحافة ع النت ، الناس اللي بتعمل اعمال يدوية وترضها وتبيعها ع النت ، شوفي مفيش حاجة النرجسي حابسني دة الخوف هو اللي حابسني مش النرجسي ، أصلا اليومين دول مفيش أحلام بتتحقق برة البيت بسبب الكورونا ، انتي جواكي خوف للأسف ولازم تتخلصي منه ولازم تعرفي نفسك وتفهميها وتعرفي امكانياتها ، اسألي نفسك كدة ايه الأهداف اللي برة البيت وشوفي لو انتي فعلا تقدري تخرجي حتحققيها ازاي واذا حاولتي تحققيها من البيت حتقدري ولا لا ، واذا مش حتقدري ايه اللي يمنعك تفكري في هدف في متناول ايديكي وتقدري تحققيه وتبدأي بيه وبعدين لما تنجزيه وتحسي انك قدرتي تنجزي حتلاقي نفسك اتولد عندك شعور بالثقة بالنفس وحتلاقي نفسك بدأتي تبقي قوية وحييجي وقت تقدري تقولي فيه لا لزوجك ولأمك لو كانت نرجسية او ابوكي النرجسي ولاي حد له سلطة عليكي وعايز يؤذيكي ، ومع الوقت حتلاقي نفسك تقدري تعدلي سلوك النرجسي او تقدري تسيبيه وتمشي اذا هو مؤذي فعلا نفسيا وجسديا ، اشتغلي على نفسك اكتر وتابعي الفيديوهات اللي بتعلمك ازاي تكوني نفسك وازاي تكوني قوية وبعدين حتشوفي انتي حتتغيري ازاي

انا حلم حياتي اتعلم السواقة وللأسف زوجي نرجسي وغيور وحابسني في البيت ولا يسمح لي اطلع من البيت أصلا فهل سأحقق حلمي يوما ما ؟ للعلم انا داخلة على سن الأربعين فهل فات الأوان ؟
انا عمري ٤٩ سنة مينفعش ليا شغل العمر فات في اهانات وتحكم من النرجسي والان عايشة لأولادي الشباب
الجزء بتاع الحلم خلاص قلت فيه مافيه الكفاية اما الجزء بتاع العمر هو دة اللي عايزة أتكلم فيه
جبت لك امثلة من النت وحقرأ لك اللي مكتوب في النت عنهم زي ماهو
ونستون تشرشل
تم اختياره كأعظم “بريطاني” على مر العصور، وصنفته “التايم” الأمريكية كأكثر القادة المؤثرين في التاريخ، رسب في اختبارات الفصل السادس الابتدائي، انهزم في كل الانتخابات التي ترشح فيها، كان يعاني من التلعثم نتيجة “لثغة” في الكلام أعاقته طوال حياته العملية..
لدرجة أن طاقم أسنانه الصناعية صمم خصيصاً لمساعدته في الخطابة بشكل سليم، أصبح رئيساً للوزراء وعمره 62 عاماً! وضعته الأقدار خصيصاً ليكون صاحب معجزة التصدي للجيش الألماني بقيادة هتلر وكان شعاره “لن نستسلم أبداً"”
من أقواله الشهيرة:
لا تيئس ، أبداً أبداً، لا تيئس من إعادة المحاولة للنجاح في أي شيء، صغيراً أم كبيراً، عظيم الشأن أو قليله

كولونيل ساندرز
صاحب سلسلة مطاعم “كنتاكي” الشهيرة، توفي والده وهو في السادسة، تركته والدته ليرعى إخوته الصغار أثناء عملها لإعالتهم، علمته أساسيات المطبخ، في السابعة كان قد أتقن عدة وصفات للطهي أشهرها الدجاج المقلي، في شبابه ولتردي حالته المالية عمل في مزرعة بدولارين في اليوم .
وخدم بالجيش، ثم كان عاملاً لتلقيم الفحم على قطار بخاري، فسائق مركب نهرية، لبائع، لبوالص التأمين، ثم درس القانون عن بعد، ومارس المحاماة لبعض الوقت، ثم باع إطارات السيارات وتولى إدارة محطات الوقود، قام ببيع الدجاج الذي يطهوه على المارة والعمال في الشوارع!
في سن 65 اضطر للتقاعد من وظيفته، كانت أموال المعاش الحكومي الشهري هي 105 دولار، لم يرض بذلك، وانطلق ليؤسس أول مطاعم دجاج “كنتاكي” الذي يتميز بخلطة تتكون من 11 نوعاً للتوابل، بعد مرور 12 سنة كان لمطاعمه 600 فرع في أمريكا وكندا، في سن 77 عاماً باع سلسلة مطاعمه ب 2 مليون دولار، اليوم عدد الموظفين العاملين في فروع كنتاكي أكثر من 30 ألفاً على امتداد أكثر من 100 دولة!
ابراهام لنكولن ، هنري فورد وغيرهم ادخلوا النت واقرأوا واعرفوا الناس دي ظروفها كانت ايه وبقوا ايه ، اخرجي من منطقة الراحة وبطلي تبكي على اللبن المسكوب وقومي انفضي نفسك وقرري تتغيري وابدأي بالتعلم وصدقيني ربنا حيساعدك لما تبدأي لكن مش حيساعدك وانتين ايمة او قاعدة تتفرجي ع الدراما وتعيطي ، ولا وانتي فاقدة الامل وانتي عندك رب قال لك ادعيني وانا حستجيب ، قولي لي عايزة ايه وانا حعمله لكي ، بس اوعي تنسي آداب الدعاء اللي أهمها انك متتعجليش الإجابة ، متقوليش انا دعيت وهو ماستجابش و دوري جواكي عن سبب عدم الإجابة ، ممكن انك معندكيش صبر ، ممكن انك مش متيقنة أصلا من الإجابة ومش مصدقة انه حيستجيب لك ، دوري جواكي ع المشكلة لان ربنا حاشاه انه يكدب علينا وهو قال اجيب دعوة الداع اذا دعاني مقالش المسلم ولا قال المؤمن ولا قال الصديقين ولا المقربين .

اخر تعليق بقى غاظني جدا ودعيت لها عليه في ردي عليها في الكومنتات

لما يصحيكي النرجسي من عز النوم عشان تعملي له شاي او أي طلب وانتي تعبانة ومجهدة ولو رفضتي بيغضب وبيزعق للعيال وكمان بتلوم على نفسها لان واجب عليها طاعته ولما توافقي وتقومي بتحسي بقلة الأهمية وان طلباته مقدمة على راحتها وصحتها ، ازاي اتصرف في الموقف دة ؟؟ 
مش حقول لك أي حاجة بعد كل اللي قلته غير انك لازم تتعافي منه ومن الخوف ولازم تتعلمي تقولي لا ،... باقي الكلام في اول تعليق