الله يسلط عليه... الله يسلط عليه... الله يسلط عليه.... انا النهاردة حصل حاجة خلتني اكره و اخاصم الدنيا كلها.. النهاردة يوم فيصل في حياتي... من النهاردة انا حد تاني و شرير و وحش جدا.. كل الفيديوهات والحكايات حصلت كلهاااااا في ساعة واحدة... جبت عمري كله قصاد عيني زي شريط السينما... لقيت اني غبييييية... غبية فوق الوصف... و عبييييييطة عبيطة جدا... و عرفت ناس جديدة و خاصمت ناس قديمة... و طلعت و نزلت و نمت و قمت و كل حاجة في الحياة حصلت في ساعة...فهمت يعني ايه ضاقت عليهم الأرض بما رحبت... فهمت حاجات كتير اوي ورا بعض و بسرعة... و عرفت اد ايه انا ذكية اد ايه انا واضحة اد ايه انا جميلة... بس النسخة المعدلة الجديدة الشريرة ستبدأ الآن... والعون على الله
دة جزء من تعليق علي فيديو امبارح ايه أسباب ضعف سلاحك ضد النرجسي من ضحية وصلت من التعافي لمرحلة كويسة جدا وكانت كل يوم تكتب تعليق ، "بحبك وانقذتي حياتي " وطبعا تعليقها دة كان بيصبرني على الم ظهري وانا قاعدة طول النهار ع المكتب اما اقرأ واترجم او بكتب ع اللاب عشان احضر وانزل الكلام في صندوق الوصف وكنت لما اقرأ تعليقها هي وكل الناس اللي بتقول لي انهم استفادوا كنت بحس بطاقة ورضا وأقول الحمد لله تعبي مش ع الفاضي ومهما تعبت بيكون عندي طاقة استمر عشان الزوجة دي وعشان غيرها وزيها كتير جدا ، وأد ما كان تعليقها بيديني طاقة وقوة وامل واحساس بالانجاز طبعا ، اد ماتعليقها امبارح احزنني جدا عشانها بس انا عارفة انها حتعدي الموقف وحترجع تاني انا متأكدة ،
انا عايزة أقول لها ان الفيديو دة مخصوص لها ولكل زوجة بتتوجع من موقف غبي بيعمله انسان غبي اعمى البصيرة لابيسمع ولا بيشوف ولا بيفكر وان بدا لكم وللناس بيسمع وبيشوف وبيفكر .
عايزة أقول لك انتي فعلا ذكية ،وجميلة داخليا ودة المهم ، قلبك جميل ونظيف والقلب النظيف محل نظر الرحمن فينه هو(النرجسي) من الكلام دة قلبه موضع نظر مين ؟، انتي قوية مهما اتعرضتي لمواقف واستغلال وإساءة ادب ومهما اتصدمتي ومهما اتعلمتي بالام والوجع والقسوة الا انك برضه قوية ، الا انك برضه بطلة لانك قادرة تتعايشي مع شخص مضطرب ونص تصرفاته مؤذية سواء مقصودة او لا مش مهم المهم انها مؤذية ، كونك قدرتي تستمري في الوضع دة سنوات فدة معناه انك بطلة وانك قوية وتقدري تغيري الوضع دة وتقدري تسيطري ع الكائن الضعيف اللي انتي عايشة معاه لانه فعلا ضعيف وهش مهما ادعى القوة ومهما زعق وغضب وكسر الدنيا فهو بيعمل دة لانه ضعيف والمهم انه بيعمل دة عشان حاسس بالضعف ادامك وحاسس بالعار لانه اقل منك واضعف منك وجاهل وانتي عندك معرفة وغبي وانتي ذكية وجبان وانتي شجاعة ومش بيعرف يحب وانتي كلك حب ومشاعر ، ومش محبوب وانتي مفيش حد بيعرف الا وبيحبك ، انتي الأقوى صدقيني ، ححكي لك موقف حصل مع حالة ، هي زوجها نرجسي خفي نتيجة اختبار فيديو الثلاثين سؤال كانت ٣٠ من ٣٠ ، يعني نرجسي بجدارة ومتفوق ومسيطر جدا ، المهم هي خلصت فيديوهات التشافي وتعافت تماما بفضل الله وهي بتقرأ وكمان عملت التفريغ الوجداني من كتاب دكتور فيل (اهتم بذاتك) هي الحقيقة مثقفة أصلا وبتشتغل صحفية يعني محبة للقراءة ودة اكتر حاجة ساعدتها ع التشافي ، المهم الحالة دي طبقت كل الكلام اللي بقوله في الحلقات في التعايش وفي التلاعب بالنرجسي ، وقدرت تفهَمه كويس وتلعب بيه كويس وبدأت تعالجه بنفسها وتفَهِمه من غير ماتواجهه ولا تقول له انت نرجسي ولا أي كلام كانت بتوجهه بذكاء وحكمة وفي نفس الوقت بدأت تقف قصاده ولما يهددها بالطلاق تقول له تمام كدة كفاية ننفصل بقى وطبعا كان بيتراجع ، وبدأ يعدل سلوكه معاها ، وفي اخر موقف طبعا بعد التحسن العظيم اللي حصل في سلوكه ، حصل منه موقف سيء وزعق فيها ادام أولادهم فعملت ايه ؟ ولا تعليق وصمت عقابي ثلاث أيام ثالث يوم هو عمل غضب نرجسي لانه مستحملش صمتها وخاف وطبعا هاجمها وهي اثناء الغضب التزمت الصمت فيما عدا انها قالت له اذا متكلمتش بشكل اكتر احترام انا حمشي من ادامك ، تخيلوا بعد الدنيا ماهديت قال لها ايه ؟ ليه مقلتيش انك زعلانة. بعد كدة عاتبيني في ساعتها قالت له ادام الأولاد قال لها اه اهون ماتسيبيني كدة ، وفي وسط الكلام قال لها اوعي تسيبيني متسيبينيش ، بدون مناسبة قال كدة دة دليل على ايه ؟ على ضعف ولا قوة ، هو ضعيف لكن ضعفه بالنسبة لضعفك قوة ( انا طويلة لكن لما اقف جنب ابني بكون قصيرة لانه أطول مني بكتير) فهمتي ؟ لما هي بقت قوية ظهر ضعفه وبانت الحقيقة بوضوح
هل انتوا شايفين ان قوتها دي شر ؟ دي مشكلة المتعاطفة انها بتتخيل انها لما حتاخد حقها من الشرير حتكون شريرة لا ياحبيبتي انت حتكوني شريرة لو ما اخدتيش حقك ، شريرة مع نفسك وحتكوني شريرة مع اطفالك غصب عنك لانك حتكوني عصبية وحتكوني معاهم فعلا شريرة
حبيبتي المجروحة الموجوعة المظلومة ماتخاصميش الدنيا ولا تستني الموت ربنا خلقك عشان تعيشي الحياة وعشان تسعدي فيها ، ربنا بيحبك وعايز لك الخير ، صدقي ربنا واوعي تصدقي الشيطان ، اهدي واستهدي بالله وقولي لاحول ولا قوة الا بالله ، قولي لا اله الا انت سبحانك اني كنت من الظالمين ، قولي " اللهم اكفنيهم بما شئت وكيف شئت انك على ماتشاء قدير " كلمي ربنا وانتي ساجدة قولي له اللهم ارزقني حبك وحب من احبك وحب مايقربني لحبك ، عشان حب ربنا بيشفيكي من الام الدنيا كلها ،لا دة بيخليكي تستصغري اكبر المشاكل والالام والجروح ، حب ربنا اعظم دوا لجميع الألام النفسية
حَستني تعليقك ومش حنام غير لما تطمنيني عليكي ياصاحبة التعليق ، بس خدي بالك انا بنام بدري جدا بعد الفيديو ماينزل بنص ساعة تقريبا.


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress