تابع ازاي تكوني اقوى من النرجسي ؟

الحلقة اللي فاتت قلنا نقطتين ( كوني واعية لافكارك وطريقة تفكيرك ، وافهمي ان امر المؤمن كله خير) ، النهاردة حقولك ثلاث نقط كمان تكسبي بيهم القوة اللي مش موجودة عند النرجسي
٣- اتعلمي تكوني صانع قرار
يعني ايه يعني اتعلمي تاخدي قراراتك وقرارات بيتك واولادك بنفسك ، النرجسي مبيعرفش ياخد قرار ولما بياخد قرار بيكون غلط وبيودي في ستين داهية ، ودة سلاح لازم يكون في ايدك انتي
لازم تتعلمي تقرري يعني تتعلمي تختاري ، ماهو القرار عبارة عن اختيار حاجة من كذا حاجة وتنفذيها ، اتعلمي تختاري لنفسك وتقرري لنفسك وتفكري لنفسك ، اتعلمي تختاري اتجاهم في الحياة حتكوني صح ولا حتكوني غلط ، حتاخدي جانب الحق ولا الضلال ، القوة ولا الضعف ، الاستكانة والكسل ولا الاجتهاد والعمل ، الطاعة ولا المعصية ، انام طول النهار واسهر طول الليل ع النت ولا اعدل يومي واصحى بدري اخد بركة البكور واشتغل واكون انسان مفيد للبشرية ولو حتى مفيد لاولادي بس ، اقرأ واتعلم وامتلك قوة المعرفة ولا اضيع عمري في التليفون والشكوى والرغي اللي ملوش أي فايدة ، احفظ قرآن او اقرأ قرآن واتعلم ديني ولا اضيع عمري ادام التلفزيون واقعد في الكافيهات اشيش عشان استمتع زي العالم اللي حوالية ، كل دي اختيارات انتيب تختاري يعني بتقرري ، شوفي حياتك ماشية ازاي وقرري انتي عايزة تمشيها ازاي وقرري حتعملي فيها ايه ونفذي ، اتعلمي تختاري ومتكونيش ريشة في مهب الريح الريح توديكي مكان ماهي عايزة توديكي . متسيبيش نفسك عايشة في الدنيا بلا هدف ولا اتجاه وعمالة بتلقي حوالين واحد مريض ومش مكتمل نفسيا ولا عقليا .
اذا عايزة تبرمجي عقلك عشان تكوني قوية لازم تختاري وتقرري دة دلوقتي حالا

٤- السعادة اختيار !!!!!!
ايه لا بقى انتي جاية تشتغلينا هو فيه حد بيختار يبقى تعيس يعني ؟ طيب الكلام دة ممكن نطبقه على كل الناس الا ضحية النرجسي خصوصا اللي مش حرة والنرجسي كاتم نفسها ومش مديها أي مساحة من الحرية ، شوفي انا اول ماسمعت الجملة دي ( السعادة اختيار) فكرت كدة زيك بالظبط لكن لما سمعت باقي الكلام لقيته منطقي جدا ولقيت انك تستحقي انك تسمعيه وتفهميه كمان كويس جدا ، شوفي ذكتور بول بيقول ان السعادة شعور بنحسه لما بنعمل حاجات معينة ، يعني لما نخرج نتفسح بنشعر بالسعادة لما بننجح بنشعر بالسعادة ولما بنمارس أي هواية بنشعر بالسعادة حتى لو كنا منكدين مثلا وعندنا مشكلة كبيرة بس لما بيحصل وننجح في أي حاجة بعيدا عن المشكلة بنشعر بالسعادة ولو لفترة لحد مانرجع للمشكلة ونحاول نحلها مش نعيشها ، المهم طيب كل الحاجات اللي بتجلب السعادة دي احنا نقدر نعملها ولا ؟. طيب حقولك المثل اللي قاله دكتور بول ، قال مثلا انه بيكون سعيد جدا وهو بيعزف البيانو والناس بعد مابيخلص عزف بتيجي تقوله رائع ياريتني اقدر اعزف زيك ، طيب هو انتي ايه اللي حايشك ماتعزف ، لا ما هو انا مبعرفش ماتعلمتش اعزف ، العزف دة عايز ايه تعليم ولا تدريب ؟ العزف عايز تتعلم وتعرف ازاي تعزف وبعدين لازم تتدرب عشان تحفظ وتتدرب كتير عشان تعزف حلو وتحس بالسعادة وبالنجاح ، أي حاجة بنعملها في الحياة بتسعدنا لازم نكون تعبنا عشان نعرف نعملها حتى الاكل لازم نتدرب ع الطبخة كذا مرة عشان نتقنها وتطلع حلوة ونتشهر بيها مثلا والناس تقول الا ملوخية فلانة والجملة دي بتسعدك ولا لا ؟ أي انجاز في حياتك بيجلب لكي السعادة واي انجاز محتاج منك مجهود والمجهود محتاج منك قرار لازم تختاري وتقرري انك حتبذلي مجهود في التدريب او المذاكرة او القراءة او تربية اولادك او التغلب ع النرجسي او أي حاجة في حياتك عايزة تحققي فيها نجاح لازم تحتاري تعملي فيها مجهود عشان تحصلي منها على السعدة ، يبقى انتيب تختاري السعادة ولا لا ، لما بتختاري تنامي وتكوني كسلانة ومبحبش القراءة ومليش مزاج وتختاري منطقة الكمفورت زون فانتي بتختاري التعاسة ،
السعادة اختيار لكن مش كفاية انك تختاري تكوني سعيدة لان الاختيار لوحده مش حيخليكي سعيدة لازم كمان تختاري تبذلي مجهود عشان تحصلي على السعادة
اختاري تكوني سعيدة ، واختاري تتعبي على نفسك وادخلي دلوقتي افتحي سلسلة التشافي وسلسلة الثقة بالنفس واسمعي ، ونزلي كتب واقرأي وعالجي نفسك من صدمة النرجسي حتلاقي نفسك بتخرجي من سجنه بالتدريج وحتتفاجئي انك بقيتي شخص تاني شخص قوي ومش بيخاف من النرجسي لانك حتكوني اقوى منه
٥- خططي دايما حتعملي ايه لو حصل انتكاسة ؟
طبيعي جدا ان أي حد بيعمل أي حاجة مستحيل يفضل ناجح طول الوقت ومفيش أي تراجع يحصل معاه مستحيل ، لان احنا بشر ومش كاملين وعندنا نقص في حاجات كتير ولازم يحصل عندنا انتكاسات وتراجعات ودة طبيعي جدا ، انتي مثلا ممكن توصلي للتعافي وتبقي تمام وبعدين تكتشفي خيانة النرجسي فيحصل عندك انتكاسة وترجعي تجتري تاني وتحزني تاني ودة طبيعي جدا لكن المهم هنا انك حتتعاملي ازاي مع الانتكاسة دي ؟ هل حتستسلمي وتحزني وترجعي تاني لنقطة الصفر ولا حتقومي وتفوقي وترجعي تاني تعالجي نفسك وتسمعي الفيديوهات اللي بتحسي انها بتحفزك وتقويكي عشان ترجعي لنفسك تاني؟ ، لازم يكون عندك خطة للانتكاسة ، ولازم تكوني فاهمة ان الفشل والانتكاسات والتراجعات من صفات البشر ودي حاجات طبيعية جدا ولازم تحصل ومينفعش تصدمك ولازم تعرفي حتعملي ايه لما تحصل عشان متنهاريش ولا تضعفي وتحافظي على قوتك


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress