الإحساس بالذنب ولوم النفس وضحية النرجسي

حياتك مع النرجسي بتتركز على اخطائك والنتيجة انك بتلومي نفسك على كل حاجة
دي غلطتي – جملة الأغلبية العظمى من الحالات بتقولها بصفة مستمرة ودائمة
ليه ؟ لان حياتك مع النرجسي وحواره معاكي عبارة عن : انتي غلطتي في الحاجة دي ، انتي مكنش مفروض تعملي دة ، انتي معملتيش دة ليه ، انتي ازاي تعملي كدة او انتي ازاي تعملي كدة ، انتي فيكي حاجة غلط
في الحالة دي انتي في بداية العلاقة كنتي بتحاربي وتتخانقي وتدافعي عن نفسك طول الوقت وتشرحي وجهة نظرك وتشرحي نفسك ومشاعرك طول الوقت وتحاولي تفهمي النرجسي انك متقصديش او ان نيتك كويسة لكن للأسف النرجسي كان بيكسب الخناقة في كل مرة لانه متمرس و قاصد اللي بيعمله انما انتي مش مدية خوانة ولا فاهمة أصلا انك في معركة ، وطبعا كان بيحاول يقنعك انك غلطانة ولو ماقتنعتيش بتتعبي وتسكتي او بتروحي للحل التاني من غير حتى ماتعرفي انك روحتي له ، اللي هو ايه الحل التاني بقى ؟ انك تلومي نفسك ، عند نقطة معينة بدل ماتستمري في المعارك مع النرجسي بتلاقي نفسك بدأتي تلومي نفسك وتبدأي تعتذري له وتتأسفي وتبرري انك ماقصدتيش ،..... وشوية شوية بتلاقي نفسك بتتأسفي طول الوقت لكل حد ولاي حد ، بلاحظ حالات كتير بتتأسف لان النت قطع او لان الصوت واطي او اسفة ضيعت وقتك ، او اسفة تعبتك ، اسفة كتير كتير أي حاجة مش هي السبب فيها والاقيها دايما شايفة ان هي اللي غلطانة دايما وابدا
اللي بيحصل انك بتقتنعي فعلا ان كل حاجة غلطتك ، على مستوى اللاواعي طبعا انتيب تتجنبي المعارك السامة بتاعة النرجسي وفي نفس الوقت شايفاه طيب وحنين وبيحبك خصوصا في اول العلاقة ، (تنافر معرفي) فبتكون النتيجة انك انتي اللي غلط والعيب عندك ويصبح لوم النفس والاحساس بالذنب سمة من سمات شخصيتك
خدي بالك ان الجاسلايتينج اكتر حاجة بيعملها النرجسي قيكي تخليكي تلومي نفسك لانه أصلا بيقنعك ان انتي اللي غلطانة او انك بتنسي او ان فيكي حاجة غلط وبيصر على كلامه بمنتهى الثقة والثبات الانفعالي ودة بيضعفك طبعا
لما بتكوني في مرحلة الصدمة او في حالة رابطة الصدمة (حلقة رابطة الصدمة) في الحالة دي بيكون لوم النفس جزء لصيق بضحية النرجسي وبيكون حاجة بتسهل عليها انها تلتمس الاعذار للنرجسي عشان تستمري معاه ،تحمي العلاقة بدل ماتحمي نفسها
طيب تعملي ايه عشان تخلصي من اللوم دة
١- دايما تسألي نفسك ايه اللي بيحصل وهل انا مسئولة عنه ؟ وايه مسئوليتي ؟ قبل ما تعتذري او تلومي نفسك ، وهل حد مسئول عنه أصلا ولا قدر ربنا
٢- اذا انتيب تتواصلي او يعني بتتحاوري مع حد (النرجسي بالاخص ) عن أي حاجة مش عاجباكي فهل الاخر دة بيسمع لك هل هو متجاوب معاكي في الحوار ، وهل بيتحمل او حيتحمل مسئوليته وطبعا الإجابة لا لانه نرجسي في الحالة دي انتي متكمليش الحوار وقفي الكلام وادي نفسك دقيقة تفكري ، كل واحد حيشيل مسئوليته في الموقف انتي لكي جانب وهو له جانب وانتي مش حتشيلي مسئوليته مش حتشيلي الجزء بتاعه سواء هو اتحمله او لا
٣- اذا انتي المسئولة عن الغلط وانتي غلطانة اعتذري طبعا لكن اذا انتي ملكيش أي علاقة باللي حصل ومفيش أي غلطة عملتيها متقوليش ولا حرف انتي عارفة انك مهما قلتي مش حتوصلي لحاجة مع النرجسي لانه مش حيغير تصرفه وانتي حتواجهي هجوم شديد منه بلا أي فايدة ، اسألي نفسك هل الكلام حيكون مفيد ولا لا ،طبعا اللي تعرف تاخد حقها يبقى تمام لكن اللي متعرفش تسكت ولا تعتذر ابدا
كمان الندم بيولد اللوم والاحساس بالذنب (لو مكنتش اتجوزته ، لو كنت سمعت كلام امي ، ياريتني ماصدقته ،..... ) كل دة لازم توقفيه وتفهمي ان كان فيه أسباب كتير خلتك ترتبطي بيه وتحبيه وتصدقيه ، واللي حصل حصل وخلص دلوقتي لازم نصلح نفسنا ونبطل نلوم نفسنا لان دة بيضعفنا ويضيع بقيت حقوقنا اللي باقية
اذا سمعتي الفيديو ومعرفتيش تبطلي تلومي نفسك وتحسي بالذنب يبقى شوفي سلسلة الثقة بالنفس . وكمان شوفي حلقة ( ازاي تكوني اقوى من النرجسي ) حتنزل بكرة ان شاء الله


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress