ازاي متسمحيش لحد انه يستغلك ؟

سواء كان النرجسي او غيره واذا كنتي خرجتي من العلاقة مع نرجسي ازاي متقعيش تاني في علاقة مشابهة ؟
١- اكتر حاجة تخوف النرجسي او أي شخص مستغل هي ان الشخص اللي معاه يكون واثق من نفسه زي ماقلنا في حلقة اكبر عدو للنرجسي ، قلنا في الحلقة دي ليه هو بيخاف من ثقتك في نفسك ، فدي اول حاجة لازم تكتسبيها عشان تمنعي أي حد من استغلالك ، لانك لو واثقة من نفسك محدش حيعرف يضحك عليكي ولا يقنعك تعملي حاجة انتي مش عايزة تعمليها عشان ترضيه لانك مش محتاجة رضى حد غير ربنا ورضاكي عن نفسك وبس
٢- حطي حدود لنفسك ، سواء حدود مادية او معنوية والاتنين على نفس درجة الأهمية ، يعني ايه مادية يعني انك تكوني محددة دايما لنفسك وللي ادامك ايه اللي تقدري تساعديه بيه سواء مساعدة مادية او أفعال تستدعي مجهود بدني ، يعني مثلا انتي بتشتغلي وزوجك عايزك تشاركي في مصروف البيت (دة في حالة انه غير مقتدر) فانتي لازم قبل ماتتفقي معاه تكوني حاطة لنفسك بدجت او حد معين انتي حتساهمي بيه وانتي اللي تقرريه مش هو ، لازم تكوني مقررة أصلا انتي ناوية تساهمي بكام في المية من راتبك ، ولو وارثة او عندك أي ماديات لازم تكوني حاطة لنفسك حد اقصى للتبرع او للمساعدة . كمان لو انتي ساكنة في بيت عيلة ومطلوب منك مساعدة حماتك اذا انتي عندك الرغبة في مساعدتها وهي فعلا محتاجة للمساعدة لازم تحددي الوقت اللي تقدري تساعدي فيه على أساس ظروفك وامكانياتك ومسئولياتك ، وكذلك مع اهلك واخواتك ، لازم تكوني محددة انتي حتساعدي ازاي ووقت اد ايه او مال اد ايه وانتي نفسك لازم تلتزمي مع نفسك بالحدود دي .
٣- لما اللي ادامك يطلب بزيادة وتبدأي تحسي ان فيه نوع من الاستغلال ممكن توقفي دة بشياكة ، ازاي ؟ تقولي حاضر حعمل دة لكن مش دلوقتي وتحطي الوقت اللي يناسبك ، او حعمل دة في مقابل انك تعمل الحاجة الفلانية بدالي ، يعني النرجسي دايما يرمي عليكي مسئولياته وكل ما قبلتي كل مازود ، فمثلا حيقول لك ودي الأولاد التمرين النهاردة ممكن تقولي حاضر بس انت حتوديه في دوري المرة الجاية ، يعني مفيش عطاء بدون مقابل لانه حيكون تنازل وحيفتح الباب انك تشيلي المسئولية بالكامل بعد كدة ، زي قصة الزبالة المفروض انه بياخدها وهو نازل مثلا وييجي مرة يقولك معلش خديها في ايدك لو اخدتيها بدون مقابل حييجي تاني يوم يلاقيكي ما اخدتيهاش حيسألك ليه ما اخدتيش الزبالة معاكي ، هنا لازم تردي بمنتهى الوضوح ان دي مسئوليتك وانا اخدتها عنك مرة من باب الذوق لكن مش حاخدها عنك بالكامل ، لازم تكوني واضحة جدا في الحاجات دي لانك لو سيبتي للنرجسي مش حيعمل أي شيء في الحياة ، واذا كنتي فعلا وصلتي معاه لكدة فممكن ترجعي له مسئولياته بالتدريج بنفس طريقته ، النهاردة خد الزبالة في ايدك لو سمحت وبكرة انتي مخدتهاش ليه معاك ، وهكذا تقدري ترجعي له كل مسئولياته بذكائك مع شوية وقود إيجابي وخصوصا النرجسي الخفيف والمتوسط أحيانا
٤- اتعلمي تقولي لا لما تكوني عايزة تقولي لا وخصوصا في المسائل الخاصة جدا وخصوصا مع النرجسي وخصوصا في العلاقة الحميمة وخصوصا فيما يغضب ربنا ، اتعلمي تقولي لا مع كل الناس لان الانسان الطبيعي لازم يكون فيه أوقات يقول فيها لا ولما تكوني واثقة من نفسك حتعرفي تقولي لا وانتي مبتسمة وثابتة انفعاليا ومش خايفة من رد فعل اللي ادامك ولا خايفة على زعله لان هو ميستاهلش تخافي على زعله اذا كان عايز يستغلك ، واتعلمي تقولي لا بدون شرح لان من حقك تقولي لا بدون ابداء أسباب لانك انسان وربنا كفل لك مساحة كافية من الحرية اللي بيها تقدري تقولي لا بدون أسباب ، مش عايزة عشان مش عايزة من غير ماتشرحي نفسك ولا تشرحي مشاعرك
٥- متحاوليش تعلمي المستغل ولا تفهميه انه بيتصرف غلط لانه ممكن يكون أصلا تعليمك له فتح باب لاستغلالك وطبعا خصوصا النرجسي ، ممكن يتلاعب بيكي اذا حس انك عايزة تعلميه او تفهميه او تعالجيه زي ماقلنا قبل كدة ، سيبيه هو اما يتعلم من اخطاؤه او ميتعلمش أصلا مش مشكلتك


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress