انا تعافيت ومبقتش مدمنة النرجسي لكن لما بيخون برجع تاني لنقطة الصفر

ازاي تواجهي خيانة النرجسي وتتخلصي من وجع الخيانة وتتجاهليها أصلا
قبل ما اجاوب السؤال عايزة أقول اني مش بقول لك تعايشي مع الخيانة ولا استمري مع الزوج الخاين لكن بقول اللي مجبرة تستمر مع النرجسي بسبب ظروف قهرية سواء مادية او غيره لازم تتعامل بالطريقة اللي حقولها :
أولا لازم تفهمي ليه الخيانة موجعة ؟ لانها بتسبب احساسك بإنك :
١- انا مش كفاية كزوجة ، انا مش مالية عينه ، انا مش عارفة اشبعه ، اكيد انا لو كنت احلى مكنش بص لغيري ، لو كنت اغنى ،لو كنت تعليمي اعلى ، لو كنت ناجحة في شغلي ، لو كنت مش بشتغل ، لو كنت بشتغل ، لو كنت اقوى. ،لو كنت اذكى ، لو كتييير جدا
٢- هو مش بيحبني ،لو كان بيحبني مكنش بص برة ، هو أصلا محبنيش زي ما بحبه ، هو كان بيحب اللي قبلي وهي حبه الأول والأخير وانا تحصيل حاصل ،....
٣- الخوف من فقدانه ، خايفة يروح منك ، خايفة تاخد منك نصه او كله ، خايفة ع الماديات ، خايفة على حقوقك ، خايفة خايفة خايفة
الثلاث حاجات دول يهدوا أي حد ويحزنوا اقوى واحدة مهما كانت جميلة وذكية وغنية و .....
طيب ازاي نواجه الكلام دة ؟
١-اول نقطة النرجسي بيخون عشان هو مضطرب ومش طبيعي مش عشان انتي مش كفاية وانتي عارفة كدة كويس لكن انتي مش مصدقة ان انتي كفاية ومش مصدقة انك جميلة قلبا وقالبا انتي مش مصدقة ولا مؤمنة بكفائتك ولا بقيمتك ولا بنفسك ، يعني انتي ثقتك بنفسك مهزوزة او معدومة ، طيب يعني لو قويتي ثقتك بنفسك مش حتهتمي بخيانة النرجسي؟ ايوة بس مش بس ثقتك بنفسك ، لسة حنكمل بقيت الثلاث حاجات ، طيب حتقوي ثقة بنفسك ازاي ؟ تابعي سلسلة حلقات الثقة بالنفس حتنزل قريب ان شاء الله
٢- احساسك انه بيخونك عشان هو مش بيحبك وانك ماتستاهليش انه يحبك ولو كان بيحبك مكانش خانك وكل الكلام دة يبقى انتي لسة مدمناه ومش فاهماه لو لسة بتتسائلي بيحبك ولا لا وبيخونك عشان مش بيحبك يبقى لسة مش فاهمة النرجسي كويس لانه زي ما قلناا هو مش بيستخدم مشاعره أصلا يبقى حيحبك ولا حيحب غيرك ازاي ؟ اللي بتقول انا تعافيت لكن الخيانة بترجعني لنقطة الصفر ، هنا المشكلة مش في التعافي ولا في الخيانة المشكلة انك ما استبدلتيش علاقتك بالنرجسي بعلاقة صحية نقية ، قربي من ربنا وجربي حب ربنا وانتي حتستغني عن حب العالم كله ، اقرأي عن سيدنا النبي واعرفي صفاته عشان تحبيه ، عارفة ان فيه ناس بتقول في نفسها ازاي الحب الروحاني لربنا ولا لسيدنا عليه الصلاة والسلام حيعوض حب الزوج ، شوفي احنا أصلا محتاجين حب وفقط مش أي حاجة تانية انتي محتاجة تحسي ان حد بيحبك وبيراعيكي وبيحس بيكي وبيفهمك وودة كله حتلاقيه في حب ربنا لكي وهو فعلا بيحبك بس انتي مش شايفة حبه زي ما النرجسي مش شايف حبك ، ليه عشان انتي مشغولة بالنرجسي زي ماهو مشغول بنفسه ، ربنا بيحبك ولو قربتي منه واطعتيه ونفذتي أوامره حتشوفي حبه وحتحسيه ، وكمان سيدنا النبي عليه الصلاة والسلام لو عرفتيه صح وكل يوم تسلمي عليه تفتكري مش حيعرفك ومش حيحبك ومش حيزورك ويطبطب عليكي ، طيب الموضوع دة صعب عليكي ومحتاجة وقت شوية عشان تعمليه دوري ع البشر شوفي صديقة وفية ، اخت محبة ، ام مش نرجسية ، بنتك او ابنك لو مفيش بني ادمين ربي حيوان اليف وحتشوفي حيحبك ازاي وانتي حتحبيه ، المهم انك لما بتحاولي تتخلصي من ادمان النرجسي بتلاقي عندك فراغ عاطفي بيرجعك تاني او يخليكي عندك امل ان النرجسي يشوفك في يوم من الأيام زي ماهو بيشوف اللي برة او بيشوف امه او اخته ، عايزة أقول لك انه مش بيشوف غير نفسه وبس والمفروض انك ميكونش عندك أي امل فيه ولازم تفهمي انه مش بيحب أي حد مهما قال ومهما مثل ماتصدقيهوش . لو وصلتي لعلاقة صحية شرعية فيها حب غير مشروط ، عمرك ماحترجعي لنقطة الصفر تاني ، ممكن تزعلي شوية على شكلك ادام الناس واحساسك بالهزيمة وتزعلي على عمرك اللي راح معاه وكل دي حاجات عقلية مش قلبية وحتاخد وقتها وتروح وحالات كتير قدرت توصل لكدة ، المهم انك لما تعرفي انه خاين لازم تشتغلي لازم تعملي لنفسك مصدر رزق لانك مش حتقدري تواصلي الحياة بالشكل دة وكمان هو ممكن جدا يسيبك احتمال يبقى لازم تكوني مستعدة ، لازم تشتغلي .
٣- الخوف ، ودة له حلقة ( اكبر عدو لضحية النرجسي ) شوفي الحلقة دي عشان تعرفي تتخلصي من الخوف من فقدانه والخوف لا واحدة تاخده منك ، وتأكدي ان خوفك ملوش أي معنى لان لو ربنا كاتب. له يتجوز حيتجوز ولو كاتب يسيبك حيسيبك كله قدر ولو فوضتي امرك لله وتوكلتي عليه حترتاحي من الخوف دة تماما ، ولو توكلتي على الله مش حتخافي على رزقك بس اجتهدي وكوني متأكدة ان ربنا حيساعدك وحيرزقك بأي طريقة .
ركزي كويس في الكلام اللي قلته واسمعي الحلقة دي كويس عشان تقدري تخففي عن نفسك وجع الخيانة ، أصلا لو انتي فهمتيه صح حتتمني لو يروح يتجوز ويريحك منه شوية .

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
صفحتي الخاصة
https://www.facebook.com/kawthersanad1.wordpress