ازاي تتخلصي من الشخصية الاعتمادية
أولا لازم تعرفي انك محتاجة وقت ومجهود عشان تغيري نفسك من شخصية اعتمادية لشخص متعاطف بشكل صحي ومحتاجة فعلا تشتغلي على نفسك كتير
١- اول حاجة لازم تمتلكي افكارك ومشاعرك وآرائك ومتتنازليش عنها ومتعتنقيش أفكار غيرك واراء غيرك ، ولازم ترفضي فكرة انك المنقذ لانه مش دورك ولأنه كان سبب انك تظلمي نفسك ، ارفضي فكرة ان مساعدة الغير اهم من مساعدة نفسك وانك اخر اولوياتك ، انتي مفروض تكوني نمرة واحد عند نفسك ، غيري تعريفك لنفسك جواكي قرري ترفضي الهوية اللي انتي خلقتيها جواكي ضد الطبيعة وضد الفطرة اللي ربنا خلقها ، اللي هي انا اخر واحدة المهم انتم ، دة مش حاجة صحيحة ولا صحية الا في بعض المواقف اللي ممكن الاسرة تتعرض للخطر مثلا وواحد بيضحي بنفسه زي الأفلام ، بعض المواقف اللي مطلوب فيها الايثار وحب الغير ، لكن متكونش هي دي حياتك ،لانك بتلغي وجودك أصلا وبتكوني روبوت بيخدم الاخرين وبس وملوش طلبات ولا احتياجات وبعدين المهم ان مشاعره ميتة ، فمتوصليش نفسك لكدة ، خليكي عادلة وادي كل واحد حقه وأول واحد انتي
٢- اتعلمي متكدبيش ، ايوة انتي اكتر حد بيكدب على نفسه واحيانا ع اللي حواليكي ، ازاي ؟ طول الوقت تقولي حاضر وانتي عايزة تقولي لا ، تقولي موافقة وانتي مش موافقة ، مفيش مشكلة وهو فيه مشكلة عظيمة ، اه حقدر اعمل لك دة وانتي أصلا مش قادرة تاخدي نفسك ، بطلي تكدبي وقولي لا من غير ماتخافي من حكم الاخر عليكي (خدي بالك في العلاقة مع النرجسي انتي كدة كدة مش عاجبة ) ، حاولي تكوني حقيقية يعني ايه؟ يعني لما يعمل لك صمت عقابي وعارفة انه مش حيصالحك وعارفة ان هو اللي غلطان وانك مش غلطانة ومش مفروض تتأسفي له ولا تصالحيه يبقى مفروض تسيبيه يتفلق ومتروحيش تصالحيه لانك لما تروحي تصالحيه مش حتكوني حقيقية حتكوني بتكدبي على نفسك ، متصالحيهوش عشان ميفضلش كل شوية يعمل لك صمت عقابيويفرح وياخد وقود بمصالحتك
٣- اتعلمي تقولي لا ، اقرأي كتاب محمد طه لا بطعم الفلامنكو مهم جدا للي مبتعرفش تقول لا ، فعلا حتتعلمي منه تقولي لا ، على فكرة كلمة مكونة من حرفين لكن لها طعم فعلا ومتعة عظيمة لما تجربيها بعد ماكنتي محرومة تقوليها ( بس لو بيضرب متقوليش لا ، اعملي له محضر)
٤- لازم تبطلي تهتمي بأراء الاخرين ، لازم توقفي تصدقي رأيهم فيكي حتى لو إيجابي لازم تبني رأي لنفسك في نفسك يعني اقعدي اكتبي صفاتك وركزي وخليكي حيادية ومتكونيش ضد نفسك ولما تخلصي شوفي ايه الصفات اللي مش عاجباكي وحاولي تصلحيها وملكيش دعوة برأي حد ركزي انتي في رأيك انتي عن نفسك لانك طول مانتي بتعتمدي على الناس في تقدير نفسك وتقييمك حتفضلي مهزوزة لان الناس بتتغير وارائهم بتتغير وبتتوقف على المواقف اللي بتحصل منك من حيث الإفادة لهم ودة اكيد مش عدل
٥- بطلي تاخدي الاذن عشان تكوني نفسك ، وانتي مع النرجسي بتوصلي لمرحلة انك تاخدي اذنه في انك تفكري او انك تحسي انك تفرحي او تحزني وحقولك دة بيحصل ازاي ، دايما تسأليه انا حسيت بكذا تفتكر كان لي حق احس بكدة ؟ انا فرحت جدا هو انت فرحت زيي ، انا بفكر في كذا ايه رأيك التفكير دة صح ولا غلط ، طول الوقت بتحاولي تاخدي موافقته على أي وكل حاجة بتفكريها وتحسيها ، مبتعرفيش تحسي انك عندك حق تزعلي منه الا اذا اعترف لك انه غلطان وهو عمره ماحيعترف فتلاقي نفسك تلفي ع الناس تحكي لهم عشان يقولوا لك هو غلطان ويدوكي الاذن انك تزعلي او تغضبي ، بطلي تدوري على اذن حد عشان تحسي او تفكري ، صدقي نفسك وصدقي مشاعرك وتأكدي انك لما تلاقي نفسك رافضة تصرف من حد فدة عشان هو تصرفه غلط ، عودي نفسك تصدقي نفسك ومتستنيش حد يأكد لك صحة مشاعرة واحاسيسك وافكارك وممكن في الأول تحسي انك بقيتي عدوانية شوية بس مع الوقت حتبقي في الوسط بس انتي ابدأي
٦- اعتني بجسدك واحترميه وراعي ربنا فيه وبطلي تهمليه وكأنك بتنتقمي من النرجسي في نفسك (حالة كانت بتتمنى تموت عشان تنتقم من النرجسي وتحرمه من خدمتها ورعايتها مش عارفة انه حيجيب غيرها الصبح ، شوفي اد ايه الضعف ) وحالة بتتمنى المرض عشان تقدر تهرب منه وتروح لأهلها او تروح مستشفى ، شوفي انتي اد ايه بتؤذي نفسك ، دة غير انك بتخدمي الكل وتنهكي جسدك ودة عشان تنالي رضاهم اوعي تخدعي نفسك وتكدبي على ربنا وتقولي لوجه الله لانه لو لوجه الله مش حتعمليه على حساب نفسك لانك حتتسئلي عن جسدك ورعاية جسدك فرض ورعاية اللي انتي مش مسئولة عنه مش فرض ،اختبري نفسك وشوفي اذا بتعملي لوجه الله فعلا اذا كنتي بتراعي نفسك بما يرضي الله الأول
٧- اسمعي احساسك واتبعي حدثك ومتنسيش انك أصلا متعاطفة وعندك قدرات انك تحسي باللي حواليكي وتقرأي أفكارهم فلما تحسي بعدم الراحة مع حد متجبريش نفسك على البقاء معاه او التعامل معاه أصلا (باستثناء الزوج والاولادوالابوين طبعا) (والمقصود كمان لما بتعرفي حد جديد ومترتاحيش له احسن متكمليش ، سواء معرفة صداقة او عمل او شراكة او حتى جارة )
٨- مش مفروض اننا نتحكم في اراء الاخرين حتى لو كانت غلط ، فلما تقولي لا لحد توقعي وتقبلي ان رأيه فيكي حيتغير وهو حر في رأيه متخلي شدة يأثر عليكي وتتراجعي في االا اللي قلتيها لانك مفروض بدزتي تكوني هويتك الجديدة بناء على رأيك انتي بس
كمان لازم تكوني مستعدة انك لما حتقولي لا وتبدأي تحطي حدودك حتلاقي مقاومة كبيرة جدا من اللي حواليكي وغضب طبعا واولهم النرجسي
افهمي ان التعافي من الاعتمادية حاجة مش سهلة لانك حتواجهي اعتراضات كتير وصعوبات وعدم تقبل الناس اللي حواليكي المستفيدين منك ، كوني قوية وتقبلي الوضع الجديد واستحملي التعب والمعاناة عشان تكوني شخص سوي سعيد


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11