ليه المتعاطفة بتجذب النرجسي وبتستمر معاه ومش بيفرط فيها أصلا بسهولة ؟
المتعاطف بيحب يدي يدي يدي ودي طبيعته والنرجسي بيحب ياخد وياخد وياخد ودي برضه طبيعته ،
المتعاطفة دايما بتسامح النرجسي ودايما بتسيبه يهرب بعملته ومش بتحاسبه عليها والنرجسي بيلاحظ ويشوف اخر حاجة ممكن يوصل لها معاكي ، يعني بيفضل يضغط طول ما انتي بتوافقي لحد مايوصلك لنقطة النهاية يوقف ضغطه ، عشان كدة بنقول اللي بتحط حدود قوية من اول العلاقة بتعرف تسيطر على النرجسي
المتعاطفة بتفضل تعامل النرجسي بمنتهى الحب وبتنسى بسرعة الإساءة .
المتعاطفة عمرها مابتشوف علامات النرجسي في اول العلاقة (لانها بتشوفه بنظارة التعاطف ) مراية الحب عامية فعلا ، لانها متعاطفة ، ودايما شايفة ان أساس العلاقة بين أي اتنين بيقوم على العطاء والاحساس بالاخر والتواجد من اجله ودة المفروض صحيح جدا لكن في العلاقة مع اشخاص اسوياء مش مع النرجسي
المتعاطفة كمان عندها مشكلة كبيرة انها دايما بتدي النرجسي فرصة ثانية وثالثة ورابعة وميت الف فرصة ودة اللي بيطمع النرجسي اكتر ويخليه يزيد في الاستغلال والإساءة لانه ضامن ان فيه ميت فرصة تانية
المتعاطفة بتلتمس الف عذر للنرجسي وخصوصا لو عرفت تاريخ طفولته واحيانا بتحاول تعوضه وتعالجه وهو بيتلاعب بيها في الحتة دي ايما تلاعب
المتعاطفة بتكره فكرة ان مفيش امل في العلاج بالحب وبترفض الفكرة دي وبتحاول طول ماهي قادرة بتحاول تعالج كل اللي حواليها بالحب لكن للأسف مش دايما بتقدر
من كتر ما المتعاطفة بتدي للنرجسي فرص والنرجسي بيضمن انها مش حتسيبه ابدا بيصبح طفل مدلل فاسد ويتمادى في استغلاله واذيته لها وهي تديه فرصة تانية برضه
المتعاطفة بتشوف علامات النرجسية في حالتين بس ، لو رزقت بأطفال والنرجسي عاملهم وحش او لو النرجسي خانها


ازاي تتأقلمي مع كونك شخص متعاطف ؟ من غير مايحصل عندك تشويش وتكتئبي من كتر المعلومات اللي بتمتصيها من اللي حواليكي ؟ خصوصا النرجسي

١- اول حاجة انك تعرفي انك شخص متعاطف ودي طبيعتك وتقبليها وتحبيها
٢- تعرفي ان عندك القدرة على تجميع المعلومات عن اللي حواليكي بالاحساس فلما تقابلي حد لازم تكوني واعية ومدركة ان أي إحساس حيجد عليكي مش حيكون بتاعك ولا خاص بيكي دة إحساس جاي لك من الخارج فانتي مفروض تجمعي المعلومات اللي توصل لك من الإحساس دة ( يعني مثلا قابلتي صاحبتك وهي عندها هموم واحزان وانتي اول ما قابلتيها حسيتي بالنكد اللي هي فيه فانتي تركني الإحساس دة براكي وتاخدي منه معلومة ان صاحبتك في مأزق وعندها مشاكل وتركني المعلومة دي في ذاكرتك ) ليه عشان بعدين لما هي تيجي تحكي لك حتلاقي نفسك بتربطي كلامها بالمعلومات اللي عندك وتعرفي تساعديها ، المهم في الموضوع انك تدركي ان المشاعر اللي امتصيتيها منها مش بتاعتك
٣- مهم جدا انك تكتبي مذكرات يومية دي حتساعدك تفرغي باستمرار المشاعر اللي بتلقطيها من اللي حواليكي وتحافظي على المعلومات الكتير اللي بتحصلي عليها لان من كتر المعلومات حتحسي انك مع الوقت بتنسي فاحسن حاجة انك تكتبي
٤- اتعلمي توجهي مشاعرك للمكان والشخص الصح واتعلمي توقفي مشاعرك وتعاطفك وتتحكمي فيهم ، ودة حقوله لكي في حلقات منفصلة ان شاء الله


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11