مين اكتر شخصية بتعمر مع النرجسي وتستمر معاه عمرها كله وهي مش واخدة بالها انه بيؤذيها وبيدمرها عن قصد وكمان بتكون شايفاه طيب وكيوت ؟
اكثر شخصية جاذبة للنرجسي / مغناطيس النرجسي
اعرفي نفسك
هل انتي شخص متعاطف؟
يعني ايه تعاطف أصلا ؟ يعني تقدري تدركي مشاعر الاخر وتتفاعلي معاه وكمان عشان يكون التعاطف دة صحي انك تدركي مشاعر نفسك وتتفاعلي معاها
ازاي تعرفي اذا كنتي شخص متعاطف ؟
١- عندك حساسية عالية جدا لمشاعر الاخرين ، يعني لو حد محبط انتيب تحسي بالإحباط اكتر منه عشر مرات او اكتر ، لو حد حزين انتيب تحسي بحزنه برضه بشكل اكبر منه ، المهم انك بتحسي بدة من غير هو مايتكلم ولا يقول انه فيه حاجة أصلا ، انتي بتحسي ودة نوع من التواصل البشري اللي ربنا اهداه لبعض الناس اللي بيسموهم المتعاطفين ، لكن اذا معرفتيش تديري الهبة دي صح بتؤذيكي ،ليه؟ لان المتعاطف بيتأثر بكل الناس اللي في المكان اللي هو فيه ودة بيخليه دايما مضغوط واحيانا يحس انه مقبوض بدون أي سبب واحيانا يحس بالقلق فجأة ( خدي بالك هنا بنتكلم عن حد معندوش قلق مزمن ولا اكتئاب ولا عنده امراض نفسية ) اللي بيحصل ان المتعاطف بيمتص مشاعر اللي حواليه من غير مايقصد وبدون وعي هو ربنا خلقه كدة حساس جدا للمشاعر ، وكمان عنده القدرة انه يقرأ أفكار الناس ويحس بمشاعرهم حتى لو انكروها وكدبوا هو بيكون حاسسها ( هل انتي من الناس دي ؟)
٢- المتعاطف مش بيسمع بودنه هو بيسمع بوجدانه وبقلبه وبعقله ، دي مش مبالغة دي حقيقة هو بيستقبل المعلومات من اللي حواليه من غير مايكون عايز يستقبلها أصلا ، لو انتي مش عارفة انك متعاطفة حتحسي ان فيه حاجة غلط بتحصل معاكي وممكن تخافي تتكلمي عنها لانك حتخافي ان محدش يصدقك ، لكن دلوقتي مفروض تفهمي انك عندك هبة من ربنا والمفروض انك تديريها صح ،عشان متؤذيش نفسك ولا تؤذي حد ، كدة بقى تفهمي انتي ليه بتحبطي لما يكون فيه حد محبط في المكان اللي انتي فيه ، وليه معظم زوجات النرجسي اللي من نوع المتعاطف بتحس بالقبض اول مايدخل وبتحس بالنكد والحزن والقلق من مجرد وجوده في البيت حتى لو كان ساكت ومش بيؤذي ولا بيتكلم ، لكن لمجرد انه داخليا علطول محبط وعلطول حزين وعلطول مش راضي فدة كله بيتنقل للمتعاطفة الحساسة لمشاعر الناس ،
٣- لو انتي متعاطفة حتلاقي نفسك بتحسي باللي الناس بتحسه بدون تحكم منك يعني لو حاولتي متحسيش مش حتعرفي والمشكلة انك بتحسيه كمان بشكل مضاعف ، الموضوع ممكن يوصل للالم الجسدي ، يعني ممكن لو حد عنده مغص وماشتكاش وساكت انتي ييجي لك مغص او لو صداع ، انتيب تحسي بألم اللي جنبك ودة بيكون زيادة جدا في الحساسية وانتي مع الوقت والتدريب ممكن تتخلصي منه ،
٤- المتعاطف عنده قدرة على انه يساعد الناس انهم يفهموا نفسهم ويفهموا مشاعرهم ويقدر يعلمهم ازاي يفكروا ويعرف يحل لهم مشاكلهم هو في الواقع مرشد جيد جدا عشان كدة تلاقيهم ينجحوا جدا في المهام الارشادية زي التعليم والتدريب والمعالجة النفسية والسلوكية والإرشاد الاسري واللايف كوتشينج والاستشارات بجميع أنواعها ، المتعاطف بيعرف يساعد الناس انهم يفهموا المعلومات الكتير اللي بتوصل لهم ويرتبوها ويتعاملوا معاها ويستفيدوا منها
٥- المتعاطف عنده شغف غير طبيعي بمساعدة الناس بيستمتع بالعطاء والمساعدة ، وسريع الاستجابة للمستغيث يعني زي مابيقولوا بيغيث الملهوف ودايما اللي يحتاجه يلاقيه متاح في أي وقت وفي كل وقت وعلى حساب نفسه ودة عيب طبعا فيه ،
، كمان بيحب الطبيعة وبيستغرق في التأمل في جمالها ، غالبا بيكون روحاني ومتطلع للروحانيات والتدين بشكل وسطي جدا لانه ميعرفش يتشدد ولا يتعصب لفكر ، المتعاطف بينشد المثالية دايما
٦- المتعاطف بيحتاج يكون لوحده على فترات عشان يفرغ الطاقات اللي بيجمعها من الناس ويشحن نفسه بطاقة إيجابية


بعد كل دة عرفتي انتي ليه بتجذبي النرجسي وبتعتبري مغناطيس النرجسي ؟ الحلقة الجاية حقولك بالتفصيل ليه بتجذبي النرجسي وازاي توقفي الجذب دة


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11