آثار النرجسي على ضحيته
١- احساسك انك مش كفاية وانك قليلة ،
انتي بتقولي انا حاولت كل حاجة اتكلمت اكتر ، قللت الكلام ، البيت نضيف ، تخليت عن صديقاتي ، حسنت اكلي ، اتصاحبت على زوجات اصحابه بدل صاحباتي ، مع ذلك مفيش فايدة طول الوقت حاسة اني تحت الاختبار وتحت الملاحظة ودايما مش بيشوف اي حاجة حلوة ولما تكون كل حاجة تمام مش بيلاحظ غير لو فيه اي غلطة او اي حاجة منسية تكون هي سبب اني اسمع صوته لكن لاتعليق على اي حاجة حلوة . ودة ناتج عن اننا دايما عارفين ان كل ما اجتهدنا اكتر وتعبنا اكتر كل ما حناخد اكتر وحنثبت كفائتنا ونحصد نتيجة تعبنا ، دة صحيح في كل مناحي الحياة الا مع النرجسي دة مش بيتطبق بالعكس كل ما عطيتي كل مافقدتي من روحك ونفسك وصحتك ، وكل ما زاد تأكيد انك مش كفاية . في حين انك اصلا كتير عليه ،
٢- بقيتي بتشكي في نفسك و في قراراتك او بالاصح مبقيتيش عندك القدرة اصلا على اتخاذ اي قرار لانك شايفة انك مش حتعرفي تاخدي قرار .
لما تعيشي مع حد لا بيسمعك ولا بيحس بيكي ولا بيهتم ودايما بيسائلك ويحاسبك وانتي مش عارفة تغيري الوضع دة ابدا وكل ماتحاولي بتفشلي دة بمنتهى البساطة بيدخل لك الشك في نفسك.
٣- الاعتذار المزمن ، دة دايما بيكون مصاحب للشك في النفس ، يعني لو علاقتك بالنرجسي وصلتك لانك تشكي في نفسك فغالبا حتكوني كثيرة الاعتذار بسبب او من غير سبب ، اللي بيحصل ان الطبيعي ان الانسان لما بيغلط سواء بقصد او من غير قصد مفروض يعتذر يعني مثلا معلش اني اتأخرت وهنا معلش بتكون بمعنى اسفة عشان غلطت (سواء اتأخرتي بسبب الاهمال او بسبب الزحمة ) واحيانا نعتذر كنوع من التعاطف زي ( لما نسأل حد عن ابوه مثلا واحنا كنا متباعدين لفترة ونلاقيه يقول الله يرحمه توفاه الله فبتقولي له معلش مكنتش اعرف ، لو حد سقط في الامتحان بتقولي له معلش هنا معلش بتعني اسفة عشانك بس مش اسفة عشان غلطت ) هنا انتي مش السبب في وفاته لكن بتتأسفي كنوع من التعاطف مع حد محبط ، لما نيجي بقى للنرجسي بنلاقي ان مع مرور الوقت هو طول الوقت محبط وطول الوقت مش راضي وتلاقي نفسك طول الوقت تقولي له معلش سواء معلش غلطت او معلش نسيت او معلش متزعلش او معلش تتعوض يعني طول الوقت معلش بمعنى اسفة لانك طول الوقت حاسة انك مش عارفة ترضيه . وبالتالي بتدمني الاعتذار .
٤- بقيتي مشوشة ومتلخبطة وقربتي تفقدي عقلك ليه بقى ؟ لانه شوية منتبه جدا لوجودك وبيرتب لك خروجات وسفريات ويقولك انه بيحبك وعايزك طول الوقت قاعدة جنبه ، وشوية بعيد ومشغول وذهنه مش معاكي خالص وميردش على اتصالاتك ولا رسايلك ، تتفاجئي انه عنده خطط مقالكيش عليها اصلا ، وتلاقي نفسك مش فاهمة ونفسك الوضع يستقر على حالة واحدة ايا كانت الحلو ولا الوحش علي الاقل تقدري تاخدي قرار استمر ولا امشي وتفهمي هو كويس ولا سيء . الوضع المتقلب دة عند النرجسي بيكون سببه انه شغفه متعلق بمصلحته يعني لما تكون مصلحته عندك دلوقتي فحتكوني انتي اهم حاجة (مش حد) عنده ولما يلاقي مصلحته في حاجة تانية ولو كانت ماتش كورة فتكوني انتي مفيش منك فايدة فيركنك شوية وهكذا .( اظن ان دة معناه ان النرجسي مش بيكون مخطط للوضع دة اللي هو سخن بارد دة انما هو عشان اناني ومش شايف غير نفسه بيعمله وفي كل الاحوال هو حيتحاسب على الاذى اللي بيسببه لكي او لغيرك.
٥- الاحساس بالعجز ، لما نتعلم بمرور الوقت ان فيه حاجة مفيش امكانية اننا نعملها بييجي وقت بنوقف المحاولة فيها ولو حصل انها بقت متاحة خلاص ونقدر نعملها مش بنعملها خلاص احنا اتبرمجنا على اننا عاجزين عن اننا نعملها ودة اسمه عجز مكتسب يعني مش متأصل في الشخصية ودة اللي بيحصل لضحية النرجسي انها بتصبح عاجزة عن تركه حتى لو جت لها الفرصة وحتى لو تقدر تصرف على نفسها واولادها بتلاقيها تدور على اي حجة تقولها لما نسألها انتي ليه مش بتسيبيه ، دة طبعا غير الرسايل الاسطورية اللي كانت بتوصل لنا من خلال التربية والافلام ان العلاقة الزوجية علاقة ابدية او ان طالما بيصرف عليكي وعلى اولادك خلاص اديكي عايشة ، او انك كدة كدة مش حتتجوزي تاني يبقى خلاص اهه ضل راجل ولا ضل حيطة ، كل دة بيزود العجز وبيخلق سجون عقلية داخل ادمغتنا .. (خدي بالك انا برضه هنا بتكلم عن النرجسي الخبيث المؤذي اللي بيعمل الكبائر او بيضرب ، يعني اللي تستحيل الحياة معاه )
٦- الحزن والاكتئاب والقلق ، طبعا نتيجة للعجز الناتج عن العلاقة مع النرجسي ، او كمان نتيجة النقص المستمر في المشاعر اللي مفروض توصلك من الشريك ، الاكتئاب مرض له علاج ومش مفروض اننا نستسلم له ونهمله لانه ممكن يؤدي للانتحار وكمان القلق المزمن واعراضه زي التوتر والشك في النفس والتعب وله بعض الاعراض الجسدية زي الصداع وتوتر العضلات ومتلازمة التعب المزمن ، واحيانا القلق يوصل اعراضه لضربات القلب السريعة وصعوبة التنفس والدوخة و والشعور بان فيه حاجة فظيعة حتحصل ، وطبعا القلق زيه زي الاكتئاب له علاج ولازم منقبلش وجود الاتنين دول في حياتنا ونستسلم لهم ابدا ولازم ناخد خطوة العلاج
٧- الاحساس بعدم الاستقرار ، في الاول بتكوني مهما قلتي مش عاجبه لازم يكون فيه حاجة غلط اتكلمتي كتير او اختصرتي او قلتي متأخر او كدبتي ، مع الوقت بتلاقي نفسك تاخدي وقت طويل عشان تقرري حتقولي ايه وتفكري الف مرة قبل ماتتكلمي عشان متتعرضيش للحساب منه ، شوية شوية بتلاقي نفسك قلقانة وخايفة من مقابلته ، اول مابيرجع من الشغل الكل بيكون في حالة طوارئ ، مع انه مكنش الوضع كدة قبل كدة ، بعدين بتقولي في الاخر كنت دايما حاسة ان فيه حاجة غلط واحيانا اللي حوالية كانوا بينبهوني مكنتش بسمع لهم ، دة غير بقى تعرضك للجاس لايتينج ووصولك للشك الذاتي ، والمشي المستمر على قشر بيض ، الحياة مع النرجسي بتديكي احساس بعدم الاستقرار وعدم الاحساس بالامان
٨ ، ٩ ، ١٠ في اول تعليق

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11
الكتب
should i go or should i stay