عشر جمل النرجسي بيختبرك بيهم في اول العلاقة معاه
اتفقنا ان النرجسي لو حطيتي له حدود من اول يوم حيلتزم بيها يعني ازاي ؟ يعني هو أصلا في اول العلاقة بيكون حاطك تحت الاختبار في كل حاجة ، حتقبلي الضغط لحد فين ، وحتتحبسي في البيت ولا حتقاومي وحيعرف يعزلك عن اهلك وعن العالم ولا مش حيعرف ، حيقدر يشتمك ولا لا وحيقدر يضربك ولا لا ، ايوة هو بيحطك تحت سلسلة من الاختبارات وانتي طبعا نايمة في عسل الحب والهيام ومش دريانة مآمنة تماما تماما ولا بتفكري حتى تختبريه ولا تشوفي هو اخلاقه ايه ولا بتراقبي كلامه عشان تشوفي حتى مستواه الفكري لما يتناقش ، طيب ليه انتي كدة لانك أصلا يا اما متعاطفة فالحب والمشاعر بتغلب عقلك او انه يكون اول راجل في حياتك ومع سحر الحب اللي بيعمله فيكي مش بتفكري أصلا لانك غرقتي في وهم الحب ، المهم ان هو بيختبرك ومن ضمن الجمل اللي بيختبرك بيها النرجسي :
١- بصي انا عايز منفترقش ابدا ابدا أي وقت حنشتغل في مكان واحد او حرجع من الشغل ناكل سوا وننام سوا ونصحى سوا ونخرج سوا ، محدش يروح عند اهله لوحده ، نزور اهلك سوا ونزور اهلي سوا
٢- مش عايز صاحباتك دول أصلا في حياتك انا بغير منهم
٣- انا صحبك وصاحبتك ومامتك وباباكي واخواتك انا كل العالم لكي
٤- انا بحبك اكتر من مامتك وباباكي أصلا ومستحيل حد حيحبك زيي
٥- احنا معندناش ستات تشتغل ، احنا ستاتنا بتقعد في البيت تخدم بيتها وجوزها
٦- صاحبي ضرب مراته وغضبت عند أهلها وقلت له متجيبهاش مش هي اللي خرجت
٧- لو اتصرفتي التصرف دة تان يحيكون لي تصرف معاكي / حهزئك/ حمد ايدي عليكي/ حسيبك
٨- لازم تعرفيني مواعيد خروجك ودخولك وممنوع تتأخري برة ولو مع باباكي ولا مامتك
٩- محدش له كلمة عليكي غيري خلاص
١٠- لما تشتغلي حتساهمي بأد ايه من مرتبك/ لما نتجوز حنقسم مصاريف البيت بينننا
كل دي جمل هو بيختبرك بيها عشان يشوف حدودك ايه وعندك حدود ولا معندكيش أصلا وفي نفس الوقت الجمل دي تعتبر علامات حمرا انك مع نرجسي ياريت اللي اتقال لها كلام جديد تحطه لنا في التعليقات عشان الشابات الجدد تاخد بالها وامهات الشابات تحذر بناتها ، المهم ان انتي من اول يوم تسمعي الجمل دي كان مفروض يكون ردك عليها حاسم وهي دي اكبر غلطة وقعتي فيها معاه انك سيبتي الأمور مفتوحة ،في حين انك لو من اول يوم قلتي لا انا محدش يهزأني ، ولا انا مش بنضرب ،ولا معندناش ستات تصرف على ازواجها ،خصوصا اذا مقتدر ،ولا انا مقدرش استغنى عن صاحباتي ، كان حيعرف ان فيه مناطق ممنوع الاقتراب منها وكان حيلتزم ودة ثابت بالتجارب مع الاحالات ومفروض كل ام عندها بنات تعلمها الكلام دة عشان متكررش تجربة أمها ، المهم ان فيه حالة بتقول هو قال لها انا بحبك اكتر من مامتك قالت له لا معلش مفيش حد بيحب حد زي الام ، من يومها فهم ان مامتها خط احمر ، وحالة حاول يقارن نفسه بأبوها فبيقول لها لا انا عمري ماحعمل زيه لما عمل كذا ، قالت له لا انت أصلا متعرفش تعمل زيه انت أصلا معندكش خبرته وهو عارف هو بيتصرف ازاي وفاهم الصح من الغلط انت لسة صغير عشان تقارن نفسك بيه ، برضه من يومها مايجيبش سيرة ابوها غير بكل خير ، لكن اللي بتسيب الأمور كدة وتتكسف او تخاف ترد لايزعل بعد كدة اول خناقة بيشتمها بالاب وبالام وبيشتم عليهم بدون أي سبب وبدون أي وجه حق ،ليه لانك حسستيه ان سيرتهم مستباحة عادي أتكلم عنهم مرة بطريقة وحشة وانتي سكتتي ، هي دي حدودك اللي لازم تحطيها من اول يوم مع جوزك سواء نرجسي او لا ، علموا بناتكم
نفس الكلام في موضوع الضرب ، كان فيه حالة منزلة بوست في جروبنا ادرس عدوك النرجسي ع الفيس بتقول كانو في السيارة مرة وبيتناقشوا المناقشة احتدت بينهم فبيقول لها تقريبا لومسكتيش حضربك او حاجة يعني بيهددها بالضرب ،قالت له تضرب مين وانت متقدرش وكلام من هذا القبيل انا مش فاكرة بالتفصيل اللي انا فاكراه كويس انه قال لها حتعملي ايه يعني قالت له حضربك وادفنك مكانك ، طبعا من يومها ماكررش مجرد التهديد ، وحالات كتير كتير لو قعدت احكي مش حيخلص الكلام كلهم حطوا حدود معينة في مناطق معينة التزم بيها النرجسي وهم الحالات بيقولوا ياريتنا حطينا حدود في كل مناحي حياتنا معاه مكناش وصلنا للي وصلنا له النهاردة . عشان كدة بقول لك أي واحدة في بداية جوازها او حتى بقالها كتير متجوزة وبتشتغل ابدا ابدا ماتقعدش من شغلها مهما عمل وهو حيستسلم في الاخر الا اذا أصلا هو ناوي طلاق او جواز تاني وبيتلكك عشان يطفشك ويهددك بالشغل وطبعا اذا طاوعتيه وسبتي شغلك حيتجوز عليكي عادي وهو متطمن انك حتقبلي وحتعيشي لانك معندكيش مصدر رزق

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة