حبيبة قلبي
خدي بالك من تعالب الفيس بوك . خدي بالك من اللي ييجي يقول لك صباح الخير كل يوم وبعدين يقولك عاجبني منشوراتك بتقول انك مثقفة ومختلفة ، انتي النهاردة منشوراتك حزينة ليه ، (وانتي الاكونت بتاعك باين انك زوجة وام ) ويبدأ يقول لك انتي زي اختي فضفضي وبعدين تلاقي نفسك بتشتكي له من جوزك او من عيالك ، وشوية شوية حيوعيكي وينصفك ويقول لك ملوش حق وهو بيكون بيعمل أسوأ من كدة مع زوجته ، المهم شوية شوية حتلاقيه بيقول لك دة راجل ظالم ودة ميستاهلكيش ، وانتي طيبة ولازم تكوني قوية وتردي عليه وشوية شوية حيقولك لازم تسيبيه دة شرير ، وفجأة حتلاقيه يختفي أسبوع وميدخلش الفيس وطبعا انتي حتجري وتسألي عليه وهو حيقول لك أي سبب مخترعه انه مثلا كان عيان ، كان عنده مشكلة مع زوجته ، مع أولاده أي حاجة المهم انه كان عايز يتطمن ان الصنارة غمزت وانك حتسألي عنه وفي الحالة دي حيصارحك بحبه العذري البريء وحيقول لك انه اكتشف انه بيحبك لما بعد عنك الأسبوع دة وطبعا انتي مشاعرك حتتحرك وخصوصا لو انتي جوزك مجوعك من المشاعر والرومانسية وخصوصا لو انتي بعيدة عن ربنا ، وطبعا شوية وحتعترفي له بحبك بعدها بكام يوم ، وحتلاقيه بعدها يختفي بقى بس لما تدخلي فيس حتلاقيه اونلاين ومش بيرد عليكي وحتلاقيه بينزل بوستات ومش معبرك ويبدأ بقى يذلك عشان يرد عليكي ، ويبدأ يشترط عليكي انك تمتنعي عن زوجك عشان هو غيران عليكي وشوية شوية حيقولك اتطلقي عشان نتجوز عشان هو مش قادر يبعد عنك اكتر من كدة وانتي تقلبي بيتك رأسا على عقب وتخربيه بإيدك وتسعي للطلاق ، وتخيلي ايه اللي بيحصل مجرد ما التعلب الندل دة يعرف انك اتطلقتي او حتطلقي ، بيختفي تماما ولا تلاقي له أي اثر وكدة هو عمل اللي هو عايزه وراح يشوف ضحية جديدة يخرب بيتها ، الناس دي مريضة نفسيا وعندها اضطرابات شخصية ، انتي واحدة عاقلة وسوية ليه توصلي نفسك لكدة ، ليه متصديش أي حد يستظرف او يقول صباح الخير وانتي متعرفيهوش أصلا ليه تفتحي باب الشيطان ، عارفة ليه لانك ضعيفة وهشة لانك بعيدة عن سندك وحاميكي بعيدة عن دستورك اللي بيكفل حقوقك وبيعرفها لك انتي بعيدة عن ربنا وعن كتابه ،انتي بعيدة وبطلتي تتقي الله في نفسك ولا في اللي حواليكي ، انا مش جاية اهاجمك ابدا انا جاية افوقك وأقول لك قصة عشرات من الحالات اللي عندي اللي زوجها مضطرب وبيعاملها أسوأ معاملة وحارمها من الحب والعطف ومن كل حقوقها وبالتالي بقت جعانة مشاعر ومعرفتش تعوض المشاعر دي من طريق صحيح وأول ما واحد مضطرب تاني شاور لها جريت عليه ونسيت ان دة حرام وان دي مش اخلاقها وان دة مش هي ، فوقي لنفسك وخدي بالك من حدود ربنا


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11