ليه النرجسي بيلجأ لسياسة الانكار وتعملي ايه لما يعمل كدة ؟ ليه دايما ينكر اخطاؤه ولو كانت بسيطة ؟
النرجسي بيلجأ للانكار لما يكون متأخر عنك خطوة يعني ايه ؟ يعني انتي تقدمتي عليه ومثلا مسكتي عليه دليل ويتوجهي له اتهامات وبالتالي زنقتيه في كورنر ومضطر يدافع عن نفسه وطبعا هو مش حيدافع عن نفسه ولا يحط نفسه في موقف الضعيف الخايف اللي بيدافع عن نفسه ، ولا حيعرف يعكس عليكي ولا يسقط عليكي عملته طالما معاكي دليل ، يقوم يعمل ايه ؟ ينكر ، طيب ايه فايدة الانكار هنا؟ ١- اول حاجة بيحافظ على تقدمه عليكي وتفوقه عليكي
٢- هو كدة بينكر عليكي حقك وقدرتك في انك تحاكميه وتاخدي حقك منه وطبعا دة بيضعفك لانك مش عارفة تاخدي حقك
٣- هو بيكون عنده امل طبعا انه لما يستمر في الانكار حيعمل احباط وتجهدي وتستسلمي وتسكتي وتتنازلي عن حقك وفي نفس الوقت يخرج هو من الكورنر اللي حطيتيه فيه واللي بيحسسه بالرعب من فقد السيطرة عليكي
٤- انتي بقى ممكن تفقدي اعصابك وتنهاري وتبكي وممكن تصوتي وتفرجي عليكي الناس وتبقي مجنونة وتثبتي للناس كلامه عليكي وطبعا الاهم من كل دة ان انهيارك بيوفر له وقود نرجسي عظيم .
٥- لو النرجسي اعترف انك صح وهو غلط دة معناه انه خسران وانتي عارفة النرجسي بيكره الخسارة لانه كدة مش حيبقى سوبيريور وبالتالي حتي لو شايف انك صح حينكر ومش حيخسر نفسه.
طيب تعملي ايه بقى في حالة الانكار دي؟
١- اول حاجة لازم تفهميها ان النرجسي له عالم وفكر مضطرب مش بيحيد عنه اللي هو انه هو اللي صح واي حد حيعارضه حيكون غلط مهما كان اللي بيعارضه دة مين ، كمان هو له نظرة مختلفة تماما للاشياء والمواقف غير الناس الاسوياء تماما ودة اكيد انتي بتلاحظيه في مواقفه وردوده علي الناس مش عليكي لوحدك ، هو بيفهم الكلام العادي على انه اهانة وممكن الاهانة على انها كلام عادي ، تيوذور بيقول مثلا ممكن انا اكون شايف المدفأة تلفزيون وانتي مهما حاولتي تشرحي له انها دفاية وبتدفي ووو هو مش سامع منك غير انك بتقولي عكس كلامه وبالتالي مش حيسمعك ، حقولك مثل ابسط واقرب للواقع : شرب المية ع الاكل غلط وكلنا عارفين دة لان المية بتخفف حمض المعدة ودة بيؤثر على عمليه الهضم حاجة لوجيك جدا ، النرجسي في مخه ان المية صحية ع الاكل هو شايف كدة مهما انتي شرحتي ولا حيفهم ولا حيسمع اصلا ، انتي لو فهمتي ان النرجسي بيشوف الحقائق مقلوبة ومعوجة لان هو مضطرب ومش طبيعي دة حيريحك شوية في التعامل معاه ، عشان لما تلاقيه بينكر اي حاجة وتكون بسيطة وهايفة تقلبي الموضوع وانتي مش متغاظة ولا محبطة بالعكس انتي فاهمة ان فيه حتة في مخه مش شغالة فدة بيهديكي
٢- مهم جدا انك تقدري تستوعبي المعلومة اللي فاتت لكن خدي بالك متحاوليش تعدلي الخلل دة في النرجسي ، لانك انسان متعاطف فحيصعب عليكي زي مابشوف كتير من الحالات تقول لي انا حساعده و انا حعالجه ، لا متحاوليش لانك حتهدري وقتك وجهدك واعصابك بدون اي فايدة ، فمتحاوليش تصلحي رؤيته المختلة للاشياء
٣- اوعي تقعي في فخ انك توافقي النرجسي علي انكاره عشان تهدي الدنيا وتخلصي من صداع المناقشة او من الغضب النرجسي او الصمت العقابي ، كمان بعد المناقشة ماتخلص متروحيش تصالحيه وتعتذري مهما انكر طالما انتي متأكدة من كلامك ومن دليلك ، وخدي بالك ان انكاره الشديد دة ميهزكيش ويوهمك انك بتنسي او جايز انتي اللي غلطانة وخصوصا ان بعضهم ممكن يحلف ع المصحف وبعضهم يبكي وبعضهم يترمي في الارض ويعمل مسرحية اللي بيموت واللي انهار وكل الكلام المبتذل اللي بتشوفوه دة اوعي تصدقيه هو عارف انك متعاطفة وعارف انك حتتلهي في اللي بيعمله وحيصعب عليكي وحتنهي الموضوع وتصالحيه ، طبعا انتي ايوة حتنهي الموضوع وتوقفي المناقشة لان مفيش منها فايدة لكن لا تصالحيه ولا تعتذري ولا تشكي في نفسك ولاتحسي بالذنب وتتوهمي انك شريرة وانك اذيتيه . اثبتي على موقفك لكن وقفي الكلام بمجرد مايدخل في قصة الانكار دي .
٤- لو حسيتي انك حتشكي في نفسك واتهزيتي ومش عارفة انتي اللي غلط ولا هو الجأي لاصدقائك الاسوياء بعيدا عن قروده الطائرة واستعيني بيهم واحكي لهم الموقف وهم حيعززوا موقفك وحيفهموكي انك صح وان المشكلة فيه مش فيكي ، واحذري انك تلجأي لقروده الطائرة عشان تشهديهم عليه ولا توري لهم الادلة اللي معاكي عشان يقنعوه انه غلط لانهم متبرمجين انك انتي اللي غلط فحيزيدوا شكك في نفسك وحيرهقوكي فابعديهم عنك اصلا ومتدخليهمش اطلاقا في حياتك
٥- في حالة انك بتناقشيه في شيء خطير ومصيري وهو بينكره وانتي معاكي دليل وثقي دليلك وحافظي عليه وزي ما اتفقنا متوريهوش دليلك ابدا مهما استفزك لانه ممكن يفسده وهدديه بيه ولو طلب يشوفه قولي له ابقى شوفه مع الناس اللي حفضحك بيه عندهم و ووو ودة طبعا لو الموضوع جاد ومصيري ، اما في الامور الحياتية العادية زي المية ع الاكل اذى فطنشي وياريت متدخليش في النقاشات دي معاه.
٦- خليكي هادية طبعا ومتديهوش اللي هو عايزه لانه ممكن ينكر حاجة اصلا من باب انه ينرفزك ويعصبك ويلعب بأعصابك عشان تزعقي وتتخانقي وياخد وقود

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11