النرجسي واستخدام الكلام
في عالم الاسوياء الكلام هو وسيلة التواصل والتواد بين الناس
اما في عالم النرجسي حتى الكلام مرضي ، الكلام عند النرجسي بيتحول لسلاح للدفاع عن النفس والتحصين ، النرجسي بيحول الكلمات لمعاني مش مفهومة ولها مليون معنى ، النرجسي مش بيستخدم الكلام في التواصل اصلا هو بيستخدمه في حاجات تانية خالص
١- الدفاع عن نفسه والاختباء والتهرب والتجنب والتمويه .
٢- النرجسي بيستخدم الكلام في اخفاء قصده ونيته يعني مثلا الام النرجسية لما تقول لابنها انا بحبك بيكون جواها : انا معتمدة عليك متسيبنيش وتمشي ، ، ولما تقول له : شوف انا اد ايه ضحيت عشانك بيكون جواها : انت ملكي دلوقتي وانت مذنب كليا وتستحق اللوم ، ولو قالت : كل اللي انا عايزاه انك تكون سعيد ، بيكون جواها : اتمنى تفضل فاشل عشان اقدر احافظ على تفوقي عليك وتفضل انت تعمل لي المهام اللي بوكلها لك طول عمرك . ونفس الكلام طبعا ينطبق على الاب النرجسي
٣- الكلام بالنسبة للنرجسي الخفي هي آداة مهمة جدا لاخفاء شره ونفسه الحقيقية لانه لازم يكبت مشاعره المتأججة بالكراهية للي حواليه وكمان شعوره بالعظمة والتفوق على الجميع ويحول كل دة لتواضع واخلاق عاليه فاللغة بتكون سلاح مهم جدا بالنسبة له لانه بيعبر بيها عن نفسه ويدعي انه فيه كل الصفات الجيدة عن طريق الكلام ووصفه نفسه للي حواليه لان دة بيكون اسهل من التنفيذ طبعا
٤- اما النرجسي الظاهر فهو بيستخدم الكلام بمنتهى القسوة في انه يصطاد فريسته ، او انه يزرع الرعب والارتباك فيها او انه يدفعها انها تصبح شبهه بالاسقاط والايهام او انه يخليكي مش فاهمة هو عايز يقول ايه بالظبط ويشكك في ذكائك او انه يخوفك ويرهبك من غير ماتمسكي عليه كلمة ، انه يسيطر عليكي ويتحكم فيكي ، الكلام عند النرجسي سلاح فتاك
٥- اما النرجسي العقلاني فالكلام هو الصورة الزائفة والنفس المزيفة والسلاح الاوحد ، من حيث جذب الانتباه او المناقشات العلمية او المحاورات العقيمة او انه يضحك عليكي ويغرر بيكي او انه يحقرك او انه يغرقك كلام معسول كله كدب ، العقلاني لايملك من مقومات النرجسي غير عقله ولغته وطبعا شره
٦- صعب جدا انك تفهمي النرجسي لان بناء الجملة عنده ناقص ومشوه ، وعشان تطلعي منه بمعلومة حتقرأي صفحة طويلة وتطلعي بتلات سطور لانه بيتكلم كتير وبيزين كلامه ومش بيحط المعلومة واضحة لا بيدفنها في وسط كم من الاستعارات والكلمات المعقدة بشكل مرهق جدا للقاريء ، وانتي لما يكون بيتكلم معاكي سواء كان حوار حي او شات بتلاحظي انك في نهاية كذا ساعة شات او حوار متطلعيش غير بمعلومتين حاشرهم في وسط الكلام اللي ملوش اي معنى .
٧- النرجسي مش بيتكلم مع حد عادة هو بيتكلم عن حد او بيلقي محاضرة على حد التواصل عنده منعدم ، هو بيستخدم الكلام بشكل منمق ومنظم ومقبول فقط لما يكون شايف امل في اخد وقود غير كدة يتلاعب ويتوه اللي ادامه ويستغله ويتنمر عليه باستخدام الكلام ،
٨- النرجسي ميعرفش يستمع لحد ولا عمره يدي ودنه لحد الا لو حيسمع اطراء ومديح عشان ياخد وقود ، او لو حياخد فايدة مادية ، كمان هو شايف انه وقته مهم وغالي جدا فمينفعش يضيعه في انه يسمع حد وبعدين هو شايف نفسه عالم بكل شيء يسمع ليه بقى .

٩- تلاحظي ان النرجسي عنده قدرة عالية على الصمت وعدم الكلام لمدة طويلة ، واذا اتكلم حيكون كلامه مليان بضمير المتكلم انا ، لي ، … ودة ناتج عن احساسه بالعظمة طبعا واحتقاره لكل اللي حواليه اللي مفروض انهم يحمدوا ربنا انهم متواجدين في الحيز اللي هو فيه يعني ياسعدهم ياهناهم كمان حيتكلم معاهم


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11