جمل النرجسي اللي بيستخدمها في التلاعب بيكي وهدم شخصيتك
لما تتناقشي معاه في حاجة عملها مثلا
١- انتي ليه نكدية ، انتي بتموتي في النكد ، انتي مش لاقية حاجة تنكدي بيها علينا ، انتي مترتاحيش غير في النكد
٢- انتي اصلا مش طبيعية ، انتي جرى حاجة في مخك ، انتي بقيتي عصبية اوفر وحساسة اوفر ،انتي بتعملي مشاكل مع كل الناس ،انتي بقيتي شبه المجانين
٣- انتي بتفكري كتير وكل كلمة بقولها بتحمليها اكتر من معناها وبتلوي الكلام وتفهميه غلط ، انتي بتفسري الكلام على كيفك
الثلاث جمل دول بيوصلوا لك معني واحد ان انتي مش بتفهمي وادراكك للامور مش مظبوط ومتعطل ويخلوكي تشكي في نفسك وهنا النرجسي بيحول نفسه لشخص طبيعي وسوي ويحولك انتي للشخص المضطرب اللي مش طبيعي ومش منطقي وعنده مشكلة وللاسف انتي بعد مابتسمعي الكلام دة بتبدأي فعلا تفكري ان انتي اللي مش طبيعية وبتبدأي تكلمي نفسك وتفكري مع نفسك وتقولي انا فعلا نكدية ؟ انا مش عايزة اكون نكدية ، هو انا فعلا مش منطقية ، او انا بقيت عصبية وحساسة ؟ هل انا ببالغ في ردود افعالي؟ ممكن يكون عنده حق؟ جايز اكون انا اللي غلطانة فعلا؟ كدة النرجسي حقق نجاح عظيم في التلاعب بيكي وفي انه يشكك في نفسك ومن هنا بتبدأ انعدام الثقة بالنفس وفهم النفس بصورة غلط وبتبدأي تشوفي نفسك انسان سيد وبالتالي تكرهي نفسك وتخاصميها ومن هنا تبدأ الاضطرابات النفسية والجسدية
لما بقى النرجسي يتقفش في خيانة او شات او اي نوع من انواع زوغان العين بيكون كلامه كالآتي :
٤- انتي السبب ، لو انتي مريحاني عمري ما ابص برة ، انتي مش بتاخدي بالك من طلباتي ، انتي مش مهتمة بشكلك ولا مظهرك ومهملة ولبسك اي كلام وطول النهار ريحتك مطبخ (على اساس انك بتطبخي للجيران مش له ) ، انتي مقصرة في العلاقة الحميمة (ويكون هو اللي مانعها اصلا وبيتهرب منها )
٥-ازاي اصلا تتهميني بحاجة زي كدة انتي اصلا مش فاهمة حاجة انتي اصلا فاهمة غلط ، دا اكونت واحد صاحبي عملتهوله عشان مش عارف ايه ، او دا واحد صاحبي قال لي حيدخل يختبر مراته من اكونتي واي كلام في اي كلام المهم في النهاية انك ازاي تتهميه الاتهامات السخيفة دي
٦- انا دايما تعملي كدة انتي مبيهونش عليكي تشوفيني مبسوط انتي بتحبي المشاكل انتي دايما تخترعي حاجات ، انتي اصلا مش كويسة هاتي موبايلك وانا اوريكي انك بتكلمي رجالة
٧- انا قلت لك اسف وانتي مش شخص متسامح وانتي قلبك اسود ومبتتسامحيش انتي لو كنتي شخص سلس ومرن ومتسامح كانت حياتنا تمشي احسن من كدة وكنا حنبقى اسعد من كدة
٨- انتي غيورة جدا ، غيرتك دي بتخرجني عن شعوري انتي بتخنقيني انا زهقت من العيشة دي ، مش ممكن فيه حد غيور بالشكل دة انتي مريضة ،
الهدف من الالخمس جمل دول من اول ٤ لحد ٨ انه يوصل لك ان انتي السبب في الغلط لا ان دة اصلا غلطك انتي ، وطبعا لانك انسانة طيبة مشاعرك جياشة ،هوايتك اسعاد الاخرين وحساسة ومبتحبيش تغلطي ولا تزعلي حد ( وعشان كدة هو اختارك ) فطبعا الكلام دة حيحسسك بالذنب لانك منكدة عليه وظالماه ومقصرة معاه وطبعا بما ان دي غلطتك فانتي حتحاولي اكتر واكتر انك تحسني نفسك عشان تسعديه اكتر ، و طبعا انتي بتدخلي في حتة انك بالغتي في الغيرة وتبدأي تكبتي مشاعرك وتشكي اصلا في مشاعرك دي صح ولا غلط ومشاعرك دي اللي هي جزء من نفسك وبالتالي بتشكي في نفسك وطبعا النرجسي بالطريقة دي بيعيد تركيب مشاعرك واحساسيسك على حسب احتياجاته ورغباته وبيوصلك انك تحسي اللي هو عايزك تحسيه وبيلخبط لك كل مفاهيمك اللي اتربيتي عليها لدرجة انه ممكن يوصلك تقبلي حاجة عمرك ما كنتي تتخيلي انك تقبليها زي انك مثلا تفضلي علي زمته بعد مايتجوز عليكي ، ليه لانه لخبط عندك كل حاجة المشاعر والاحاسيس والافكار والقيم والقواعد والمبادئ كسرهم كلهم وعمل منهم عجينة جديدة وحطها في القالب اللي هو عايزه واصبحتي زي المسحورة تحسي اللي هو عايزك تحسيه وتقولي اللي هو عايزك تقوليه وتعملي اللي هو عايزك تعمليه لحد ما ربنا يبعت خبطة بيد النرجسي عشان تصحي وتفكي السحر وتفوقي وتفهمي انك مدمنة مش مسحورة
اكبر غلطة بتقعي فيها مع النرجسي لما بتسمعي الجمل دي انك بتحاولي تحسني من نفسك عشان تراضيه وانك بتتعاملي معاه بمنطقسة وهو اصلا مش منطقي وملوش اي علاقة بالمنطق وتفكيره اصلا مختل ، وكمان انك تحاولي تثبتي له انك حد كويس وانك بتحبيه وانك عايزة تسعديه وطبعا هو فاهم دة كويس و بيقول لك العكس عشان تبذلي مجهود اكتر وتحاولي تثبتي دة
اصحي بقى وانتبهي لنفسك وخدي بالك انه بيحاول يوصل لك ان هي دي الحياة وان هو دة الزواج وان كل الناس كدة وانك احسن من غيرك كتير وان انتي محظوظة بيه وهو احسن حد ممكن تقابليه وبالتالي انتي بتتعايشي مع الوضع وتشكي في نفسك


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11