ليه النرجسي بيعتذر ؟ دة اذا اعتذر اصلا
طالما النرجسي مش بيحب ولا بيعرف يحب ولا كمان عايز يتحمل اي مسئولية ولا حتى مسئوليه غلطه ، طيب امال ليه وامتى بيعتذر ؟
اولا الاول لازم نفهم ان الاعتذار دة مش مجرد كلمة اسف وخلصنا ، لا طبعا الاعتذار دة يعني تحمل مسئولية الغلط اللي بنعتذر عنه ، وكمان بنطبطب على اللي غلطنا في حقه ونطيب خاطره وفي نفس الوقت لازم نتعلم من الغلط دة والا حنكرره تاني . لكن بقى اعتذار النرجسي حاجة تانية خالص ، هو عبارة عن كلمة اسف وخلصنا ، كلمة اسف عشان القطر يفضل ماشي ويوصل في معاده على حسب الخطة ، يعني بيمشي حاله بالبلدي كدة ويرجعك للطريق اللي راسمه لكي في الحياة . طيب لو مش مصدقاني حقولك تتأكدي ازاي انه اعتذار حقيقي ولا مزيف :
١- مش حيتحمل مسئولية الغلطة ولا يصلحها حتى لو قالك انه حيصلحها زي مثلا لو قفشتيه بيخونك اي نوع من انواع الخيانة المهم انه حيركع لك على ركبته ويبكي ويقول لك حرمت وحسيبها وا وا وبعدين بعد وقت تلاقيه مع نفس البنت حتى مسبهاش وراح وقع مع غيرها لا دة هو اصلا محاولش يسيبها وكان بيكدب وكان اعتذاره مزيف ، ومن ضمن الحاجات اللي حتعرفك انه اعتذار مزيف الكلام او الجمل اللي بيقولها عشان يعتذر وبتكون كلها بتبعد المسئولية عنهم :
١- انا اسف انك حسيتيها بالطريقة دي ( يعني هي كانت مفروض تتحس بطريقة تانية وانتي اللي حساسة مثلا )
٢- انا اسف انك فكرتي فيها بالطريقة دي ( يعني العيب فيكي وفي تفكيرك مش في الغلطة اللي انا عملتها او العملة السودا اللي انا عاملها )
٣- انا اسف ان الموقف ممشيش بالطريقة اللي انتي كنتي عايزاها (يعني برضه الغلطة مش غلطتي لان انتي اللي توقعتي حاجة مش منطقية)
٤- انا اسف انك حسيتي بالاذى ( يعني انتي اللي حسيتي مش انا اللي تسببت لك فيه)
الجمل دي مش اعتذار دي شكل الجاسلايتسنج ، طيب المفروض الاعتذار الصحيح الصحي يكون ازاي ؟
١- انا اسف على اللي قلته ، ٢- انا عارف انك تأذيتي واسف جدا ان كلامي اذاكي ، ٣- اسف على اللعملته معاكي ، اسف انتي مقلتش الحقيقة واوعدك انه دة مش حيتكرر واني اكون احسن . الاعتذار الصحي بيكون فيه تحمل مسئولية الغلط واهتمام بمشاعرك ، وطبعا لازم تكوني واخدة بالك ان دة مش بيحصل مع النرجسي ابدا لما بيعتذر ، وبالتالي انتبهي للغلطة الكبيرة اللي بتعمليها لما النرجسي بيعتذر لك وهي انك تتخيلي انه طالما اعتذر يبقى فهم انه بيغلط يعني هو بدأ يتغير ، اكيد لا احنا متفقين انه مش بيتغير من غير علاج دة كمان مش بينجح في كل الحالات ، المهم هو بيعتذر عشان انتي انبتيه بهدوء من غير ما تنفجري ولا تنهاري ولا تديه وقود ، وكلامك بيكون مؤلم له وهو مش عايز تأنيب ولا عايز صداع ،او انه حس انك حتمشي وتسيبيه وهو مش مستعد لدة فبيعتذرلمجرد انه يمشي الدنيا زي ماقلت لك . خدي بالك هنا دكتور راماني قالت نقطة مهمة جدا وهي انك لو بتروحي لمعالج معندوش وعي كافي بالنرجسية وحكيتي له ان زوجك اعتذر حيقولك المفروض تقبلي الاعتذار دة ودة اصلا في حد ذاته بيلخبطك ويشتتك ،
طيب انتي المفروض تتعاملي ازاي مع الاعتذار دة ؟ اللي انتي متأكدة انه مجرد جاس لايتينج او حتى كلمتين عشان ترجعي والدنيا تمشي ، وانتي في نفس الوقت عايزة ترجعي ، انتي شكلا حتقبلي الاعتذار ولكن
١- خليكي فاهمة ان اعتذاره دة مش اعتذار صحي ولا حقيقي ، وهو عايز يمشي الدنيا وملوش علاقة بيكي ولا بمشاعرك ولا بالالتزام بالمسئولية عن الغلط اللي غلطه ولا تصحيح للوضع
٢- متعتبريش الاعتذار دة التزام بالتغيير لان دة حيخليكي تتعرضي لاحباط منهك لما تكتشفي بعدين ان مفيش حاجة اتغيرت
٣- متعتبريش انه اعتذاره معناه انه فهم غلطته خصوصا لما يكون بالجمل اللي قلت لك انه بيستخدمها في الاعتذار اللي في النهاية ماهي الا جاس لايتينج ،
كمان فيه نقطة مهمة قالتها دكتور راماني ان النرجسي لما بيعمل غلطة بعضهم خصوصا الخفي بيحس بالعار ودة بيخليه يتجنن ويعمل غضب نرجسي وبيفضل بعدها مش مرتاح فبيروح يعتذر عشان يتخلص من الشعور بالعار ويريح نفسه مش عشان يريحك انتي

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11