اسلوب تلاعب مدمر تماما لكي ، عزلك تماما عن العالم هدف اولي ورئيسي وسريع التنفيذ عند النرجسي ، اول حاجة بيعملها بمجرد ماقدر يحصل علي القبول منك ، وطبعا لو نجح في عزلك يعني احكم سيطرته عليكي ومنعك من اي حد يساندك او يحاول يثبت لك انك صح وان فيه حاجة غلط بتحصل معاكي . طيب حتعملي ايه ؟
١- اذا كنتي في بداية العلاقة لازم تدركي وتنتبهي ان عملية العزل دي بتكون خفية ومش واضحة ابدا بالعكس بتكون عبارة عن انه حيموت عليكي ومش قادر يقعد ساعة بعيد عنك وانه عايز يقضي ال ٢٤ ساعة بصحبتك ومفيش وقت حتى تتصلي بحد ولا تتواصلي مع حد وفي نفس الوقت يبدأ يتصيد اي مواقف تحصل من اي حد من الناس اللي حواليكي عشان يدافع عنك ويفهمك انه في صفك وان الناس دي وحشة ومش بتحبك ، وممكن يقول لك فلانة قالت عليكي كذا وكذا بالكدب طبعا ويروح يقول لها هي كمان كلام مشابه ، وهكذا مع كل اللي حواليكي حتى مامتك مش حتسلم من التوقيع دة وانتي تحت تأثير ال lovebombing وحالة اللاوعي اللي بتكوني فيها هو بيقدر يقنعك ان كل الناس مش بتحبك وانه هو الوحيد اللي عايز مصلحتك وبدون ماتشعري بأي شيء من الكلام دة اطلاقا . اذا ادركتي كل دة في البداية وبدأتي تواجهيه وتحاربي التكتيك بتاعه توقعي انه حيواجهك في الاول بالكلام المعسول ويخدرك بيه ولو مجابش نتيجة وفضلتي تحاولي تحافظي على علاقاتك حيبدأ يستخدم اساليب التلاعب القذرة زي انه يحسسك بالذنب او يهددك بانه يسيبك او يستدر عطفك وشفقتك او انه يجيب لك طرف تالت يخوفك بيه وهكذا الاعيب لاتنتهي ، اثبتي واوعي تستسلمي للعزل وفهمي كل اللي حواليكي اللي بيحصل من الاول وعرفيهم انه بيوقع بينكم وتمسكي باللي بيحبوكي ومتسمحيلوش انه ينفذ مخطط العزل بتاعه ابدا
٢- اذا كنتي اصلا خلاص اتعزلتي ومخططه نجح تأكدي انك لو حاولتي ترجعي حتلاقي الناس كلها مرحبة برجوعك بالرغم من انعزالك عنهم وتقصيرك معاهم كل المدة دي وحيعذروكي اكتر لما تبدأي تحكي لهم وضعك ومتتكسفيش من انك تقولي انك اتخدعتي وانك تم توجيه الاساءة لكي لان دة مش بسبب عيب فيكي ابدا دة بسبب انك مع حد معيب ، وطبعا النرجسي في الحالة دي حيشن الحرب عليكي وعليهم وحيحاول بكل الطرق يقطع اي صلة توصليها ويكذب ويرد على تليفوناتهم وميقولكيش او يكنسلها عشان متعرفيش انهم اتصلوا وحيمنعك من انك تروحي عندهم او تقابليهم حيبين الوجه القبيح ويستخدم جميع الاساليب القذرة لكن لو انتي ثبتتي ومااستسلمتيش هو حيستسلم ، صدقيني الموضوع حياخد وقت ومجهود لكن يكفيكي انك حتبوظي اكبر انجاز للنرجسي وحتعيشيه في رعب وعدم استقرار لانه اصلا عارف خطورة دايرة المساندة اللي حتكوني فيها لما ترجعي لاهلك واصحابك ، ومهما عمل النرجسي من غضب نرجسي او صمت عقابي اوعي تستسلمي استمري وصممي تتواصلي مع العالم الخارجي ومع الوقت هو حيستسلم لانه الحرب دي حتستنزفه بلافائدة فحيضطر يوقفها
٣- خدي بالك اثناء الحرب دي هو بيكون متوقع مين اللي انتي حتروحي له الاول ومين اهم حد عزلك عنه فيروح يوقع بينكم ويشوه صورتك عنده فهنا تيودور بيقولك اخدعي النرجسي بإنك تغيري الخطة متروحيش للناس اللي هو حيكون متوقع انك تروحي لهم ، روحي الاول لمعالج او مرشد روحي عشان يظبط لك الاول حياتك وشخصيتك ويساعدك ترجعي لنفسك وتقوي بدون ماهو يعرف انتي ببتواصلي مع مين ، وطول مانتي في مرحلة الاستشفاء والتعافي خلي كل خطوة بتعمليها مخفية من النرجسي لانه طبعا حيعرقل لك اي حاجة وحيكسر عزيمتك ولو بالكلام المحبط
٤- خدي بالك ان خطة العزل دي مش بس عزلك عن الناس لا دة كمان بيعزلك عن انفسك عن طريق انه يعزلك عن اهتماماتك وهواياتك ومصادر متعتك ويبدلها بمصادر متعته هو يعني لو بتحبي القراءة و ممارسة الرياضة و الموسيقى وهو طبعا اهتماماته غير زي كرة القدم والتمثيليات والدراما والافلام الخليعة حيبدأ يحقر كل حاجة بتحبيها ويتريق عليها ويتنمر بيكي كل مايشوفك بتعمليها ويبدأ ياخدك من الحاجة دي ويوجهك لحاجة هو بيحبها ( سيبي الكتاب وتعالي نشوف فيلم ، اقفلي الموسيقى الكئيبة دي وتعالي نسمع مهرجانات او اي اعاني مبتذلة شبهه ، سيبي الجيم النهاردة وتعالي نشوف ماتش سوا ، وهكذا لحد مايخرجك من نفسك وينسيكي الحاجات اللي كانت بتسعدك وتلاقي السعادة انسحبت من بين ايديكي من غير ماتحسي وتبدأي تدبلي وتحزني وتفضلي حزينة ومقبوضة وانتي مش فاهمة ليه وايه السبب ، اسفة اني اقول لك السبب ان ذاتك ماتت ، تلاشت وحل محلها ذات تانية منهزمة وضعيفة ومتحكم فيها ومسجونة في قبضة اضعف منها للاسف ولو قمتي ونفضتي نفسك وبخيتي فيه حيترعب بس هو استقوى بضعفك وخضوعك وخنوعك له ، انا اسفة اني بقول لك الكلام دة بس دة حقيقة لازم تعرفيها عشان تقاوميها وتستردي نفسك تاني ( سلسلة التشافي طويلة لكن فيها الشفا)

اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11

الكتب
Escape
How to beat the narcissist