ازاي بتتعاملوا مع الست النرجسية ؟
النرجسيه الست بتتعاملوا معاها ازاي ولما تكون حماتي بتجيب اللي فيها فيا
بكون بتكلم بكل صدق تقولي بطلي لف ودوران بااين ع وشك انك بتكدبي وانا والله بكون بحكي الحوار بصدق جدا النرجسيه التانيه سلفتي
تخليني قعده ف مكان انتي لسااااااانك ده بتعرفي تجيبي حقك بتدي كله ع دماغه وانا حرفيا مش برد
قبل أي كلام شوفي فيديو الثلاثين سؤال عشان تعرفي اذا الكلام اللي حقوله بينطبق على زوجك وحماتك واي حد انتي شاكة فيه ولا لا

شوفوا هو انا دايما بتكلم عن الرجل او الزوج النرجسي ومش بتكلم عن الزوجة النرجسية لسبب انا شايفاه وجيه وممكن ناس كتير تختلف معايا فيه ، اللي هو ان الرجل لو تزوج نرجسية او أي نوع من اضطرابات الشخصية يقدر ببساطة يطلقها ويخلص لاهو معتمد عليها في مصاريف ولا هي متحكمة فيه ومقعداه في البيت ولا هو ضعيف زي الزوجة الضحية ،ومع ذلك بنقول اللي بيتقال ع النرجسي الرجل بينطبق بحذافيره على النرجسية الست في حالة الأزواج والزوجات يعني في التعامل بين الزوجين لكن ماينفعش أقول للزوج اللي زوجته نرجسية اتلاعب بيها عشان تاخد منها المصروف لكن حقول له كون قوي وربيها واعمل زي ما النرجسي بيعمل لكن بالعدل وبالحق وماتسلمهاش مشاعرك وقلبك وكون قوي ومتخليهاش تتحكم فيك لان انت اللي عندك القوة مش هي لو انت شخصيتك قوية ولو انت مش شخصية اعتمادية حتقدر تسيطر عليها ولو انت شخصية اعتمادية لازم تعالج نفسك وتتخلص من الاعتمادية دي عشان تقدر تسيطر على زوجتك النرجسية ، ولو هي خطيرة ولا خبيثة ولا ثالوث سيبها وخد اولادك منها وربي اولادك بعيد عنها ، طيب دة بالنسبة للزوج ،انما بقى لما تكون النرجسية دي ام او حما او سلفة او اخت زوج حنعمل ايه معاها ؟
الام والحما لهم معاملة والاخت واخت الزوج والسلفة لهم معاملة تانية
الام النرجسية لها اكتر من فيديو في القناة شوفيهم
الحماة النرجسي الظاهر الخبيث
النوع دة من الحموات بيكون لعنة على أي حد يتجوز ولادها سواء أولاد او بنات يعني زوجات وازواج أولادها بيعانوا معاناة متواصلة الا اذا قدروا يحطوا لها حدود صارمة ودة طبعا بيكون صعب على زوجة الابن وممكن يكون سهل شوية بالنسبة لزوج البنت ، اللي بيحصل ان النرجسي الظاهر مش بيهمه حد ومش بيهمه شكله ادام الناس وبيلطش في اللي ييجي ادامه بلا أي ادب ولا ذوق وبيكون هجومي ومؤذي جدا وفي حالة الحماة بيكون الوضع مزري جدا لان زوجة الابن بتكون ضحية ضعيفة طبعا لانها تحت ايد ابنها ، المعاملة هنا بتكون سيئة على الملأ يعني بتهاجم زوجة ابنها ادام الناس عادي جدا وممكن تروح لها بيتها وتهاجمها وتقول لها دا بيت ابني وتقعد اد ماتقعد وتجيب بناتها وتعيش فوق دماغ مراة ابنها وبمنتهى الجبروت تقول لها مش عاجبك امشي دا بيت ابني وانتي ضيفة ، دي مش بتحاول تضحك على ابنها ولا توقع بينكم بشكل غير مباشر دي بتقف تشتمك ادامه وادام اهلك كمان وممكن تشتم اهلك نفسهم وتحسي انك واقفة ادام رئيس عصابة مهما كانت من اسرة راقية ولا مستواها المادي ولا الجتماعي مرتفع هي هي ماتفرقش ابدا عن اللي بتبيع مخدرات ع الناصية الفرق الوحيد انها أحيانا تبدوا وكأنها بنت ناس طول ماهي بقها مقفول ، المشكلة مع النوع دة انك كل مرة بتتفاجئي بجرأتها وبجاحتها وانك مش حينفع تعملي أي حاجة تحلي الدنيا معاها اذا سكتتي حتعمل غضب نرجسي وتقول بتتجاهلني واذا اتكلمتي برضه غضب وتقول قليلة ادب وبتتطاول علي وانا زي أمها واذا حاولتي تعامليها كويس حتحرجك ادام الناس وتقول لك انتي بتمثلي ومش حتديكي فرصة تعملي زي ماقلنا مع الحماة النرجسي الخفي اللي هي تعامليها كويس ادام الناس عشان تثبتي انك كويسة وتحاربي تشويه السمعة بتاعها لانها حتنهرك وترفض أصلا معاملتك الكويسة معاها ،الست دي حلها انك متتواجديش في مكان هي فيه وانك تحطي لها ولابنها حدود صارمة ودة مش حيحصل غير لو تعافيتي تماما منه عشان تقدري تمشكي كلامك وتروحيش عندها وتقاطعيها تماما ولاتتواجدي في مكان هي فيه بقدر المستطاع
اما اذا كانت نرجسي خفي بقى فدي حكاية تانية حنتكلم عنها الحلقة الجاية ان شاد الله هي و الظاهر مستوى اول حقول لك تعملي ايه معاهم