علامات الاب النرجسي / مع الابنة
١- بيشوف بنته امتداد له وجزء منه ، وبتكون هي معجبة بيه وهو بيكون عايز اعجابها دة طبعا فبيعمل ادامها كل اللي مفروض يعمله وبيعمل كل حاجة صح عشان يحصل علي اعجابها دة فبيكونوا قريبين من بعض بسبب محاولاته انه يبان ادامها كويس (هنا فيه تحفظ لان دة مش عام يعني مش كلهم ) وخدي بالك كل دة وهي لسة صغيرة وعايشة معاه لان الوضع بيتغير بمجرد مايبان لها خطاب ،
٢- بيحاول يتحكم فيها تحكم بالغ وصعب في كل شيء يخصها والابنة بتتقبل دة من باب الحماية والحب والاهتمام ودة بيديها احساس بالفخر والرضا بوجود اب مهتم ، وبتكون دايما اهدافها في الحياة هي الاهداف اللي باباها رسمها لها ولو اختفى ابوها او انسحب منها لاي سبب هي مبتعرفش خلاص تحدد اهدافها ولا تاخد قراراتها
٣-البنت بتكون محرومة من الاحتياجات العاطفية مفيش حب وقرب من ابوها مفيش احضان ولا احساس بالامان في وجوده ، مفيش احساس بدفء حب الاب وحنانه
٤- بنت النرجسي مفيش لها شخصية مستقلة ولا من حقها تعبر عن نفسها ولا عن مشاعرها ولا آرائها ، هي مفروض بس تعمل اللي ابوها عايزها تعمله وفقط ولو هي نجحت بيكون هو سعيد وبيكافئها واذا فشلت بيكون محبط وحاسس بالعار وممكن ينتقم منها ويخليها تعاني زي ماهو عانى من الحباط والاحساس بالعار بسبب الفشل بتاعها لانه شايف انها بتمثله وانها امتداد له فلو فشلت يبقى هو اللي فشل
٥-هو بيبين للناس انه اب مضحي ومهتم ببنته لدرجة انهم بيتمنوا يكون عندهم اب زيه ودة بيتقال للبنت فبيخليها مشتتة بين اتجاهين ان ابوها فعلا اب رائع وانها مشمئزة منه عشان ازدواج الصورة اللي الناس مش فاهمة ومش شايفين الوجه الاخر اللي هي شايفاه في البيت ودة بيكون في عمر الشباب بقى بعد ما البنت تبدأ تفكر وتحتك وتشوف اباء صاحباتها وتبدأ تفهم ان لا مش كل الاباء زي ابوها وبالتالي تبدأ تفهم ان فيه حاجة غلط وتلاحظ اختلافه من البيت لبرة ولو حبت تشتكي لحد الكل بيهاجمها طبعا لانهم شايفينه اب مثالي ودة بيخليها منعزلة وبتتعلم انها متنتقدش ابوها وبالتالي زوجها بعد كدة وبتكون مزروع جواها الخوف والقلق من الصغر
٦- تحطيم القيم ، الاب النرجسي مش بيحترم بنته عشان شخصها لا لو احترمها بيكون عشان هي نسخة منه واو بيحترم نسخته فيها لان هو اصلا مش شايفها هو شايف نسخته وشايف احلامه اللي عايز يحققها بيها وبالتالي لا شايف مواهبها ولا امكانياتها ولا ميولها ولا رغباتها هو بيشوف ايه اللي كان نفسه يحققه في نفسه ومعرفش وبيحاول يحققه فيها بغض النظر عن هي عايزة ايه
٧- حب الاب النرجسي حب مواقف . دلوقتي احنا ادام الناس انا بحبك وااقدرك وبتكون جرعة حب تحسس البنت انها محبوبة ومتقدرة وبتسيب عندها ذكرى جيدة تقتات منها لحد الموقف اللي بعده وغالبا الاب النرجسي بيحب يسجل لحظات الحب والرضا دي بالصور والفيديوهات وخصوصا في المناسبات الخاصة بالبنت ودة بيخليها مرتبطة بيه والذكريات دي بتزود الارتباط دة وبتكون اداة للتلاعب بمشاعر البنت
٨- البنت طبعا بتكون غالبا في صف الاب اذا قدر يسيطر عليها وبتكون ضد امها ودايما تحملها اخطاء ابوها وتقول انها هي اللي مش فاهماه وهي مش مسانداه ولا مقدراه وهي بتسحبه لتحت ومش بتساعده يكبر وطبعا دة لما بيكون الاب غاسل مخ البنت ومستحوذ عليها ومش مخليها تشوف حد غيره وكمان ممكن يكون زرع فيها ان امها منافس لها على حبه وانها بتغير منها


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11