٤- الام النرجسية مش مشكلتها شخصيتك تتكون ازاي ولا مشكلتها انك تعرفي تعبري عن نفسك ولا متعرفيش ، المفروض ان الطفل لما بيكون مع ام سوية لما بيكبر بيكون قارد انه يجرب حاجات جديدة ويتعلم ازاي ياخد قرارات في الامور اللي تخصه وايه الحاجات اللي بيحبها وايه الحاجات اللي بيحبها وهو دة بداية تطوير التعبير عن الذات بشكل صحي لكن لما بتكون الام نرجسية بتكون متحكمة في اهتمامات الطفل ومش بتسمح له يفكر زي ماقلنا عن الاب النرجسي بيمنعوا الطفل انه يفكر ويقول رأيه وبيسفهوا مشاعره ويعاقبوه لو عبر عن مشاعره وافكاره ، الام النرجسية بتحصر اهتمامات بنتها في اهتماماتها هي بس لكن ممنوع على البنت انها يكون لها اهتمامات خاصة بيها لانها كدة بتخرج برة سيطرة الام ، حالة من الحالات لما امها النرجسية عرفت انها حامل في طفلها الاول ثارت وغضبت وصرخت في بنتها وقالت لها انا مكنتش مستعدة اكون جدة دلوقتي ،
٥- البيت اللي فيه ام نرجسية بتكون الحياة كلها بتدور حوالين الام دي هي طلباتها لازم تتنفذ وانتي تحديدا بتفرض عليكي حاجات تعمليها بغض النظر عن انك حتقدري تعمليها ولا لا وظروفك حتسمح ولا لا ولو معملتيهاش حتكون العواقب وخيمة طبعا حيبدأ الهجوم يزيد عليكي بمناسبة ومن غير مناسبة وفي اي وقت وخصوصا الوقت اللي بتتجمعوا فيه ع الاكل لان دة بيكون الكل موجود فيه وهي بتحب تقتنص فريستها ادام الكل . ، اذا حبيتي تتكلمي معاها عن نفسك او عن مشكلة بتواجهم حتقاطعك ومش حتهتم بمشكلتك وحتبدأ تتكلم عن نفسها وعن معاناتها في الحياة وازاي قدرت تتغلب عليها وهكذا .
٦- الام النرجسية غير متعاطفة ، معروف ان كل النرجسيين غير متعاطفين والبنت اللي امها نرجسية لما بتكبر بتكون عندها احساس دائم بعدم الاهمية ودايما حاسة ان ملهاش اي قيمة وبالتالي بتبطل تتكلم عن نفسها لانها مش مهمة ومش بتعبر عن مشاعرها لان بالتالي مشاعرها كمان مش مهمة .
٧- الام النرجسية مش بتعرف تتعامل مع مشاعرها دة لو هي عندها مشاعر ، هي بترفض بمنتهى القوة انها تتكلم عن المشاعر سواء مشاعرها او مشاعر بنتها ، هي بتهرب فورا من اي حد عايز يتكلم معاها عن مشاعره ، ودة بيخلي الابنة لام نرجسية كابتة مشاعرها طول الوقت وعندها احساس انها مش مسموح لها انها تعبر عنها ، دايما الحالات تقول انهم لما بيحاولوا يتكلموا مع امهاتهم عن المشاعر مش بيشوفوا منهن غير الغضب وكأن الام النرجسية مش بتشعر بشيء غير الغضب
٨- الام النرجسية حساسة وسريعة الحكم و دايما تحكم على الجميع وعلى تصرفاتهم ومحدش عاجبها ، الانسان السوي ميقدرش يتعايش مع النقد المستمر اللي مبيفصلش ، والطفل اللي بيتعرض للنقد بشكل مبالغ فيه بيبقى حساس جدا للنقد ولكل شيء لما يكبر ، الام النرجسية عندها احساس سيء تجاه ذاتها وطبعا مش بتستحمل الاحساس دة فعلطول تسقطه على بنتها وتفضل طول الوقت تنتقدها وتحكم على تصرفاتها وطبعا البنت مش عارفة ان دة بسبب احساس الام الهش بنفسها وبعدم قيمتها وبالتالي دة بيتترجم عند الابنة انها اكيد سيئة والا مكانتش امها تعاملها بالاسلوب دة ودة بيزرع جواها احساس بانها عمرها ما حتكون جيدة بكفاية ، عمرها ما حتكون كشخص مرضية لاي حد ودة بيولد شعور بالنقص
٩- الام النرجسية بتتعامل مع بنتها على انها صديقة مش ابنة ، المفروض ان الام السوية بتقوم بدورها كأم مفروض ان الابنة تقدر تعتمد عليها وتشعر بالاطمئنان والامان بيها خصوصا في الطفولة المبكرة ، لكن الام النرجسية اصلا مخدتش حقها في الاهتمام والحب من ابويها فطبعا عندها احتياج دائم للاهتمام والحب وبتحاول تاخده من بنتها والبنت مش بتنتبه لدة غير متأخر جدا ، وطبعا من ضمن تبعات الصداقة دي ان الام بتحكي لبنتها كل مشاكلها مع زوجها اللي هو الاب ودة بيعمل للبنت لخبطة واحساس بعدم الامان لان صورة الاب اللي هو مصدر الامان لها بتتشوه وبيبان انه حد مؤذي وهي اصلا مش حاسة بالامان مع امها ، وكمان دة بيحسس البنت بالعجز ادام مشكلة امها وانها مش عارفة تحلها لها وبرضه بيوصل لها انها مش كفء ولا كفاية لانها مش قادرة تحل لامها مشكلتها . خدي بالك فيه هنا نقطة مهمة ان الكاتبة كاريل من كتاب ( هل سأكون جيدا بما فيه الكفاية ابدا؟) هنا بتتكلم عن الابنة في عمر الطفولة ، عشان البنت لما بتكبر وبيكون الاب نرجسي هي بتكون شايفة ومش محتاجة حد يعرفها المشكلة عشان الزوجات اللي بتسأل هو انا بؤذي بنتي لما احكي لها اللي بيعمله ابوها لانه بيحاول يشوه صورتي ادامها ، طبعا هنا الوضع مختلف تماما (مشروح في الفيديو)
١٠- الام النرجسية مش بتسمح لبنتها يكون عندها اي حدود او اي خصوصية معاها ، ولما بتكبر وتنفصل عنها بتكون متدخلة بشكل مستفز في حياتها ، ومفيش مانع انها تنشر كل اخبارها لكل الناس بدون اي احترام لاي خصوصية ،ودة لان الام النرجسية دايما شايفة ان الابنة امتداد لها مش اكتر


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11