الام النرجسية بينطبق عليها كل الصفات اللي قلناها عن النرجسي بلا استثناء ، المشكلة العظيمة ان المفروض ان الام هي اقرب حد لنفس الابن او الابنة ومن المفترض انها اول مصدر امان للطفل وانها هي اللي بتكون شخصية الطفل دة بالتعامل والمعايشة و المفروض ان بالفطرة الطفل بيكبر وهو متخيل انه مع احن مخلوق واكتر حد بيحبه في العالم ومصدر الامان الاول له لكن مع الوقت بيحصل تنافر معرفي عن الطفل وكل ماكبر كل ما اكتشف ان فيه حاجة غلط في المفاهيم بيبدأ يقارن بين علاقته بأمه وبين علاقات اصحابه بأمهاتهم وبيبدأ يحس ان فيه حاجة غلط وانه بيفتقد شيء مهم جدا في الحياة ، بيفتقد حنان الام والبنت بتكون غالبا اكثر تأثر من الابن لان الام النرجسية بيكون احساسها بالبنت مختلف عن احساسها بالابن وخلي الموضوع دة نفرد له حلقة لوحده ، المهم الحلقة دي حتكون اكتر عن الابنة للام النرجسية وحنعمل حلقة تانية عن الابن لاب نرجسي ، المهم الام النرجسية بتكون شايفة البنت امتداد لها وانعكاس لها ادام الناس والمفروض ان الابنة تنصاع دة وتنفذه بالحرف الواحد متكنش غير مسخ ونسخة مكررة من امها وبرضه امها حتؤذيها ولكن مش زي لو وقفت قصادها وقالت لا واصبحت لها شخصية مستقلة
خلينا نوصف العلاقة بين الام النرجسية والابنة
١- بتلاقي البنت طول الوقت بتحاول تكسب ود امها وبتحاول تراضيها سواء بالانجازات اللي مفروض انها عايزاها تعملها او بانها تلبي طلباتها ( بما في ذلك الخدمة وانها تقوم بكل واجبات الام اللي مفروض انها تعملها) وفي النهاية مستحيل تشوف نظرة رضا في عين امها ، والبنت في الحالة دي بتلاقيها لما تكبر بتكون people pleaser اللي هم بيتقال عليهم بيسعوا وراء ارضاء الجميع ومترتحش ولا تهدى غير لما تحس انها مرضي عنها وتطحن نفسها تحت رجلين الجميع عشان بس يرضوا عنها ودة طبعا لانها مقدرتش تحصل على الرضا دة وهي طفلة وبتفضل تحاول تحصل عليه .
٢- الام النرجسية بيهمها جدا مظهرك ادام الناس لان انتي زي ماقلت لك بالنسبة لها امتدادها وصورتها ، لازم تكوني تصرفتاك ادام الناس كويسة ولازم لبسك يكون مظبوط الا لو كنتي اجمل منها في الحالة دي حيكون مظهرك السيء هو اللي مهم ، وطبعا في الحالتين هي مش مهتمة بمشاعرك ولا بحالتك النفسية ولا انتي زعلانة ولا مبسوطة دة مش مشكلتها نهائيا
٣- الام النرجسية بتغير من بنتها ، الام الطبيعية بتكون عايزة اولادها يكونوا احسن منها في كل حاجة وبتكون فخورة بيهم جدا ، اما الام النرجسية فبتكون عايزة تفخر بيهم لكن من غير مايسحبوا منها الانتباه ، الام النرجسية بتعتبر بنتها تهديد لها اذا كانت اجمل منها او تعليمها احسن من تعليمها ولو كانت ناجحة في عملها ولها مركز مرموق وحتى لما بتشوف بنتها كبرت وبيجيلها خطاب بتغير منها وغالبا بتحاول تبوظ لها جوازتها وتوقع بينها وبين خطيبها وتخوفه منها وممكن تقول لخطيبها ان بنتها مش طبيعية ومريضة نفسيا ، طبعا الكلام دة بيوصل للبنت رسالتين من امها: ١- اتصرفي كويس عشان ماما تفخر بيكي ،، ٢- ماتتصرفيش كويس جدا لدرجة انك تاخدي الانتباه من ماما .


اكونت الفيس بوك
https://www.facebook.com/profile.php?id=100008051807381
جروب ادرس عدوك النرجسي
https://www.facebook.com/groups/kawthersanad11