هو احنا ليه عايزين نقوي قدراتنا الخاصة كشخصية متعاطفة ، خصوصا زوجة النرجسي ،هي أيه اللي حتستفيده من القدرات الخارقة دي ؟
كل ما عليت قدراتك الاستبصارية كل ماقدرتي تزودي قدرتك على فهم الشخصية اللي ادامك والاكتر من كدة انك حتحسي بنواياه ومشاعره السلبية وممكن جدا تقدري تقرأي أفكاره اذا انتي ربنا منور بصيرتك ، حتيجي لك رسايل من ربنا توضح لك تتعاملي معاه ازاي وحتكوني مستعدة لاي تصرف منه وعارفة حيكون ايه رد فعلك عليه ، حيزيد الثبات الانفعالي ، كمان ثقتك في نفسك حتزيد لانك حتعرفي وتتعرفي على تميزك عن الناس ، حبك لربنا حيزيد لانك حتعرفي النعمة اللي هو خصك بيها ، وكل ماحبيتي ربنا اكتر قربتي منه اكتر فيزود لك النعمة وروحك ترتقي ويزيد استبصارك ويبقى بصيرة
طيب خلينا نكمل باقي الطرق اللي نزود بيها القدرات اللي ربنا اداها لنا
دايما لما تحتاري اسألي نفسك عن الحاجة اللي محيراكي وفكري فيها وطولي في التفكير لكن حاولي دايما لما يحصل كدة تحاولي تركزي في التفكير في أوقات تقدري تسترخي فيها وتكوني في مكان هادي ولوحدك عشان الاسترخاء والهدوء بيساعد على التفكير السليم وفي النهاية حتلاقي ربنا بعت لك الأفكار اللي بتحل لك مشكلتك او بتجاوب على اسئلتك

اخرجي من منطقة الراحة وواجهي خوفك
لازم تتخلصي من المعتقدات اللي بتحدد قدراتك ، يعني ايه ؟ يعني مثلا من ضمن المعتقدات اللي بتقتل قدرات المتعاطفة : مفيش حاجة اسمها استبصار ، دة كل دة صدفة ، مفيش معجزات خلاص زمن المعجزات خلص ، مستحيل اقدر اعمل دة ، محدش بيعرف اللي حيحصل قبل مايحصل ، انا انِي ضعيفة مقدرش اشيل مسئوليه لوحدي وانتي أصلا شايلاها وهو زي قلته بس هو واهمك بالمعتقد دة ، لازم اعمل حساب كلام الناس فممكن اؤذي اطفالي عشان الناس متقولش مطلقة او فشلت او ... ، كل دي معتقدات محددة لقدراتك لانك بناء عليه بتفضلي في مكانك مش بتتقدمي مش بتصدقي انك عندك قدرات خارقة فعلا للعادة وبالتالي مش بتنميها ولا بتستفيدي منها ولا بتاخدي بالك منها ، أصلا السبب في تمسكك بالمعتقدات دي هو خوفك ، خوفك من التغيير وخوفك من حكم الناس عليكي وخوفك من الخروج من منطقة الراحة ، خوفك من المجهول حتى لو كان فيه خير ورزق وراحة وبعد عن الأذى ، عشان تكوني سوبر امباث لازم تخرجي برة منطقة الراحة ولازم تبدأي تفكري برة الصندوق ، لازم تفهمي انك عندك إمكانيات حتساعدك وحتحميكي
شوفي الخوف نوعين خوف منطقي ودة بيكون ناتج عن تعرضك للخطر او التهديد الحقيقي ونوع مش منطقي ودة اللي بيكون ناتج عن احداث حصلت في الماضي وانتي مش قادرة تتخلصي منها وكل ماتحصل أي احداث مشابهة تلاقي الخوف هو اللي يخرج لك ع السطح لكن الاحداث اللي اتسببت فيه بتكون منسية ، لو انتي في اللحظة دي فكرتي كويس وحاولتي تعرفي ايه السبب الحقيقي (المنطقي) للخوف حتقدري ساعتها تتخلصي من الخوف دة ، يعني مثلا اللي بتخاف من القطط وتبقى حتموت منها لو عدت جنبها ، لو ركزت كويس فس لحظة خوفها دي وحاولت تفتكر الموقف القديم اللي خوفها من القطط حتفتكره حتفتكر ان قطة رعبتها وهي طفلة او عضتها او خربشتها ،فانطبع في ذاكرتها القديمة ان القط نذير اذى او بيسبب اذى فالجهاز النفسي بيخلق جواكي رد فعل الهروب اول ماتلاقي قط بدون مايفكرك بالموقف الأصلي فلما توصلي للموقف الأصلي وتلاقي نفسك مكنش لكي حق تخافي أصلا ساعتها بتتخلصي من الخوف دة للابد ، قيسي على كل شيء بتخافي منه في حياتك ،وحاولي تتخلصي من خوفك القديم وخوفك اللي النرجسي زرعه فيكي ،لانك لو اتخلصتي من الخوف حتقدري تخرجي من منطقة الراحة وحتقدري تفكري برة الصندوق .
عشان تقوي حدسك واستبصارك ركزي على الحب بقوة ، عمقي مشاعر الحب جواكي واكتر حد يستحق تعمقي مشاعر الحب له ربنا وسيدنا النبي ، شوفي عشان تحسي بحب ربنا صح لازم تتعلمي حاجة مهمة جدا من حبك للنرجسي ، فاكرة اول ماعرفتي النرجسي اثناء مرحلة الحب الدهبية وبعدها علطول في بداية مرحلة التحقير وانتي مش فاهمة حاجة ؟ فاكرة في المرحلة دي كنتي بتقبلي منه أي حاجة وكل حاجة ، وفاكرة كنتي بترضي منه بأقل حاجة ؟ طيب شفتي لما بتحبي بترضي ازاي ولو كان فيه تلاعب وتنمر وإساءة واستغلال ومع ذلك بترضي بفتات الخبز بعد كدة كمان وكل دة ليه عشان بتحبيه ، طيب شوفي بقى مع ربنا لو حبيتيه او ادعيتي حبه هل انتي راضية عن ربنا زي ماكنتي راضية عن النرجسي في بداية معرفتك بيه؟ هل انتي راضية بالقليل اللي ربنا بيديهولك زي ماكنتي بترضي بالقليل اللي نرجسي بيديهولك مع الفارق ولله المثل الأعلى ، النرجسي كان بيديكي الفتات عشان يذلك ولكن ربنا لما بيديكي القليل قعشان هو عارف ان صلاحك دلوقتي في القليل دة ، هو عارف انه لو اداكي رزقك دلوقتي حتديه للنرجسي ومش حتعرفي تسترديه منه فيؤجله لكي لحد ماتكوني قوية وتقدري تحافظي عليه ، عشان كدة لازم تتعلمي ترضي عن ربنا ولازم تتعلمي تحبي ربنا لان طاقة الحب وقوة الحب هي دي ميزتك اللي ربنا ميزك بيها عن العالم وهي دي السبب في قدراتك الخاصة دي فلما تعمقي وتكبري الحب دة حتزيد قدراتك لا محالة