المتعاطفة ١٢
الحلقة اللي فاتت رسمنا الثلاث دواير وحطينا فيهم أسماء الأشخاص وسمينا الدايرة الصغيرة دايرة الأمان واللي في النص دايرة الشك والكبيرة دايرة الخطر وقلنا اني حشرح لك الأشخاص اللي مفروض تتحط في كل دايرة ونشوف اذا حتحتاجي تغيري توزيعاتك ولا لا . طيب
الشخص اللي مفروض تحطيه في دايرة الأمان اللي هو قدر يكسب ثقتك في مواقف كتير ، بيحافظ على اسرارك ،بيوفي وعوده لكي حاطط مصلحتك في اعتباره ، عمره مافكر يؤذيكي ولا عمره اذاكي عن عمد واذا حصل منه أي إساءة بتكون عن غير قصد وبيعتذر عنها وبيصلح الخطأ اللي بدر منه
الدايرة دي مفروض يكون فيها من ١- ٤ افراد
الشخص اللي مفروض يتحط في دايرة الشك : الشخص اللي تشكي ان عنده نوايا خبيثة او الشخص اللي بيتجنب تحمل أي مسئولية ، معتد بنفسه وبمصلحته فقط ، وبناء على تصرفات الناس اللي انتي شاكة فيهم دول معاكي حتقدري تحطيهم يعني حتصنفيهم بناء على تصرفاتهم معاكي ، فبالتالي اللي مش حتكوني متأكدة ١٠٠٪ انهم ناس آمنين مؤتمنين حيتحطوا في دايرة الشك الى ان يثبت العكس والمفروض ان الدايرة دي حيكون فيها اكبر عدد من الأشخاص
الشخص الخطر واللي حيتحط في دايرة الخطر دة بقى حد اذاكي فعلا بكلامه او بتصرفاته او ساء اليكي عن عمد ولو كان الأذى دة قليل جدا الا انه اذى وعن قصد لكن هو لم يعتذر عنه وممكن كمان يكون وجه لك لوم على غلطه او أوحى لك ان انتي السبب في الغلط دة ،
غالبا الشخصية المتعاطفة حتحط الاغراب في دايرة الشك ودة قطعا غلط الاغراب مفروض يتحطوا في دايرة الخطر الى ان يثبت العكس برضه
طيب راجعي الدواير اللي كنتي راسماها الحلقة اللي فاتت وشوفي اذا محتاجة تعدلي ارسمي دواير جديدة واعيدي التوزيع، وبعدين جاوبي ع الأسئلة :
١- ايه اللي خلاكي تحركي ناس من فئة لفئة ؟
٢- هل نقلتي ناس من دايرة الشك لدايرة الأمان؟ وبناء على ايه عملتي النقل دة؟
٣- طلع عنك كام شخص في دايرة الأمان ؟
٤- اذا كان ابوكي وامك متلاعبين عاطفيا حتحطيهم في أي دايرة؟
٥- ايه اللي ممكن يعمله شخص من اللي في دايرة الأمان يخليكي توديه دايرة الشك؟
٦-ايه اللي ممكن يعمله شخص من اللي في دايرة الشك يخليكي توديه دايرة الخطر؟
٧- دلوقتي انتي ادركتي تصنيف الناس اللي في حياتك تفتكري دة ممكن يغير حاجة في حياتك اليومية من حيث التعامل مع الاخرين؟
ازاي حتغيري معاملتك عشان تكون في مصلحتك (زي مثلا – مش حقول اسراري لأي حد – مش حتوقع مساعدة من الشخص اللي في دايرة الخطر - ...)
طيب اذا انا عايزة أكون صداقة جديدة ومش عارفة اتأكد من الشخص اللي ادامي اعرف ازاي اذا كان شخص ينفع يتحط في دايرة الأمان ويكون صديق مقرب ولا دة شخص خطر ؟ يعني بمعنى اخر لو انا شاكة في شخص وحاطاه في دايرة الشك ازاي اختبره واحطه في دايرة الامان؟


جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress/
رابط حلقة السيرة
https://youtu.be/iKKTLjGZYes