لما النرجسي ينوي يعمل عملة سودا من وراكي بيكون عدواني اكتر وبيتلكك ع النفس وفي الغالب بيختفي ويرجع بعد مايعمل عملته ، اتصرف ازاي معاه وقت التلاكيك والنكد ،ولما يرجع وبكون مش طايقاه لاني عارفة انه عامل عملة . وهل ممكن استفيد من الوضع دة عشان هو عامل عملة ؟

دة سؤال زوجة نرجسي في جروب الفيس ادرس عدوك النرجسي
هو ليه النرجسي لما يكون ناوي يعمل عملة سودا بيكون منكد وبيتلكك ؟ وهي ايه أصلا العملة السودا دي؟
مفيش غير الخيانة او انه يبيع شقة انتوا شاريينها سوا ، يعني النرجسي اما يخونك اما يخونك يا اما يمشي مع واحدة او يتجوز عليكي يا اما يسرقك ، كدة وش ،
طيب ليه بينكد بقى وبيتلكك ؟
المفروض بقى انكم مذاكرين كويس وممكن تجاوبوا لوحدكم ع السؤال دة
احنا قلنا قبل كدة حاجة شبه كدة ، النرجسي لما بيخون او بيسرق او بيصورك في العلاقة من وراكي او بيركب أجهزة تسنط في البيت برضه من وراكي ،هو عارف ومدرك تماما انه بيعمل حاجة غلط ولكن هو كمان عايز يعمل كل حاجة من غير ما حد يحاسبه ليه لانه شايف انه مش مفروض يتحاسب ومين اللي حيحاسبه كمان انتي اللي هو انتي مفروض هو اللي يحاسبك ، طيب حيحل المشكلة دي ازاي ؟ يعمل لك لخبطة او بمعنى اصح يلهيكي يخليكي أصلا مشتتة كل شوية مشكلة وكل شوية زعيق وممكن مينيمكيش وممكن يمنع الفلوس فمتاكليش كويس وممكن يهد حيلك شغل في البيت وهاتي وحطي ، ليه كل دة عشان تفضلي ملهية ومش قادرة تفكري غير في النكد اللي هو منكدهولك وتفضلي كل تركيزك على اخلص من النكد ازاي واراضيه ازاي او اتقي شره ازاي فلا تاخدي بالك من العملة السودا اللي بيعملها ولا تنتبهي هو انتي أصلا مضروبة على دماغك دا غير انه لما بيغلط وعارف انه غلطان وعارف انه ندل وخصوصا لما بيغلط فيكي انتي تحديدا وهو عارف انك مخلصة وانضف منه واعلى منه فكل مايشوفك يحس بندالته فيتنشط شعوره بالعار (كان فيه تعليق بيسأل يعني ايه بينشط شعوره بالعار؟ حقولك عارفة لما تعملي حاجة غلط يعني غلطة كبيرة شوية او تتسببي في اذى حد ، يعني مثلا عليتي صوتك على مامتك او زعلتي باباكي منك واتصالحتوا وخلاص وفات وقت ع الموضوع بس كل ماتفتكريه تزعلي من نفسك ، ساعتها بنقول ايه حصل موقف مشابه فكرك فنشط عندك الشعور بالذنب ، دة بالنسبة للاسوياء ،اما بالنسبة للنرجسي فهو عنده مشاكل اعمق بكتير من الإحساس بالذنب ومواقف حصلت له فيها اعتداء على شخصه وذاته ولدت عنده شعور بالعار ولما بيحصل أي موقف مشابه بس هو اللي بيعتدي فيه عليكي فالموقف دة بينشط عنده الشعور بالعار)
طيب لما بقى انتي تكوني سبب في تنشيط الشعور المؤلم دة فهو لازم يؤلمك ويوجعك زي ما وجعتيه ، عشان كدة بيتلكك وينكد .
طيب ليه بعضهم بيختفي لحد مايخلص عملته ؟
لانه عايز يخلص من اللي قلنا هدة والاسهل انه يبعد عنك اسهل مايبذل مجهود في التلكيك والتفكير في مشكلة يعملها لانه محتاج يوفر طاقته في التفكير والتخطيط للمصيبة اللي رايح يعملها .
انتي بقى مفروض تتعاملي ازاي لما يتلكك ؟ زي ماقلنا في الحجر الرمادي وحلقات التجاهل ، ولا كأنك شايفة حاجة ولا فاهمة حاجة بس من وقت للتاني ممكن تقولي له شايفاك مرتبك كدة وعصبي مالك طبعا تستعبطي وتحيريه تخليه يتلهي عنك شوية ويفكر هي عرفت ولا ايه فيسكت ، وممكن تشتغليه بشوية وقود سلبي لما يتلكك وتعملي له خناقة صغيرة وممكن تشخطي فيه شخطتين حيخاف ويسكت لانه عامل عملة ، بس الكلام دة ماتعمليهوش الا اذا كنتي تعافيتي عشان ميعرفش يلعب بيكي ، ولو مش حتعرفي تدي وقود سلبي ولا تعملي خناقة صغيرة خلاص تجنبيه تماما وحاولي في الوقت دة تبعدي الأولاد عنه .
لما يرجع بقى على حسب العملة حتتعاملي وعلى حسب ظروفك لو انتي أصلا تعافيتي مش حيفرق معاكي ابدا اما لو لسة فطبيعي انك حتكوني مش طايقاه ودة حيكون صعب عليكي جدا انك تعامليه بالحجر الرمادي لكن هو الحل الوحيد لان زي ما انتي عارفة الكلام والمواجهة مش حتجيب أي نتيجة ، لكن ممكن انتي تتلككي له على أي حاجة وتتخانقي معاه عشان يعمل لك صمت عقابي ع الأقل فترة على ماتهدي شوية من ناحيته وفرصة تكملي التعافي .
مش حتستفيدي من الوضع ابدا الا اذا كان معاكي دليل ضده وهو يكون خفي يعني حيخاف على سمعته ، اما بدون دليل مفيش أي فايدة طبعا وحيقلب عليكي الترابيزة
جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة
https://youtu.be/7biGa6zw3aI