المتعاطفة ٨
مصاصي الطاقة ، مين في حياتك بيمتص طاقتك غير النرجسي؟
مين هم مصاصي الطاقة؟ طبعا النرجسيين اولهم واسوأهم بس مش النرجسيين بس اللي بيمتصوا الطاقة لا فيه ناس مش نرجسيين خالص لكن مصاصي الطاقة برضه
أصلا يعني ايه مصاصي الطاقة دي؟
شوفي فيه ناس كدة لما تقعدي معاهم يمسكوا ودانك وميبطلوش كلام وكل كلامهم سلبي او شكوى وأول ماتمشي من ادامهم تلاقي نفسك منهكة ومستهلكة ومهدودة وفعلا معندكيش طاقة في جسمك وتصدعي وتبقي مش طايقة نفسك بالرغم من انك ماكنتيش بتتكلمي ولا بتتناقشي ولا الموضوع يخصك أصلا ولكن اتنتي مستمعة وفقط ومع ذلك بتستهلكي بالطريقة دي ، ايه اللي بيحصل طيب؟ اللي بيحصل ان الناس دي عندها مشاعر سلبية مهولة ، مشاعر سلبية زي ايه ؟ يعني جواها غضب وحقد وغيظ وعدم رضا عن أي شيء ، الناس دي بيتقال عليهم رغايين ولما يكونوا في تجمع تلاقيهم يروحوا لحد متعاطف ويمسكوه يرغوا على دماغه لحد ما يخلصوا عليه ومعظم كلامهم فعلا سلبي اما شكوى من احوالهم او شكوى عامة من أحوال البلد او العالم كله ودايما ينقلوا الاخبار الوحشة فقط نادر لو قالوا خبر كويس ولو قالوه بيشوهوه لانهم ممكن يلاقوا فيه أي احتمالية للسلبية فيقولوا الخبر ويشوهوه زي مثلا لقوا تطعيم للكورونا اه بس اللي حياخده حيموت او ناس اخدته وماتت، مثلا كورونا حيخلص الفروس يقول لك لا حيتحور للاشرس ،هو دة اللي جواه تشاؤم وسلبية فاضت عليه وعلى جوارحه وحتى بتبان في وشه ، وطبعا بتخرج للناس هو لازم يتكلم عشان يخرج كل دة ويرميه بقى في ودن حد ومحدش حيسمح له بدة غير الشخصية المتعاطفة ومحدش حيتعاطف معاه وينفعل مع الامه غيرها فيمسكها يفرغ فيها سلبيته ويرتاح هو وهي تاخد كل دة وتستهلك وتروح طاقتها تماما ، مش كدة وبس ، الأسوأ من كدة ان الشخصية المتعاطفة ممكن تمتص سلبيته من غير مايتكلم لانها بتحس باللي حواليها عشان كدة قلنا لما تحسي انك مش مرتاحة مع حد ابعدي عنه ، الناس دي عايشة دور الضحية طول الوقت وكمان طول الوقت تاخد وعمرها ماتدي ، من الناس دي على حسب كلام دكتورة كريستين في كتاب dodging the energy vnpires يعني التهرب من مصاصي الطاقة ان من ضمن مصاصي الطاقة النرجسيين والشخصية المضادة للمجتمع السوسيوباث ،ونوع من أنواع الشخصية الحدية احنا عارفين انها اربع أنواع ،وكمان الشخصية الهستيرية ، لكن كريستا بقى صاحبة كتاب المتعاطفة اللي احنا شغالين منه دة بتقول ملحوظة مهمة جدا ، ان مش كل الشخصيات اللي قلناها دي بالضرورة تكون مصاصي طاقة ماعدا النرجسي ،كل النرجسيين مصاصي طاقة بكل انواعهم وطوائفهم ، عشان كدة كريستا خصت النرجسي بالكلام دونا عن باقي الاضطرابات وقالت انه اكتر الناس خطرا على المتعاطفة ليه ؟ لانه في مرحلة الحب الدهبية هو بيحسسها بالأمان والحب والتقدير فبتكون الصدمة عنيفة جدا عليها لما تبدأ مرحلة التحقير وبتكون خيبة امل فائقة وبكدة بيكون كسرها اسهل بكتير من أي حد لانها بتكون حبت بصدق وبقوة غير باقي البشر ،
كريستا قالت ان النرجسي هدفه من معرفتك انه يحس انه احسن حد او احسن من أي حد طب ازاي؟ عن طريق انه يقلل اللي ادامه فهو يبقى احسن ، يوحش اللي ادامه فهو يكون احسن لكن في نفس الوقت ميخليش اللي ادامه دة يهرب منه فلازم يربطه بيه فيشتغل دورة الحب الكره اللي بيعملها فيه عشان يخلي عنده امل انه حيتحسن فميسيبهوش ، فمين اكتر حد طيب وحيصدق وحيلتمس الاعذار؟ طبعا الشخصية المتعاطفة ومن هنا كانت خطورة النرجسي عليكي
طيب مين في حياتك مصاص طاقة غير النرجسي ؟ هل انتي شاكة في حد حواليكي انه مصاص طاقة بس مش متأكدة؟ حسألك ست أسئلة عن الشخص دة لو جاوبتي منهم أربعة او اكتر بنعم يبقى هو مصاص طاقة وابعدي عنه فورا
١- هل الشخص دة بيقول لك معلومات عن نفسه اكتر من اللي مفروض يقولها لك بناء على قربه اوبعده عنك كعلاقة ؟ يعني احنا مش أصحاب ازاي تحكي لي الكلام دة
٢- هل بتحسي بالرهبة من التعامل مع الشخص دة
٣- هل عمرك حسيتي ان الشخص دة بينتقدك؟
٤- بعد التعامل مع الشخص دة هل بتحسي انك محتاجة تشربي او تاخدي مسكن او تاكلي كتير او تنعزلي لوحدك ؟
٥- هل جربنتي الم معدة او صداع او شد عضلي اثناء او بعد التعامل مع الشخص دة ؟
٦- هلي بتحسي بالقلق او العصبية او سرعة الانفعال بعد التعامل مع الشخص دة ؟
طيب ازاي تحمي نفسك من مصاصي الطاقة دول خصوصا لو انتي شخصية متعاطفة ؟
وايه صفات الناس دي عشان تعرفيهم من غير ماتتعاملي معاهم او اول ماتشوفي الصفات دي في شخص تبعدي عنه وتحمي نفسك منه؟
دة اللي حنقوله الحلقة الجاية ان شاء الله

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة
https://youtu.be/9Zt2MB0Tg3A