المتعاطفة ٧
النهاردة حنتعلم نحط لنفسنا حدود بس بطريقة عملية مش تعليمات وخلاص ،لا حنتدرب سوا
عشان تحطي لنفسك حدود صحية انتي محتاجة وقت ممكن يوصل لشهور عشان انتي تتدربي على ترفضي وتتخلصي من الاحتياج لمساعدة الاخرين وعشان كمان الناس اللي حواليكي يتقبلوا ويتعودوا على الحدود دي
اتفقنا قبل كدة انك عشان تحطي حدودك لازم أصلا تكوني محددة وفاهمة انتي عايزة ايه ومحتاجة ايه وفيه فرق بين عايزة يعني ارغب في شيء واحتاج شيء ، ارغب في شيء يعني انا عايزة الحاجة دي زي مثلا عايزة اكل شيكولات او حاجة حلوة ، عايزة اتفرج على فيلم يعني عندي رغبة اعمل حاجة معينة لكنها ليست احتياج لان الاحتياج لابد من تلبيته اما الرغبة فممكن نلبيها وممكن لا مش حتؤثر علينا تأثير سلبي اذا مالبيناهاش زي الاحتياج ، الاحتياج للحب للغذاء والهواء وانك تكوني مسموعة وهكذا ، فانتي بقى لازم تكوني فاهمة رغباتك وفاهمة احتياجاتك وتعرفي تقولي لا عشان تعرفي تحطي حدودك
الفرق بين الحلقة دي وحلقتين الحدود اللي عملتهم قبل كدة ان دي فيه تطبيق عملي ، حنعمل تمرين لمدة أسبوع تتدربي فيه على انك تحطي حدودك
اظبطي منبهك يرن ثلاث مرات في اليوم بحيث الثلاث مرات دول تقدري تكوني فيهم لوحدك ولو لمدة دقيقتين ، حتسألي نفسك فيهم اربع أسئلة
١- هل انا عايزة أي حاجة دلوقتي حالا ؟ (خدي بالك فرقي بين عايزة ومحتاجة )
٢- هل انا محتاجة أي حاجة دلوقتي حالا؟
٣- هل انا اقدر احقق احتياجاتي ورغباتي بنفسي ولا انا محتاجة اطلب مساعدة من حد؟
٤- اذا انا محتاجة اطلب مساعدة من حد حقدر اطلبها من مين؟
حاولي تكتبي طول الأسبوع ثلاث مرات في اليوم عشان الأجوبة دي حنحتاجها في تمرين للأسبوع اللي بعده
خلصنا الأسبوع الأول ومعانا لستة بالرغبات والاحجتياجات وكمان مين ممكن نطلب منه مساعدة
حنبدأ الأسبوع اللي بعده نعمل ايه؟ حنعمل اربع حاجات وحنكتبهم وحنكتب نتيجتهم يعني حنكتب خمس حاجات كل يوم
١- اول حاجة حتعمليها انك تقولي لا ، مش لازم اول مانبدأ نتعلم نقول لا نقولها للنرجسي ، مش دة الهدف انتي ممكن ماتقوليش له لا وبرضه تعملي اللي في دماغك ، المهم انتي حتقولي لا وحنبدأ باي حد قريب وممكن اولادك والمهم لما تقولي لا تقوليها في مكانها مش أي لا ومش حاجة تضايق الأولاد بدون لازمة ، لا هنا مقصود انك تمنعي بيها اذى عن نفسك مثلا ، زي انك تكوني تعبانة وحد يطلب منك تعملي حاجة وتقولي لا مش حقدر ، او انك محتاجة تكوني لوحدك وحد يتصل يقول لك اجي دلوقتي مفروض تقولي لا بكرة ، او حد عايز يزورك في ميعاد نومك لازم تقولي لا بس طبعا فيه استثناءات للكلام دة . المهم انتي حتقولي لا وتكتبي في كشكولك الجميل انا قلت لا لفلان ...... مثلا ابني عايز يعزم أصحابه ع الغدا وانا تعبانة قلت له لا.
٢- تاني حاجة شوفي انتي نفسك في ايه ، عايزة ايه ؟ وتعمليه ،وتكتبي اللي عوزتيه وعملتيه ، مثلا عايزة اكل حاجة حلوة عملت كيك او عملت رز بلبن واكلت ، او عايزة اقرأ
٣- انا محتاجة ايه ؟ محتاجة أكون لوحدي ، طيب اعمل ايه في الأولاد اطلب مساعدة من حد ، مين ؟ اختي صاحبتي امي حتي النرجسي لو حتديه حاجة في المقابل ، أي حد يقعد بالاولاد نص ساعة تختلي فيها بنفسك . اكتبي الكلام دة
٤- اكتبي مين اللي ساعدك ؟ ممكن بنتك او ابنك الكبير مثلا بس مش كل مرة عشان متشيليهوش مسئولية مش بتاعته
٥- لازم تكتبي نتيجة اللي حصل في اليوم يعني مثلا بقيتي اهديي والعصبية قلت ، اكيد علاقتك باولادك حتتحسن ، انتي حسيتي بإيه؟ اكتبي
كل يوم لمدة أسبوع تعملي الكلام دة وتكتبيه
عودي نفسك علي الأربع حاجات دول لازمين في حياتك كل يوم ، طبعا مش لازم تقولي لا كل يوم لكن في الأول حتدربي عليها وبعدين حتبقى سهلة بعد كدة تتقال ساعة اللزوم زي اه بالظبط ، التزمي بالاربع حاجات دول في حياتك حتلاقي نفسك فعلا عندك حدود صحية
شفتي الموضوع سهل جدا احنا مش محتاجين غير اننا نعرف عايزين ايه ومش عايزين ايه عشان نعرف حدودنا ونعرفها للناس ، ومحتاجين يكون عندنا إرادة واعتقد ان مفيش متعاطفة معندهاش إرادة هي بس مستسلمة وضعفت شوية لكن مع التشافي حترجع ارادتك قوية واقوى من الأول كمان



جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة