المتعاطفة ٦
من عيوب الشخصية المتعاطفة انها مهما كانت تعبانة وميتة من التعب لو لقت حد محتاجها بيحصل عندها انفعالات بتعلي الادرينالين في جسمها وطبعا الادرينالين لما بيعلى بيدي طاقة مهولة للجسم وبالتالي الإحساس بالتعب والارهاق بيختفي وتلاقيها طالعة تجري تلحق اللي محتاج لها في حين ان ممكن يكون فيه ناس تانية تقدر تقوم بالمهمة ، الا انها مش بتقدر تقاوم مساعدة الناس ، ليه لسببين : الأول انها عندها احتياج لتقديم المساعدة ، والتاني انها مبتعرفش تقول لا
المتعاطفة مولودة كدة متقدرش متقدمش المساعدة ومتقدرش تتعاطف وبتكون متخيلة ان دة الطبيعي بتاع البشر وان الكل زيها فدايما بتنتظر ان الناس تحس بيها وتعرف احتياجاتها زي ماهي بتحس بالناس وبتعرف احتياجاتهم من غير ما يقولوها ، ودة طبعا مش حاصل ، وبالتالي بنلاقي المتعاطفة بتدي بدون حساب ومش بتاخد أي شيء في المقابل ، وبنلاقي المتعاطفة حدودها مفتوحة للي رايح واللي جاي لانها مش بتعرف تقول كلمة لا
طيب يعني احنا محتاجين نتعلم نحط لنفسنا حدود ، عندنا حلقتين في القناة عن ازاي تحطي لنفسك حدود صحية ودي تالت مرة بنتكلم عن الحدود
هنا كريستا بتعلمنا نحدد حدودنا بشكل عملي وبالتدريب ، هي في الأول قسمت لنا الحدود لتلات أنواع
النوع الأول : الحدود الفزيائية ،اللي هي الحدود الجسدية يعني المسافة اللي انتيب تسمحي بيها بينك وبين أي شخص واقف بيتكلم معاكي مهما كان هو مين وبالنسبة للمقربين جدا فالحدود دي بتتغير من وقت للتاني ، يعني زوجك نفسه فيه أوقات بتتشال الحدود الفزيائىة تماما واوقات تانية لازم تكون موجودة وفيه مسافة لازم تكون محفوظة بينك وبينه ادام الأولاد مسافة غير المسافة اللي بتكون ادام اهلك غير اللي ادام اهله غير اللي في الشارع ، طيب دة الزوج امال بقى باقي الناس تخيلي بقى الحدود دي حاجة مهمة ازاي ، الحدود دي هي فرض احترام الناس لكي ، يعني مثلا زوجك لو قرب منك في الشارع او حضنك او عمل أي حركة تفتكري دة حيخلي الناس اللي ماشية في الشارع تبص لك ازاي تفتكري حتفقدي احترامك ولا حتفرضي احترامك؟ بغض النظر عن الحرام والحلال خلينا في جزئية الثقافة المجتمعية والعادات والتقاليد ، انا بضرب مثل واضح او فج شوية عشان تفهمي اد ايه المسافة بينك وبين أي حد مهمة جدا وبتمثل حدود ياتفرض على الناس احترامك واولهم زوجك يا اما تفقدك الاحترام دة ، وطبعا الحدود الجسدية بتتمثل في بيتك ومين مسموح له يدخله ومين مش مسموح له ، وغرفة نومك وبرضه مين مسموح له يدخلها
تاني نوع الحدود العقلية ،الحدود العقليه دي اللي هي تحددي ايه اللي تصدقيه وايه اللي تقتنعي بيه وايه اللي تعتنقيه ويتناسب معاكي ومع معتقداتك ، وايه اللي لما يتقال لك ترفضيه وتقرري انه مش مقبول ومش منطقي ، لازم تعملي حدود للمعلومات اللي تدخل عقلك خصوصا المعلومات الغلط اللي النرجسي بيزرعها في عقلك زي الصفات السلبية عن نفسك وزي الإحساس الدائم بالذنب ، ولازم تفكري في أي كلام أي حد يقوله لكي مهما كان الحد دة مصدر ثقة ، لازم تفكري قبل ماتصدقي الكلام ،ودة بيفرض على اللي بيكلمك انه يحترم تفكيرك ويحترم عقليتك ، بالظبط زي مثلا الاعلام لما في أي بلد الاعلام بيلاقي الجمهور عبيط وبيصدق أي حاجة بيهري ويقول أي كلام زي جهاز الكفتة مثلا في حين ان دة استهزاء بعقول الناس ودة سببه ان الناس معندهاش حدود عقلية ، الاعلام بالنسبة لهم مصدر ثقة وبياخدوا كلامه كأنه قرآن وهو السلطة الابوية والكلام دة كله ، لكن لما الجمهور يعترض ويقاطع البرامج الهزلية اللي مش بتحترم عقليته حيتجه الاعلام لاحترام عقلية المتلقي ويبدأ يحسن منتجه ويقول ما يتناسب وعقل المتفرج ، انتي نفس الكلام لما النرجسي يلاقيكي فاتحة له حدود عقلك بلا حارس حيحط فيه اللي هو عايزه وطول الوقت حيكون شايفك غبية عشان بتصدقيه وحيستبيح عقلك وتفكيرك ويحطك في القالب اللي هو عايزه
ثالث نوع من أنواع الحدود : الحدود الروحية ،ودي بتتمثل في علاقتك بربنا اللي مفروض مفيش مخلوق من حقه يتدخل فيها غير الشيوخ الفاهمين الوسطيين اللي هم مفروض نتعلم منهم ديننا ، غير كدة محدش له يفرض عليكي نوعية العلاقة دي ولا يتدخل فيها ولا يعلق عليها ولا يحكم عليها زي ما النرجسي طول الوقت يقول لك هو انتي فاكرة ان صلاتك دي حتتقبل ، هو انتي بتمثلي على ربنا ، هوانتي صلاتك بالليل دي مش حتنفعك طول ما انا مش راضي عنك وهو يكون مش راضي عنك مثلا عشان مش راضية بوضع حرام في العلاقة او مش راضية تشوفي معاه أفلام زفت ، علاقتك بربنا لازم تكون محاطة بحدود قوية جدا ولا يحق لمخلوق الحكم عليها ودة انتي اللي بتعمليه مش حد تاني
الحلقة الجاية حنشوف كريستا حتدربنا نبني حدودنا ازاي بطريقة عملية



جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة
https://youtu.be/hK2DcD_Y7DY