المتعاطفة ٥
شوفي العلم نور ومهما اتعلمنا وقرأنا برضه كل يوم بنتعلم حاجة جديدة وبرضه نحس اننا مش عارفين حاجة واننا عندنا جهل فظيع ،سبحانك لا علم لنا الا ماعلمتنا انك انت العليم الحكيم ،
زمان ولحد وقت قريب كنت فجأة الاقي نفسي عايزة أكون وحدي مع اني اجتماعية جدا ومحبش أكون وحدي ابدا ودايما احب معايا حد واحب الونس واللمة وكنت استغرب نفسي لما احس اني محتاجة أكون لوحدي ولما يكون البيت زحمة كنت اهرب للحمام فعلا المكان الوحيد اللي محدش حيقول لي فيه انتي قاعدة لوحدك ليه ، ومكنتش ببقى فاهمة دة بيحصل ليه انا مع ناس بحبهم ومعنديش مشاكل معاهم طب ليه عايزة أكون لوحدي ؟ دلوقتي فهمت اني كنت بحتاج اشحن
من ضمن مشاكل المتعاطفة انها دايما حاسة ان محدش فاهمها ومحدش عارف يستوعب المشاعر الهائلة اللي جواها وفعلا المتعاطفة صعب جدا أي حد يقدر يستوعب كمية الحب اللي جواها غير المتعاطفين لكن باقي الناس مش بتقدر تتخيل دة ، وبتستغربه ودة بيحسس المتعاطفة بالغربة في وسط الناس وبيحسسها بالوحدة دايما ، دة غير كمان انها بتحتاج فعلا تقعد لوحدها عشان تعيد شحن طاقتها وبتلاقي نفسها فعلا محتاجة تكون لوحدها ولو خمس دقايق ولما بيكون الزوج نرجسي مش بيكون فيه مكان تهرب ابدا ولا حتى الحمام ، المهم ان الإحساس بالوحدة دة مؤذي ولازم نتخلص منه ،طيب ازاي ؟ كريستا قالت لنا اربع حاجات نعملها عشان نتخلص من الشعور بالوحدة
١- خدي إجازة من وسائل التواصل الاجتماعي لمدة أسبوع ، فاكرين في حلقات الثقة دكتور باربارا قالت لنا نفس الكلام ، هنا كريستا بتقول لك ان السوشيال ميديا بتزود الشعور بالعزلة والوحدة ، طيب مطلوب منك دلوقتي تجيبي الكشكول بتاعك وتكتبي فيه لو قفلتي السوشيال ميديا لمدة أسبوع (عدا اليوتيوب ) حتقضي وقتك في ايه ؟ ايه البدائل المتاحة لكي وهل تقدري تجربي البدائل دي لمدة أسبوع ؟
٢- هاتي حيوان اليف فاكرين الناس اللي سمعت التشافي لما شاهيندا عربي قالت لازم حيوان اليف ولو مش متاح يبقى نبتة ، الدراسات اثبتت ان الحيوانات الاليفة لها تأثير على مربينها زي تأثير المهدئات وتعوض الشعور بالوحدة وتقلل الإحباط والاكتئاب . هل تقدري تجيبي حيوان اليف؟ ولو متقدريش طيب معندكيش حد قريب منك عنده أي حيوان اليف بحيث لما تزوريه تقدري تتعاملي مع الحيوان الاليف بتاعه ؟، مفيش امل؟ ازرعي أي زرعة وراعيها وكلميها وراقبيها وهي بتكبر ، دة لو انتي اولادك كبروا وبعدوا وكل واحد له حياته ، انما لو معاكي لسة قربي منهم
٣- اعيدي التواصل مع الأصدقاء والعيلة والجيران بما انك زوجة نرجسي فأكيد انتي معزولة عن العالم ، رجعي عالمك القديم بالتدريج واتمسكي بحقوقك انك تشوفي اهلك وتتواصلي مع اخواتك وصلحي علاقاتك بالعيلة كلها ولو بالتليفونات بس .
٤- العلاج بالسرد ، دة عبارة عن انك تمسكي ورقة وقلم (كشكولك الجميل ) وتكتبي ، تحكي لنفسك كل اللي بيحصل معاكي ، تفرغي مشاعرك كلها اول بأول ، لما تحكي لنفسك حتقربي منها بالظبط زي ما أي حد بيحكي لحد بيحبه بيقرب منه اكتر وكمان بتونسي نفسك ودة بيخفف عليكي الشعور بالوحدة ، دة غير انه بيخليكي تشوفي المشكلة من برة .
شوفي الكلام النهاردة متكرر وقلناه قبل كدة في التشافي عشان تعرفوا ان العلاج واحد وكله بيصب في هدف وحيد وهو تطوير شخصيتك وتنمية ذاتك ، الله يهيديكم كلكم اللي منفذتش التشافي تتعب نفسها عشان نفسها واللي مسمعتش حلقات الثقة تسمعها والله يابنات والله حيتغير حالكم وحتفرق الدنيا معاكم

جروب ادرس عدوك النرجسي
https://www.facebook.com/groups/kawthersanad11
صفحتي الخاصة للتواصل معي
https://www.facebook.com/kawthersanad1.wordpress
رابط حلقة السيرة
https://youtu.be/ZAnl03VelBY