رقم حجز الاستشارات والكورسات : ٠٠٢٠١١٥٠٥٨٦٠٥٢
من المشاكل اللي بتقابل الشخصية الاعتمادية انها مش بتقدر تقبل نفسها زي ماهي ، دايما في حالة عدم رضا عن نفسها وعن مشاعرها وعن افكارها ومش بتحس بالرضا عنهم الا اذا حد قال لها او بين لها انه راضي عن المشاعر والأفكار دي ، في نفس الوقت هي دايما شايفة عيوبها وشكوكها في نفسها وعدم تقديرها لنفسها لكن مش قابلة دة غالبا بتنكره عشان كدة مش بتعرف تغيره ،يعني أصلا حنغير ازاي حاجة احنا مش بنعترف بوجودها أصلا؟ القبول هو انك تعترفي بوجود الصفة فيكي وتقبلي وجودها عشان تعرفي بعد كدة تغيريها ، المفروض ان الانسان بيقبل الأشياء من خلال ثلاث مراحل
الانكار ، الغضب ، المساومة ، الإحباط ، التقبل ،يعني مثلا لما أقول لك انتي شخص متكبر ،في الأول حتنكري لانك خايفة من انك تكوني شخص سيء وبعد ماتنكري بتغضبي وممكن تهاجميني ،وبعدين تبدأي تساومي طيب اعمل ايه عشان ما اكونش كدة ، وبعدين يحصل لك احباط لانك اكتشفتي ان الموضوع حقيقي وبعدين تتقبلي انك عندك الصفة دي وهنا بتكون بداية التغيير لانك اعترفتي بوجود الصفة اللي انتي مش راضية عنها فحتقدري تغيريها
مش بس الصفات اللي الشخصية الاعتمادية بتنكرها دي كمان بتنكر مشاعرها ودي اخطر ، الشخصية الاعتمادية اتعلمت كبت المشاعر من طفولتها لانها كانت بتتعرض للاذى النفسي او البدني او كلاهما لما كانت بتحاول تعبر عن مشاعرها بشكل او بآخر ، المشكلة الكبيرة اللي بتقابلك نتيجة كبت المشاعر ان المشاعر مش بتموت ولا بتفنى مش بنتهي لا بتفضل موجودة وتتراكم وتلاقي نفسك بتنفجري فجأة او بتخرج على شكل انفجارات بسيطة متتالية زي مثلا الصراخ في اطفالك ، تخبطي أي حاجة تيجي في طريقك تلاقي نفسك بتبكي فجأة بدون سبب ، الموضوع ممكن في بعض الحالات يوصل لانها ممكن تؤذي نفسها من ماتفهم هي بتعمل كدة ليه . المهم ان في النهاية المشاعر حتفضل موجودة لحد ما انتي تعترفي بوجودها وتخرجيها من الكبت اللي انتي عاملا لها ،لازم تفهمي ان من حقك تشعري ومن حقك يكون عندك مشاعر سلبية تجاه أي حد يؤذيكي وانك لازم تعترفي بوجود المشاعر دي وتقبلي وجودها وتفهمي انك مش مذنبة لانك حاساها ، زي مثلا اللي أمها او ابوها نرجسي وهي من كتر الأذى بقت بتكرههم او مش بتحبهم ومش بتتعاطف معاهم وبعدين تخاف تحس بكدة أصلا وتحس بالعار والذنب انها مش قادرة تحب أمها في حين ان المشاعر والاحساس دة حاجة خارجة عن ارادتنا دي حاجة مش في ايدك فلازم تقبليها وتتقبلي وجودها من غير ماتحسي بالذنب ولازم تفهمي نفسك ان احساسك ومشاعرك دي لها أسباب ،يعني هم مكانوش بيغدقوا عليكي بالحب والحنان وانتي طلعتي جاحدة وناكرة للجميل وللعطاء اللي ادوهولك لا هم أصلا لو كانوا ادوكي حب كنتي حبيتيهم ، المشاعر مش بتاعتك أصلا ومش بارادتك بتشعري بكذا او كذا دي حاجات لا ارادية ماينفعش نلوم نفسنا على حاجة مش احنا اللي بنعملها ،
تمرين
عشان تتعاملي صح مع مشاعرك لازم تفهمي الأول هي جت منين ايه الأفكار اللي ولدت المشاعر دي وايه المواقف اللي ولدت الأفكار أصلا وهنا بنرجع نقول دي فايدة التفريغ الوجداني اللي هو تكتبي المواقف المهمة وتشوفي انتي فكرتي ازاي في الموقف دة ونتيجة الأفكار دي حسيتي بإيه وهل كانت افكارك دي صحيحة ولا لا عشان تعرفي اذا كنتي مشاعرك دي سليمة ولا مبالغ فيها ولا انتي ماديتيش نفسك الفرصة انها تشعر بشكل صحيح وتحس براحتها وبدون ماتكبتي المشاعر دي
اقرأي التفريغ بتاعك وشوفي ايه المشاعر اللي موجودة في اغلب المواقف
فكري ايه اللي حيحصل لو سيبتي نفسك تشعر باللي هي عايزاه أيا كان هو ايه وحيكون ايه احساسك بالراحة ولا بحاجة تانية اكتبي احساسك . وسببه
اختاري حد قريب منك ومؤتمن ومستمع جيد وناقشي مشاعرك معاه بصدق وانفتاح واسمعي كمان لمشاعره وبعدين اوصفي مشاعرك بعد كل دة