لينك حجز الكورس ع الواتس:
https://chat.whatsapp.com/B8RBbEPYIzXHCnfvfry3mr
رقم حجز الاستشارات : ٠٠٢٠١١٥٠٥٨٦٠٥٢
الشخصية الاعتمادية شخصية محبة للسيطرة (الاعتمادية ٥)
ازاي اعتمادية ومحبة للسيطرة ؟ تاني حوضح معنى كلمة اعتمادية عشان اللي بيشوفنا لأول مرة الاعتمادية هنا مش معناها انك بتعتمدي على الاخرين في انهم يقضوا لك حاجاتك ويمشوا لك حياتك لا خالص مش دة معنى الاعتمادية هنا المقصود هنا الاعتماد على الغير في تقدير النفس ،يعني انتي ماتحسيش بقيمة نفسك الا اذا الاخرين شكروا فيكي ومدحوكي، زي مين زي النرجسي لكن النرجسي بياخد دة بطرق شريرة باهانة الناس وتحقيرهم او استعبادهم وانتي كشخصية اعتمادية بتاخديه بانك تسعديهم وتساعديهم وتحلي مشاكلهم .
طيب ايه علاقة الكلام دة بالسيطرة ازاي انا بحب السيطرة وانا أصلا مطحونة تحت رجل النرجسي وأهله ومليش كلمة ولا قادرة انطق ؟ ماهو محدش قال انك مسيطرة احنا بنقول انك بتحاولي تسيطري ، تعالي بالراحة نشوف ميلودي بيتي صاحبة الكتاب بتقول ايه ؟ ومش هي لوحدها انا بحثت كتير في النقطة دي يعني المعلومات موجودة في أوراق بحثية مش في كتابها بس ، المهم الاعتمادية ليه عايزة تسيطر ؟ هل هي زي النرجسي ؟ النرجسي بيسيطر عشان يضمن الوقود ماينقطعش وكمان عشان هو شخصية اعتمادية ،امال الاعتمادية بتسيطر ليه الاعتمادية بتسيطر باسم الحب يعني مش باستخدام الدين ولا بالعافية والاكراه والتخويف ، بس دة مش معناه ان هي صح لان هي مازالت بتخترق حدود الاخرين وان كانت عايزة تسيطر من باب انها تساعد ، هي بتساعد عشان هي شايفة انها لازم تساعد ولازم تحل المشاكل ودة بيخليها محتاجة تسيطر عشان تحلها ، تعالي بقى نشوف الاعتمادية اللي عايشة مع نرجسي وعارفة انه نرجسي يعني فاهمة انه مش بيحبها ولا بيحب غيرها وبعدين هي مضطرة تعيش معاه او مش مضطرة بس بتفضل عايشة ودي حالات انا بتابعها ، هي أصلا لسة بتحاول تصلحه وبتحاول تمنعه انه يخونها او يتجوز عليها وهي خلاص مبقاش فارق معاها عاطفيا طيب انتي مالك هو بيعرف واحدة ولا لا (انا هنا بتكلم عن اللي خلصت من الإدمان )، ليه لسة بتحاول تعرف كل حاجة عنه وبتحاول تمنعه انه يعرف غيرها وبتحاول تعدله وتعدل سلوكه ، هي عايزة تسيطر عليه ،طيب هي ليه عايزة تسيطر عليه عشان هي عارفة ان امانها انها تحافظ على بيتها وانها مش حتحافظ عليه غير بانها تسيطر على المارق اللي هي عايشة معاه ومن هنا بنفهم ان حب السيطرة اللي عند الشخصية الاعتمادية بيكون غالبا سببه الإحساس بعدم الأمان وان الأمان دة في الزوج والاسرة فلازم تسيطر عشان تحافظ ع الزوج والاسرة ، يعني مثلا الحالة اللي جوزها بيتجوز عليها عرفي بشكل متواصل يتجوز عرفي ويطلق ويرجع يتجوز تاني ويطلق وهكذا ، هي بتعمل ايه بتسيب شغلها وتقعد له في البيت عشان تراقبه وفي نفس الوقت تدلعه عشان مايبصش برة وكمان تشغله وتعرف رايح فين وجاي منين وتفضل طول الوقت تاخد منه فلوس لو هو مش واعي لنفسه وتقول عشان مايبقاش معاه يتجوز تاني وهو لانه بياخد هدنة بين كل جوازة والتانية فهي بيتهيأ لها انها سيطرت عليه في الهدنة دي واحيانا هو بيتلهي معاها شوية واحيانا بيكون بيخاف تعرف فبينيمها شوية ومجرد ماتنشغل عنه بيكون مع غيرها ، الحالة دي لازم تفكروا كويس مين هنا اللي بيسيطر على مين ؟ هي بتحاول تسيطر عليه بس هل بتنجح؟ ابدا . وهي قعدت من الشغل وسابت حياتها وبتلف حواليه وبلا فايدة في حين هو فعلا اللي سيطر عليها وعلى تفكيرها واحتكر حياتها وتركيزها . فهي عايزة تسيطر لكن مش بتقدر تعمل دة مع الشخصية السامة ، وللأسف الشديد بتقدر تسيطر على أولادها وبتسلبهم حريتهم وبتسلبهم طفولتهم وحقوقهم في التفكير واتخاذ القرار وبتفرض عليهم افكارها ومعتقداتها وبدافع الحب لانها فعلا بتحبهم وبتخاف عليهم وشايفة انها لو ماسيطرتش عليهم مش حيفلحوا ومش حيعرفوا يمشوا حياتهم ومش حياخدوا قرارات صح ، عشان كدة خدوا بالكم الشخصية الاعتمادية أحيانا لو شديدة السيطرة بتربي نرجسي ولو مسيطرة بس بتطلع شخصية اعتمادية ضحية نرجسي ، بعض الحالات اللي شخصيتها اعتمادية تقول لي بابا كان مسيطر جدا بس كان طيب وحنين جدا وانا كنت اتلخبط وأقول لها اكيد نرجسي وانتي مش شايفة او نرجسي خفي ، لكن العلم نور كل ماقرأنا اكتر اتعلمنا اكتر وفهمنا حاجات جديدة بتنور لنا بفضل الله .
طيب الشخصية الاعتمادية بتحاول تسيطر لكن هل بتتلاعب ؟ ايوة لما تكون انسلخت تماما عن نفسها وبعدت عن ذاتها وبقت في اعلى طيف في الشخصية بتتلاعب وبتخدع وممكن تكدب لكن دة بيكون نادر الطيف العالي دة مش كتير بنشوفه في ضحايا النرجسي .
طيب حنتخلص من حب السيطرة ومحاولة المساعدة بالعافية ازاي ؟ لما نتخلص من ادمان الإصلاح واسعاد الناس وحل المشاكل اللي قلناه في حلقة فك التعلق حنقلاقي نفسنا رغبتنا في السيطرة بتقل تلقائيا ، ولما نفهم نفسنا في نقطة السيطرة دي مش حتعجبنا وبرضه تلقائي حنراقب نفسنا ونراقب تفكيرنا وحنبطل لكن عشان نعمل دة لازمنا التمرين الجاي :
١- مين او ايه في حياتك انتيب تحاولي تسيطري عليه ؟ اكتبي عنه فقرة صغيرة سواء كان شخص او حدث
٢- اللي انتيب تحاولي تسيطري عليه دة هل هو قدر يسيطر عليكي في المقابل وسيطرته عليكي كانت عقليا ولا عاطفيا ولا جسديا
ما احنا اتفقنا انك لما بتحاولي تسيطري بتفقدي السيطرة على نفسك وبالتالي بيتم السيطرة عليها من الاخر
٣- تفتكري ايه اللي حيحصل لو فكيتي تعلقك بالشخص او الحالة او الشيء اللي انتيب تحاولي تسيطري عليه (ممكن شغلك ، ممكن هوايتك) ، اكتبي انتي بتكسبي ايه من محاولة السيطرة على الاخر وهو كمان بيكسب ايه وكمان الخساير بالنسبة لكم انتم الاتنين . ايه النتايج اللي بتحصلي عليها من محاولاتك للسيطرة دي