ازاى تكتب cv باسلوب محترف تضمن لك الوظيفة

إزاي تكتب CV ؟!
طبعا لازم نعرف ان موضوع الـCV من اهم الاسباب اللي بتوصلك لهدفك سؤاء كان شغل او منحة او غيرهم...
وللاسف كتير مننا بيكون كويس جدا ومؤهل بس مبيوصلش حتي لمرجلة المقابلة ودا لان الـCV بتاعه اترفض ودا سبب يخليك مهتم بكتابة الـCV بطريقة صحيحة

أول حاجه لازم نعرفها ان في نوعين من الـCV:
الاول functional: ودا بيكون للناس الفريش (حديث التخرج) أو للناس اللي عايزه تعمل كارير شيفت وتشتغل فمجال جديد، والنوع دا بيكون مبني علي مهاراتك وشخصيتك
التاني chronological: ومتحاولش تنطق الكلمة عشان انا نفسي بقراها بصعوبة
النوع دا بيكون لحد بيقدم علي حاجه اشتغل فيها قبل كدا، وطبعا دا بيكون مبني علي خبراته السابقة وانجازاته.

الكلمتين اللي فاتوا دول ممكن تشوفهم كلمتين نظري بس انا شايفهم مهمين جدا وخصوصا للناس اللي بتدرس او معندهاش خبره، يعني مش لازم تكون اشتغلت قبل كدا عشان يكون عندك CV

نيجي بئي لاهم حاجه وهي احنا بنكتب ايه فين
بص يا سيدي باترتيب كدا
1- أول حاجة اسم حضرتك طبعا، ومعاه البيانات الشخصية (عنوان، موبايل، ايميل)
*الايميل يا ريت يكون عبارة عن اسمك فقط وميكونش فيه حاجات زي مودي أو نونا لو سمحتم
*موضوع الصورة في اختلاف كبير بس الافضل انك متحطش صورتك الا لو الوظيفة محتاجه، زي مثلا لو هتشتغل في ريسبشن او مضيفة طيران وهكذا...
*يا ريت لو ههتحط صوره تبقي صوره فورمال بلاش صورة وانت متصور سيلفي او وانتي فالساحل ابوس ايدكم
2- الهدف من الـCV أو objective: ودي بتكتب فيها سبب الـCV يعني ايه اللي مخليك بتقدم علي الوظيفة دي، ودا بيكون بناء علي متطلبات الوظيفة (job description)
3- تعليمك education: وهنا بتكتب (سنة التخرج، شهادتك، الجامعة، القسم، التقدير، مشروع التخرج وتقديره)
ولو معاك اكتر من شهادة بتكتب من الاحدث الي الاقدم
4- الخبرة experience: وهنا بتكتب الحاجات اللي انت اشتغلتها من الاحدث الي الاقدم برضه بتفاصيلها (الفتره الزمنية، المسمي الوظيفي، الشركة، نبذة عن شغلك)
طب لو حضرتك مكنتش شغال؟ بتكتب اي تدريب نزلته او civil work شاركت فيه ونبذه عنه
5- الكورسات courses: بتكتب الكورسات اللي اخدتها برضه بتفاصيلها(اسم الكورس، التاريخ، المكان اوالموقع)، ويا ريت الكورسات اللي هتكتبها يكون ليها علاقه بالحاجه اللي انت مقدم فيها.
6- المهارات skills: بتبتدي تكتب مهاراتك اللي الشغل محتاجه وهيا فعلا موجوده عندك فعلا مش كلام منقول وخلاص
7- اللغات languages: ممكن تكتب اللغات اللي معاك ومستواك فيهم
8-المراجع references: دا بيحصل عن طريق انك بتكتب
reference upon request
او انك بتكتب الـ reference بتاعك وطريقة الوصول ليه سواء كانت موبايل او ايميل ومهم جدا تكون معرف الشخص انك هتحطه كـ reference عشان لو حد تواصل معاه.