يا ترى تقدر تقرأ كم كتاب في الشهر؟
معظم الناس الناجحة في حياتها بتخصص وقت من يومها للقراءة والقراءة بالنسبة لها مش مُخصصة للدراسة الأكاديمية فقط، بسبب المعلومات اللي في الكتب الناس دي بتفكر بشكل أفضل وبيبقوا مؤثرين بشكل واضح في المجتمع اللي حولهم.
بس الصعوبة دلوقتي أننا عندنا عدد لانهائي من الكتب فكتير مننا بيبقى عايز يقرأ عدد كبير من الكتب بس مش بيلاقى وقت، إن شاء الله هنتكلم في المقال ده عن شوية نصائح تساعدنا أننا نقرأ عدد أكبر من الكتب في الشهر الواحد:
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
1-حط سماعات على ودانك وانت بتقرأ: مش لازم تسمع حاجة في السماعات دي، مجرد ما تحط السماعات دي على ودانك هتنعزل عن الإزعاج والمشتتات اللي حواليك فبالتالي هتركز أكتر في القراءة، على الأقل هتخليك تقرأ أسرع بنسبة 30%
2-جرب تستخدم الكتب الصوتيه : ميزة الكتب الصوتية أنها بتساعدك تسمع الكتاب في الأوقات اللي مش هتعرف تقرأ فيها زي وانت في المواصلات أو سايق العربية أو لو كنت منتظر دورك عند الدكتور وغيرها من المواقف المختلفة.
3-غير نوعية الكتب: من المهم علشان تستمر في القراءة تبدل بين نوعيات الكتب اللي بتقرأها علشان تمنع الشعور بالملل من توع واحد، يعني ممكن تقرأ روايات وبعد كده كتب في مجال شغلك أو كتب علشان تطور نفسك وهكذا.
مجموعة كتب قيّمة لا تهدر شبابك قبل قراءتها
4-دايما يكون معك كتاب: علشان في أوقات كتير في يومنا ضايعة في الانتظار أو المواصلات فيُفضل دايماً يكون معك كتاب علشان تقرأه في الأوقات دي، ممكن لو مش عايز تشيل الكتاب دلوقتي فيه تطبيقات كتير على الموبايل ممكن تنزل عليها كتب وتستخدمها في القراءة، ده هيكون استغلال أفضل للوقت الضائع بدل تصفح السوشيال ميديا.
5-فكر في كتابك القادم: دايماً زور المكتبة أو مواقع الكتب زي "goodreads" على الأقل مرة في الشهر بحيث تحضر الكتاب اللي هتقرأه بعد الانتهاء من كتابك الحالي، ده هيساعدك أن دايماً يبقى عندك كتاب تقرأه باستمرار.
6-تقنيات القراءة السريعة: طبعاً باستخدام تقنيات القراءة السريعة هتقدر تخلص مجموعة كبيرة من الكتب في وقت أقل بالإضافة أنك هتبقى فاهم الكتاب ومستوعبه كويس.
